Regional Comprehensive Economic Partnership (RCEP) គឺជាកិច្ចព្រមពៀងពាណិជ្ជកម្មសេរីក្នុងតំបន់ ដែលមានប្រទេសនៅតំបន់អាស៊ីបូព៌ា និងអាស៊ាន ចំនួន១៥ចូលរួម បានចូលជាធរមាន កាលពីនៅថ្ងៃទី១មករា ឆ្នាំ២០២០។ ការចូលជាធរមាន នៃភាពជាដៃគូសេដ្ឋកិច្ចនេះ បានធ្វើឱ្យកម្ពុជា ក៏ដូច១៤ប្រទេសទៀត មានសិទ្ធិស្មើគ្នា ក្នុងការនាំចេញទំនិញទៅកាន់ទីផ្សារប្រទេសណា ដែលមានសក្តានុពល។ 

 

លោក ប៉ាន សូរស័ក្តិ បានថ្លែងនៅក្នុងសិក្ខាសាលាស្តីពី«ភាពជាដៃគូសេដ្ឋកិច្ចគ្រប់ជ្រុងជ្រោយតំបន់៖ ផលបច្ច័យ បញ្ហាប្រឈម និងកំណើនសេដ្ឋកិច្ចនាពេលអនាគតសម្រាប់តំបន់អាស៊ីបូព៌ា និងអាស៊ាន» នាថ្ងៃទី១៥មីនាថា នៅពេលកម្ពុជាអនុវត្តកិច្ចព្រមព្រៀងពាណិជ្ជកម្មនេះ  ការនាំចេញរបស់កម្ពុជា នឹងកើនបាន៧,៣ភាគរយ។  ការវិនិយោគ នឹងកើនឡើង ២៣,៤ភាគរយ  និងផលិតផលក្នុងស្រុកសរុប (GDP) នឹងកើនឡើងបាន២ភាគរយ។

លោក ប៉ាន សូរស័ក្តិ  បានអះអាងដូច្នេះ៖ «កិច្ចព្រមព្រៀងនេះ នឹងរួមចំណែកយ៉ាងចាំបាច់ដល់ការស្តារសេដ្ឋកិច្ចឡើងវិញរបស់កម្ពុជា និងប្រទេសសមាជិកពាក់ព័ន្ធ ក្នុង និងក្រោយវិបត្តិកូវីដ-១៩ ព្រមទាំងជះឥទ្ធិពលវិជ្ជមានផ្សេងទៀតដល់ការអភិវឌ្ឍ តាមយៈការបង្កើតការងារ ការជំរុញការវិនិយោគ ការកាត់បន្ថយភាពក្រីក្រ និងការលើកកម្ពស់ការទទួលបានផលប្រយោជន៍ប្រកបដោយបរិយាប័ន្នខ្ពស់»។ 

 

បើតាមរដ្ឋមន្ត្រីពាណិជ្ជកម្ម RECP ត្រូវបានបង្កើតឡើងជាក្របខណ្ឌគតិយុត្តទំនើបថ្មី ដែលជំរុញការធ្វើកំណែទម្រង់ទាំងផ្នែកហេដ្ឋារចនាសម្ព័ន្ធ ច្បាប់-គតិយុត្ត និងស្ថាប័ន ដើម្បីធានាស្តង់ដារខ្ពស់របស់កម្ពុជានាពេលអនាគត ស្របពេលដែលកម្ពុជា អាចនឹងចាកចេញពីប្រទេសអភិវឌ្ឍតិចតួចនៅឆ្នាំ២០២៨ និងគ្រោងប្រែក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលកម្រិតខ្ពស់នៅឆ្នាំ២០៥០ ប្រកបដោយប្រសិទ្ធភាព។

 

ជាមួយគ្នានេះ លោក ហ៊ីដេតូស៊ី នីស៊ីមូរ៉ា ប្រធានវិទ្យាស្ថាន ERIA បានលើកឡើងថា RECP ពិតជាមានសារសំខាន់ខ្លាំង ក្នុងការពង្រឹងឡើងវិញនូវប្រព័ន្ធពហុភាគីនិយម, របបពាណិជ្ជកម្មអន្តរជាតិដែលផ្អែកលើវិធានច្បាប់ និងយុទ្ធនាការស្តារសេដ្ឋកិច្ច របស់ប្រទេសក្នុងតំបន់ដែលរងគ្រោះពីវិបត្តិកូវីដ-១៩។ លើសពីនេះ កិច្ចព្រមព្រៀងអាសិប(RECP) ក៏បានធានាតម្លៃនៃមជ្ឈភាពអាស៊ាន ក្នុងការសម្របសម្រួលជាមួយដៃគូពាណិជ្ជកម្មសំខាន់ៗ និងការដាក់ចេញនូវទិសដៅសកម្មភាពនានា ក្រោមកិច្ចព្រមព្រៀងនេះផងដែរ។ នេះបើតាមការចុះផ្សាយរបស់ក្រសួងពាណិជ្ជកម្ម៕