«ការផ្ដល់ជំនួយមនុស្សជាសម្ភារ ជាថវិកា ជាដើម គឺជាការចាំបាច់។ ប៉ុន្តែអ្វីដែលជាការចាំបាច់ជាង តាមខ្ញុំយល់គឺការកសាងយុត្តិធម៌នៅមូលដ្ឋាន នេះគឺជាបញ្ហាគន្លឹះ»។ នេះជាការលើកឡើងរបស់សម្ដេច ស ខេង ដែលបានប្រាប់ឱ្យមន្ត្រីមូលដ្ឋាន ត្រូវយកចិត្តទុកដាក់ដោះស្រាយបញ្ហាជូនពលរដ្ឋ តាមសំណើ និងសំណូមពររបស់ពួកគេ ឲ្យមានប្រសិទ្ធិភាព។

 

សម្រាប់រដ្ឋមន្រ្តីក្រសួងមហាផ្ទៃ ការផ្ដល់យុត្តិធម៌ជូនពលរដ្ឋ គឺអាចទាញទឹកចិត្តពលរដ្ឋឱ្យជឿជាក់លើគណបក្សប្រជាជន និងរដ្ឋាភិបាល ជាងការប្រើប្រាស់អំណោយមនុស្សធម៌។ «ការដោះស្រាយនៅមូលដ្ឋានបើគ្មានយុត្តិធម៌ទេ ទោះបីយើងយកអំណោយទៅជូនប្រជាពលរដ្ឋប៉ុន្មាន ក៏គាត់អត់ជឿយើងដែរ។ ប៉ុន្តែផ្ទុយទៅវិញ បើយើងដោះស្រាយទំនាស់ និងបញ្ហានៅមូលដ្ឋានប្រកបដោយយុត្តិធម៌ គឺខ្ញុំជឿថា គាត់ពិតជាសប្បាយរីករាយ ពិតជាទទួលយកបាន»។ សម្ដេច ស ខេង ថ្លែងបែបនេះ នៅក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២១ នាព្រឹកថ្ងៃទី៣ មីនា។

 

រដ្ឋមន្រី្តក្រសួងមហាផ្ទៃ អំពាវនាវឲ្យមន្រី្តទាំងអស់បន្តបំពេញតួនាទីជាបម្រើរាស្រ្ត ដោយមិនប្រកាន់និន្នាការនយោបាយ និងមិនរើសអើង។ ការបំពេញកាតព្វកិច្ចបែបនេះ ជាការស្វែងរកការគាំទ្រពីប្រជាពលរដ្ឋ មកលើការដឹកនាំរបស់រដ្ឋាភិបាល៕