របាយការណ៍ក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី២៥ កុម្ភៈ បានបង្ហាញថា ឆ្នាំ២០២១ ក្រសួងបានចុះអធិការកិច្ចការងារ១០៨២លើក ក្នុងនោះការចុះអធិការកិច្ចការងារសាមញ្ញមាន៩៩៣លើក។ ចំពោះការចុះអធិការកិច្ចតាមដានលើកការដាក់កំហិត មាន៥សហគ្រាស និងអធិការកិច្ចការងារពិសេស មាន៨៤សហគ្រាស។ ជាមួយគ្នានេះ សហគ្រាស៦៥ ត្រូវបានដាក់កំហិត ហើយ៤សហគ្រាសរងការផាកពិន័យ។ 

 

ចំណែក ការផ្សះផ្សាវិវាទក្នុងឆ្នាំ២០២១ មាន៨៤៩ករណី ក្នុងទទួលបានលទ្ធផលផ្លែផ្កា មាន៥៥៣ករណី, មិនទាន់មានផ្លែផ្កា ២៣០ករណី និងមោឃៈ៦៦ករណី។ រីឯ វិវាទការងារ រួមមាន១៥៤ករណី និងបានបញ្ជូនសំណុំរឿងទៅក្រុមប្រឹក្សាអាជ្ញាកណ្ដាល៤៣ករណី។ ចំពោះការអន្តរាគមន៍ដោះស្រាយបញ្ហាកូដកម្មសរុបប្រចាំឆ្នាំ២០២១ មាន៦២ករណី ក្នុងនោះមាន៩៣ភាគរយ ត្រូវបានដោះស្រាយបញ្ចប់។ នេះបើតាមក្រសួងការងារ។ 

 

បើតាមរបាយការណ៍ដដែល គិតត្រឹមឆ្នាំ២០២១នេះ មានអង្គការវិជ្ជាជីវៈ សរុប៥៧៤៦ ក្នុងនោះមានសហជីពមូលដ្ឋាន៥៤៤២, សហព័ន្ធសហជីព២៥២, សហភាពសហជីព៤០ និងសមាគមនិយោជក១២៕