ជាតិ
សង្គមជាតិ
សៀវភៅស្តីពីលោក ឃីម សុខហេង នឹងចេញផ្សាយជា៤ភាសាក្នុងពេលឆាប់ៗខាងមុខនេះ
× ភ្នំពេញ៖ អនុស្សាវរីយ៍ ការសប្បាយ ការឈឺចាប់ រឿងរ៉ាវតស៊ូក្នុងភាពក្រីក្រ រឿងរ៉ាវស្នេហា ជីវិតជំនួញ ភាពជោគជ័យ ការចែករំលែក សកម្មភាពមនុស្សធម៌…។ ទាំងអស់នេះ គឺជាសាច់រឿងដែលត្រូវបានរំលេចនៅក្នុងសៀវភៅកម្រាស់ជាង២០០ទំព័រ ជាភាសាខ្មែរ បារាំង អង់គ្លេស និងភាសាចិន។ ជាបុគ្គលដែលផ្តល់តម្លៃខ្លាំងលើចំណេះវិជ្ជា និងប្រើប្រាស់ចំណេះវិជ្ជាដើម្បីចាកចេញពីរណ្តៅនៃភាពក្រីក្រ លោក ឃីម សុខហេង ចង់ចែករំលែកបទពិសោធន៍ជីវិត និងការតស៊ូក្នុងនាមជាកូនកសិករទៅកាន់យុវជនដទៃទៀតតាមរយៈសៀវភៅរបស់លោក។
កើតក្រោយជំនាន់ប៉ុលពត ពោលនៅដើមទសវត្សរ៍៨០ លោក ឃីម សុខហេង បានចំណាយពេលដ៏ច្រើនធ្វើការនៅតាមវាលស្រែក្រោមកម្តៅថ្ងៃ និងដំណក់ទឹកភ្លៀង មុននឹងក្លាយទៅជាបុគ្គលអន្តរជាតិម្នាក់។ «ជីវិតពីគ្មានស្បែកជើងពាក់ត្រឹមត្រូវក្នុងវាលស្រែ ប្រែមកជាវាគ្មិននៅលើវេទិកាអន្តរជាតិ»។ នេះ គឺជាដំណើរជីវិតដ៏វែងឆ្ងាយរបស់លោក ឃីម សុខហេង ជាកូនកសិករក្រីក្រកើតនៅក្នុងខេត្តព្រៃវែង ដែលជាខេត្តមួយធ្លាប់ក្រីក្រយ៉ាងខ្លាំងនៅក្នុងប្រទេសកម្ពុជា។
អ្នកនិពន្ធជនជាតិបារាំងលោក Pierre Gillette អតីតនិពន្ធនាយកសារព័ត៌មានបារាំង Cambodge Soir និងលោក គី សុខលីម សហស្ថាបនិកនៃសារព័ត៌មានអេឡិចត្រូនិកថ្មីៗ(Thmeythmey.com) ជាភាសាខ្មែរ និង Cambodianess.com ជាភាសាអង់គ្លេស បានពន្យល់ថា បើនិយាយពីបរិបទនៅក្នុងប្រទេសកម្ពុជា និងស្ថានភាពប្រទេសកម្ពុជា ក្រោយរបបប៉ុលពត តួអង្គដែលមានដំណើរជីវិតលំបាកលំបិនស្រដៀងលោក ឃីម សុខហេង អាចមានចំនួនច្រើននាក់។ ប៉ុន្តែ លោកមានលក្ខណៈពិសេសផ្សេងដែលអនុញ្ញាតឲ្យអ្នកនិពន្ធសម្រេចចិត្តលើកយកតួអង្គរបស់គាត់មកធ្វើជាតំណាងឲ្យយុវជនដទៃទៀតដែលកើតក្រោយជំនាន់ប៉ុលពត ហើយបានតស៊ូឆ្លងកាត់ឧបសគ្គជាច្រើនទម្រាំរូបលោកបានឈានមកដល់ដំណាក់កាលមួយប្រសើរជាងមុន ទាំងនៅលើឆាកជាតិ និងអន្តរជាតិ។
សៀវភៅជាង២០០ទំព័រនេះ និយាយពីជីវិតកុមារភាពរបស់លោក ឃីម សុខហេង ដែលមានឪពុកម្តាយជាអ្នកមិនសូវមានចំណេះ និងក្រីក្រនៅក្នុងខេត្តព្រៃវែង។ តស៊ូសិក្សារៀនសូត្រជាមួយក្តីសង្ឃឹមជានិច្ច ហើយនៅទីបញ្ចប់ តាមរយៈចំណេះវិជ្ជា លោក ឃីម សុខហេង បានប្រែក្លាយជីវភាពក្រីក្ររបស់លោកឲ្យទៅជាគ្រួសារធូរធាក្នុងសង្គមបច្ចុប្បន្ន។ សៀវភៅមួយក្បាលនេះ ទាំងតួអង្គលោកផ្ទាល់ ទាំងអ្នកនិពន្ធ ចង់បង្ហាញថា ទោះក្រីក្រយ៉ាងណា ទោះលំបាកយ៉ាងណា ទោះបុគ្គលនោះមកពីប្រភពណាក៏ដោយ ឲ្យតែមានការអំណត់ ការតស៊ូព្យាយាម គង់តែថ្ងៃណាមួយ បុគ្គលនោះ អាចចាកចេញពីរណ្តៅនៃភាពក្រីក្រ។
ជាបុគ្គលដែលផ្តល់តម្លៃខ្លាំងលើចំណេះវិជ្ជា និងប្រើប្រាស់ចំណេះវិជ្ជាដើម្បីចាកចេញពីភាពក្រីក្រ លោក ឃីម សុខហេង ចង់ចែករំលែកបទពិសោធន៍ជីវិត និងការតស៊ូក្នុងនាមជាកូនកសិករទៅកាន់យុវជនដទៃទៀតតាមរយៈសៀវភៅរបស់លោក។ លោក ឃីម សុខហេង ផ្សងព្រេង«ស្មុំ»ចំណេះពីមនុស្សគ្រប់គ្នានៅជុំវិញខ្លួនគាត់ក្នុងគ្រាលំបាក រួចហើយប្រើប្រាស់ចំណេះរបស់ខ្លួនដើម្បីចែករំលែក និងដើម្បីបង្កើតប្រាក់កាសសម្រាប់គ្រួសារ និងសហគមន៍។
ក្រៅពីដំណើរជីវិតតស៊ូក្នុងការសិក្សា សៀវភៅដដែលនេះ ក៏និយាយផងដែរពីចំណុចចាប់ផ្តើមនៃសេចក្តីសេ្នហារបស់លោកក្នុងវ័យសិក្សាជាមួយភរិយាលោកសព្វថ្ងៃ។
លោក នួន សុថេរ៉ូ និងលោក កៃ គីមសុង សហស្ថាបនិកនៃក្រុមហ៊ុនបោះពុម្ពផ្សាយសៀវភៅលោក ឃីម សុខហេង Amazadia Education បានបញ្ជាក់ថា សៀវភៅស្តីពីដំណើរជីវិតតស៊ូរបស់លោក ឃីម សុខហេង មិនត្រឹមតែចង់ចែករំលែកទៅកាន់អ្នកអានជាជនជាតិខ្មែរទេ តែទៅកាន់ជនជាតិដទៃ តាមរយៈភាសាចិន បារាំង និងអង់គ្លេស៕
© រក្សាសិទ្ធិដោយ thmeythmey.com