តុលាការកំពូលរបស់អង្គការសហប្រជាជាតិ (ICJ) នៅថ្ងៃទី៧ និងទី៨ខែមីនា នឹងបើកសវនាការជាសាធារណៈពាក់ព័ន្ធនឹងសំណុំរឿងអំពើប្រល័យពូជសាសន៍នៅអ៊ុយក្រែន។ អំឡុងសវនាការនេះ ភាគីអ៊ុយក្រែនស្នើឱ្យ ICJ ចេញសេចក្តីសម្រេចជាបន្ទាន់ទាមទារឱ្យរុស្ស៊ីបញ្ឈប់ការឈ្លានពាន។ 

 

កាលពីថ្ងៃទី២៤ ខែកុម្ភៈ ប្រធានាធិបតីរុស្ស៊ី វ្ល៉ាឌីមៀ ពូទីនប្រកាសធ្វើប្រតិបត្តិការយោធានៅអ៊ុយក្រែនដោយសម្អាងថា ជាចាំបាច់ដើម្បីការពារប្រជាជនដែលមានភាសាដើមជារុស្ស៊ីនៅភាគខាងកើតអ៊ុយក្រែនពីការគំរាម និងការប្រល័យពូជសាសន៍បង្កដោយអាជ្ញាធរទីក្រុងកៀវ។ អ៊ុយក្រែនដាក់ពាក្យបណ្តឹងប្រឆាំងវិញថា ការអះអាងរបស់រុស្ស៊ីទាក់ទិននឹងអំពើប្រល័យពូជសាសន៍នេះមិនស្របទៅនឹងបំណកស្រាយនៃច្បាប់ប្រល័យពូជសាសន៍ឡើយ ហើយមិនបានផ្តល់អំណាចច្បាប់ឱ្យមានការវាយប្រហារនេះដែរ។ 

 

សំណុំរឿង​នេះ ផ្តោតសំខាន់​លើ​បំណកស្រាយ​នៃ​សន្ធិសញ្ញា​ស្តីពី​ការ​ទប់ស្កាត់​អំពើ​ប្រល័យពូជសាសន៍​ឆ្នាំ ១៩៤៨ ដែល​ចុះហត្ថលេខា​ដោយ​ប្រទេស​ទាំងពីរ។ នៅក្នុងសន្ធិសញ្ញានេះ ICJ ដើរតួជាវេទិកាដោះស្រាយវិវាទរវាងប្រទេសហត្ថលេខី។

 

សូមបញ្ជាក់ថា នៅក្នុងសវនាការនេះ អ៊ុយក្រែននឹងត្រូវបង្ហាញពីសេចក្តីសម្អាងរបស់ខ្លួនដោយផ្ទាល់តាមវីដេអូ ឬនៅទីក្រុងឡាអេនៅថ្ងៃទី៧ ខែមីនា។ ចំណែកឯ រុស្ស៊ីនឹងត្រូវបង្ហាញពីសេចក្តីសម្អាងរបស់ខ្លួនទាក់ទិននឹងបទចោទនេះដោយផ្ទាល់ដែរនៅថ្ងៃទី៨ ខែមីនា៕