ជាតិ
សម្តេច ហ៊ុន សែន ប្រាប់ពលរដ្ឋថា កុំឈានហួសរហូតដល់ស្ម័គ្រចិត្តទៅធ្វើទ័ពនៅអ៊ុយក្រែន
× «ខ្ញុំមិនឲ្យពលរដ្ឋកម្ពុជាទៅស្លាប់លើទឹកដីអ៊ុយក្រែននោះទេ»។ នេះជាការអះអាងរបស់សម្តេចនាយករដ្ឋមន្ត្រី ហ៊ុន សែន នាពិធីសម្ពោធមន្ទីរពេទ្យមួយនៅខេត្តត្បូងឃ្មុំ នៅព្រឹកថ្ងៃចន្ទ ទី៧ ខែមីនា បន្ទាប់ពីសម្តេចបានបន្តពន្យល់ពីជំហររបស់កម្ពុជាលើការឈ្លានពានរបស់រុស្ស៊ីលើអ៊ុយក្រែន។
ប្រមុខរដ្ឋាភិបាល កត់សម្គាល់ឃើញថា ពលរដ្ឋកម្ពុជា រួមទាំងក្មេងៗ សុទ្ធតែចាប់អារម្មណ៍ពីបញ្ហានៅអ៊ុយក្រែន ប៉ុន្តែសម្តេចមិនលើកទឹកចិត្តរហូតដល់អនុញ្ញាតពួកគេទៅធ្វើទ័ពនៅអ៊ុយក្រែននោះឡើយ។ សម្តេចពន្យល់ថា វាជារឿងមិនអាចទៅរួច ដោយសារគ្មានអ្វីដែលត្រូវដឹកពួកគេទៅអ៊ុយក្រែនឡើយ ហើយក៏មិនគួរយកសាំងទៅចាក់លើភ្លើងនោះដែរ។
សម្តេច ហ៊ុន សែន បានរំលឹកថា កម្ពុជាចូលអន្តរាគមន៍បានតែក្រោមឆត្រអង្គការសហប្រជាជាតិ ពោលគឺកងកម្លាំងមួកខៀវ តែប៉ុណ្ណោះ។
ទាក់ទងបញ្ហារុស្ស៊ី អ៊ុយក្រែន សម្តេចបានបញ្ជាក់ថា៖ «យើងមិនអាចព្រងើយកន្តើយលើការវាយលុយទ្រង់ទ្រាយធំពីប្រទេសមួយទៅប្រទេសមួយទៀតនោះឡើយ»។ សម្តេចបន្តអំពាវនាវឲ្យមានការចរចា ជាពិសេសការចរចាឈានទៅដល់បទឈប់បាញ់នៅហ្នឹងកន្លែង៕
© រក្សាសិទ្ធិដោយ thmeythmey.com