ជាតិ
ចៅក្រមស៊ើបសួរសម្រេច ដោះលែងសហជីពណាហ្គាវើលដ៍៣រូបទៀត ឱ្យនៅក្រៅឃុំបណ្ដោះអាសន្ន រូបពីទំព័រហ្វេសប៊ុករបស់សាលាដំបូងរាជធានីភ្នំពេញ
× ភ្នំពេញ៖ ចៅក្រមស៊ើបសួរ បានសម្រេចដោះលែងមេដឹកនាំសហជីព៣រូបទៀត ឲ្យនៅក្រៅឃុំបណ្ដោះអាសន្ន នៅរសៀលថ្ងៃទី១៧ មីនានេះ ។ សហជីព៣រូបនេះ រួមមានលោក សេង វណ្ណារិទ្ធ លោក សៅ សម្បត្តិ និងលោកជួប ចាន់ណាត ។
លោក ឃុន ថារ៉ូ អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស របស់អង្គការសង់ត្រាល់ បានឲ្យសារព័ត៌មានថ្មីៗដឹងថា មេធាវីរបស់មេសហជីពទាំង៣ កំពុងធ្វើដំណើរទៅពន្ធនាគាររាជធានីភ្នំពេញ (PJ) ក្រោយទទួលបានសេចក្ដីសម្រេចពីចៅក្រម។
«ចៅក្រមស៊ើបសួរតុលាការរាជធានីភ្នំពេញ បានចុះហត្ថលេខាសម្រេចដោះលែងសហជីពណាហ្គាវើលដ៍ (LRSU) ៣នាក់នៅពីពន្ធនាគារ PJ មានលោក ចាន់ណាត, លោក សម្បត្តិ និងលោក វណ្ណារិទ្ធ។ ដូច្នេះមេធាវីធ្វើដំណើរទៅកាន់ពន្ធនាគារ PJ ជាមួយនឹងឯកសារនេះ»។ លោក ឃុន ថារ៉ូ ប្រាប់សារព័ត៌មានថ្មីៗដូច្នេះ តាមប្រព័ន្ធតេឡេក្រាម។
ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឲ្យដោះលែងមេដឹកនាំសហជីពទាំង៣រូបនេះ ក្រោមការជួយអន្តរាគមន៍ពីក្រសួងការងារ និងបណ្ដុះបណ្ដាលវិជ្ជាជីវៈ ។ ការដោះលែងនេះ វាក៏ជាផ្នែកមួយនៃការបង្កើតបរិយាកាសចរចា រវាងបុគ្គលិក និងក្រុមហ៊ុនណាហ្គាវើលដ៍ ដើម្បីឈានទៅបញ្ចប់វិវាទ ដែលអូសបន្លាយពេលជាច្រើនខែមកហើយ។
សូមជម្រាបថា កាលពីថ្ងៃទី១៤មីនា មេដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ (LRSU) ៨រូប ត្រូវបានចៅក្រមស៊ើបសួរសម្រេចដោះលែង។ មេដឹកនាំសហជីពដែលបានដោះលែងទាំង៨រូប មាន ឈឹម ស៊ីថរ, រី សុវណ្ណឌី, ស៊ុន ស្រីពេជ្រ, ហៃ សុភាព, ឃ្លាំង សុបិន្ត, ទូច សិរីមាស, សុខ ណារិទ្ធ និង ឈឹម សុខន៕
© រក្សាសិទ្ធិដោយ thmeythmey.com