ក្រុមអ្នកវិទ្យាសាស្ត្រមច្ឆជាតិ និងអង្គភាពជំនាញជលផល កាលពីថ្ងៃទី៤ ខែមីនា បាន​លែងពូជត្រី៣ប្រភេទដែលជិតផុតពូជជាង២០០០ក្បាលចូលបឹងទន្លេសាប  នៅក្នុងឡូតិ៍​អភិរក្សរបស់ខណ្ឌរដ្ឋបាលជលផលសៀមរាប ដែលស្ថិតនៅក្នុងបឹងទន្លេសាប ភូមិសាស្ត្រសង្កាត់​ចុងឃ្នៀស ក្រុងសៀមរាប។  

 

បើតាមសេចក្តីប្រកាសព័ត៌មានរបស់គម្រោងអច្ឆរិយមេគង្គ ត្រីទាំង៣ប្រភេទដែលបានលែង មានដូចជា ត្រីរាជចំនួន២ក្បាល ត្រីគល់រាំង៥០០ក្បាល និងត្រីប្រា១៥០០ក្បាល។ ទន្ទឹមនេះ ដើម្បីជួយសង្គ្រោះត្រីដែលរងគ្រោះជិតផុតពូជក្នុងពិភពលោក គម្រោងអច្ឆរិយភាពនៃទន្លេមេគង្គ អំពាវនាវឱ្យពលរដ្ឋដែលចាប់បានត្រីមានពាក់ស្លាកសញ្ញា ត្រូវ​រក្សា​ស្លាក​សញ្ញា និងទាក់ទងទៅក្រុមការងារ។

 រូបភាពថតដោយលោក ឈុត ឈាណា 
 

ជាមួយគ្នានេះ គម្រោងអច្ឆរិយភាពនៃទន្លេមេគង្គ នឹង​ផ្ដល់​រង្វាន់លើកទឹកចិត្តពលរដ្ឋ​ ចំនួន​ ១ម៉ឺនរៀល។ ពលរដ្ឋអាចជូនដំណឹងទៅ​ក្រុម​ការងារតាមលេខទូរសព្ទ ​០៧១ ៥០ ៧១ ៥៥៥, ០១២ ៣៥០ ៩០៧ និង ០៧៧ ៥៥៥ ៨០៤។

 

សូមបញ្ជាក់ថា បឹងទន្លេសាប ត្រូវបានគេរាប់ជាបឹងដ៏ធំបំផុតនៅអាស៊ីអាគ្នេយ៍ និងជាជម្រករបស់ត្រីជាង ៣០០ប្រភេទ គឺជាកន្លែងសំខាន់មួយ សម្រាប់ជីវចម្រុះទឹកសាប និងជាតំបន់បម្រុងជីវមណ្ឌលរបស់អង្គការយូណេស្កូ។ ក្នុងរយៈពេលប៉ុន្មានឆ្នាំចុងក្រោយនេះ ត្រីទាំងនេះបានស្ថិតនៅក្រោមការគំរាមកំហែងកាន់តែខ្លាំងឡើង ពីការសាងសង់ទំនប់វារីអគ្គិសនី នេសាទហួសកម្រិត និងគ្រោះរាំងស្ងួត៕ 

 រូបភាពថតដោយលោក ឈុត ឈាណា