ជាតិ
នយោបាយជាតិ
នាយករដ្ឋមន្រ្តីជប៉ុន មកបំពេញទស្សនកិច្ចនៅកម្ពុជា នៅថ្ងៃ២០មីនា លោក គីស៊ីដា ហ៊្វូមិអូ នាយករដ្ឋមន្រ្តីជប៉ុន (រូបពី AFP)
× លោក គីស៊ីដា ហ៊្វូមិអូ (Kishida Fumio) នាយករដ្ឋមន្រ្តីជប៉ុន នឹងមកបំពេញទស្សនកិច្ចនៅកម្ពុជា រយៈពេល២ថ្ងៃ គឺថ្ងៃទី២០ និងថ្ងៃទី២១ ខែមីនា ឆ្នាំ២០២២។ លោក នឹងមានជំនួបជាមួយសម្តេចនាយករដ្ឋមន្រ្តី ហ៊ុន សែន។
ក្រសួងការបរទេសកម្ពុជា សរសេរក្នុងសេចក្តីប្រកាសព័ត៌មាន ដែលចេញផ្សាយនៅថ្ងៃទី១៧ ខែមីនា ឆ្នាំ២០២២នេះ ថា សម្តេចនាយករដ្ឋមន្រ្តី ហ៊ុន សែន និង លោកនាយករដ្ឋមន្រ្តី គីស៊ីដា ហ៊្វូមិអូ នឹងជជែកគ្នាពីកិច្ចសហប្រតិបត្តិការកម្ពុជា-ជប៉ុន លើវិស័យនានា រួមមាន ពាណិជ្ជកម្ម ការវិនិយោគ ការអប់រំ ហេដ្ឋារចនាសម្ព័ន្ធ ការពារជាតិ សន្តិសុខ និងការស្តារសេដ្ឋកិច្ច-សង្គមឡើងវិញ នៅក្រោយការចប់វិបត្តិជំងឺកូវីដ-១៩។ ជាមួយគ្នានេះ នាយករដ្ឋមន្រ្តីទាំង២ នឹងធ្វើសន្និសីទកាសែតរួមគ្នា។
ក្រៅពីនេះ លោកនាយករដ្ឋមន្រ្តីជប៉ុន នឹងអញ្ជើញទៅដាក់កម្រងផ្កាគោរពព្រះវិញ្ញាណក្ខន្ធព្រះបាទ នរោត្តម សីហនុ អតីតព្រះមហាក្សត្រកម្ពុជា នៅរូបសំណាករបស់ទ្រង់ ហើយលោក នឹងបន្តអញ្ជើញទៅគោរពវិញ្ញាណក្ខន្ធនៅមណ្ឌបមន្រ្តីជប៉ុន២រូប ដែលបាត់បង់ជីវិតនៅកម្ពុជា កាលពីជំនាន់អ៊ុនតាក់។
ក្រសួងការបរទេសកម្ពុជា ចាត់ទុកដំណើរទស្សនកិច្ចរបស់នាយករដ្ឋមន្រ្តីជប៉ុន ថាជាការបង្ហាញឲ្យឃើញច្បាស់ពីការប្តេជ្ញាចិត្តយ៉ាងមោះមុតនៃប្រទេសទាំង២ ក្នុងការពង្រឹងទំនាក់ទំនងល្អជាមួយគ្នា៕
Tag:
កម្ពុជា-ជប៉ុន
Kishida Fumio
© រក្សាសិទ្ធិដោយ thmeythmey.com