បើតាមសារាចរណែនាំរបស់ក្រសួងទេសចរណ៍ នៅថ្ងៃទី២១កុម្ភៈ ឆ្នាំ២០២១ ជំងឺកូវីដ-១៩ បំប្លែងថ្មីអូមីក្រុងបន្តកើនឡើងជាបន្តបន្ទាប់នៅក្នុងប្រទេសកម្ពុជា។ ការណ៍នេះធ្វើឱ្យ ក្រសួងទេសចរណ៍ចេញសារាចរណែនាំ ឱ្យមន្ទីរទេសចរណ៍នានាបន្តពង្រឹងវិធានសុវត្ថិភាព ដើម្បីទប់ស្កាត់ការឆ្លងរាលដាលនៃជំងឺកូវីដ-១៩បំប្លែងថ្មីប្រភេទអូមីក្រុង ក្នុងសហគមន៍។
 

ក្នុងសារាចរចំនួន២ទំព័រនេះ ក្រសួងទេសចរណ៍ ក៏បានណែនាំឱ្យអាជីវកម្មទេសចរណ៍ និងរមណីយដ្ឋានទេសចរណ៍ទាំងអស់កុំទទួលភ្ញៀវលើសចំនួនកំណត់ និងហាមការជួបជុំផឹកស៊ី បង្កឱ្យមានហានិភ័យការឆ្លងជំងឺកូវីដ-១៩ ខុសពីគោលការណ៍ក្រសួងសុខាភិបាល ។ សម្រាប់អាជីវកម្មទេសចរណ៍ ឬរមណីយដ្ឋានណា មិនអនុវ​ត្តវិធានសុខាភិបាលត្រឹមត្រូវ ក្រសួងទេសចរណ៍ ឱ្យមន្ទីរទេសចរណ៍តាមរាជធានី-ខេត្ត ស្នើអាជ្ញាធរមូលដ្ឋាន​បិទ អាជីវកម្មនោះជាកំហិត។

 

ក្រៅពីអនុវត្តវិធានសុវត្ថិភាព អាជីវកម្មទេសចរណ៍ទាំងអស់ត្រូវពង្រឹងការរក្សាអនាម័យ សមត្ថភាពបុគ្គលិក និងផលិតផលទេសចរណ៍បន្ថែមទៀត ខណៈភ្ញៀវទេសចរជាតិ និងទេសចរបរទេសផ្ទៃក្នុងចាប់ផ្ដើមដើរកម្សាន្តឡើងវិញ ក្រោយរដ្ឋាភិបាលប្រកាសបិទបញ្ចប់ព្រឹត្តិការណ៍២០កុម្ភៈ។
 

គួរបញ្ជាក់ផងដែរថា មកទល់ពេលនេះ ចំនួនអ្នកឆ្លងកូវីដ-១៩ នៅកម្ពុជាកើនដល់ ១២៨ ១៣៣នាក់ ដោយក្នុងនោះ ករណីអូមីក្រុងក្នុងសហគមន៍ មាន៦៩៣២នាក់។ ដោយឡែក អ្នកជាសះស្បើយពីជំងឺនេះមានដល់ ១២១ ៥៥៣នាក់ ផងដែរ៕