ប្រទេសកម្ពុជាកំពុងត្រឡប់ទៅរកភាពប្រក្រតី ដែលធ្វើឱ្យវិស័យទេសចរណ៍ងើបឡើងវិញ។ ដើម្បីសម្រួលដល់ការធ្វើដំណើររបស់ភ្ញៀវបរទេស រាជរដ្ឋាភិបាលមិនតម្រូវឱ្យអ្នកដំណើរ ដែលចាក់វ៉ាក់សាំងបង្ការជំងឺកូវីដ-១៩ពេញលេញ មានលិខិតបញ្ជាក់ការធ្វើតេស្តPCR និងធ្វើតេស្តរហ័សពេលមកដល់កម្ពុជាឡើយ ចាប់ពីថ្ងៃទី១៧ ខែមីនា ឆ្នាំ២០២២ ។ 
 

ជុំវិញការសម្រេចនេះ លោក តុប សុភ័ក អ្នកនាំពាក្យ និងជារដ្ឋលេខាធិការក្រសួងទេសចរណ៍ រំពឹងខ្ពស់ថាកម្ពុជានឹងមានលទ្ធភាពប្រជែងយកទេសចរអន្តរជាតិ ព្រោះប្រទេសក្នុងតំបន់មិនទាន់បានបើកប្រទេសទទួលទេសចរ ដោយមិនតម្រូវ ការធ្វើតេស្តនោះទេ ។ លើសពីនេះកម្ពុជា មានហានិភ័យនៃការឆ្លងជំងឺកូវីដ-១៩ទាប។


 លោក តុប សុភ័ក រដ្ឋលេខាធិការនិងជាអ្នកនាំពាក្យក្រសួងទេសចរណ៍ ក្នុងកម្មវិធីវាទិការទេសចរណ៍អាស៊ាន។ រូបភាពពីហ្វេសប៊ុករបស់លោក

រដ្ឋលេខាធិការក្រសួងទេសចរណ៍រូបនេះ រៀបរាប់ប្រាប់សារព័ត៌មានThmeyThmey25 តាមទូរស័ព្ទដូច្នេះ៖ « ការដកលក្ខខណ្ឌនេះ ស្របតាមផែនការទេសចរណ៍វ៉ាក់សាំង ជាការប្រកួតប្រជែងមួយ ព្រោះប្រទេសក្នុងតំបន់មិនទាន់ធ្វើបានដូចកម្ពុជាទេ ហើយប្រទេសមួយចំនួនទៀតនៅរឹតបន្តឹងវិធានសុវត្ថិភាពនៅឡើយ។ តែប្រទេសខ្លះទៀតក៏កំពុងរៀបចំបើកប្រទេសទាំងមូលដែរ តែមិនអាចបើកបានភ្លាមៗទាំងអស់ទេ ដូច្នេះកម្ពុជាបើកមុន ជាឱកាសនៃការប្រកួតប្រជែងខ្ពស់ »។ 
 

លោក តុប សុភ័ក បន្តថា អាជីវករក្នុងវិស័យទេសចរណ៍មួយចំនួនធំបានបើកអាជីវកម្មឡើងវិញ ដោយអាជីវករមួយចំនួនកំពុងត្រៀមខ្លួនផ្ដល់សេវាកម្មដល់ទេសចរអន្តរជាតិ ជាពិសេសអ្នករកស៊ីនៅខេត្តគោលដៅទេសចរណ៍សំខាន់ៗ ដូចជាខេត្តព្រះសីហនុ សៀមរាប និងរាជធានីភ្នំពេញជាដើម។ 
 

តាមរយៈការដកលក្ខខណ្ឌធ្វើតេស្តPCRមុន ៧២ម៉ោង និង ការធ្វើតេស្តរហ័សពេលមកដល់កម្ពុជា អ្នករកស៊ីក្នុងវិស័យទេសចរណ៍បានបង្ហាញការគាំទ្រ ជាមួយនឹងក្ដីរំពឹងពីកំណើនទេសចរអន្តរជាតិ។ លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA ) យល់ថាផែនការនេះធ្វើឱ្យកម្ពុជាអាចទទួលទេសចរបានពេញលេញឡើងវិញ ព្រោះចាប់តាំងពីខែវិច្ឆិកាមក ទេសចរអន្តរជាតិចូលមកកម្ពុជាមានតិចតួចនៅឡើយ ដោយសាររនាំងនៃឯកសារផ្សេងៗ។
 

ប្រធានCATA រូបនេះ រំពឹងខ្ពស់ពីកំណើនទេសចរអន្តរជាតិ ក្នុងឆ្នាំ២០២២នេះ។ « យើងរំពឹងថាភ្ញៀវអន្តរជាតិនឹងកើនឡើងរហូតដល់ ៣០ភាគរយ។ តែយើងក៏ត្រូវមានជើងហោះហើរសម្បូបែបសម្រាប់ទេសចរ ទើបគេមកកម្សាន្តនៅកម្ពុជា។ សម្រាប់វិស័យឯកជនក៏ត្រូវត្រៀមខ្លួនទាំងសេវាកម្ម និង ផលិតផល កុំឱ្យមានព័ត៌មានមិនល្អពីកម្ពុជា »។ នេះជាការលើកឡើងរបស់លោកស្រី ឆាយ ស៊ីវលីន។
 

ទាក់ទងនឹងបញ្ហាការខ្វះខាតជើងហោះហើរ លោក ស៊ីន ចាន់សេរីវុត្ថា អ្នកនាំពាក្យអាកាសចរណ៍ស៊ីវិលកម្ពុជា បានប្រាប់សារព័ត៌មានThmeyThmey25 ថា ជើងហោះហើរពីប្រទេសក្នុងតំបន់អាស៊ី ជាពិសេសប្រទេសអាស៊ានបានកើនឡើងជាបន្តបន្ទាប់ ចាប់តាំងពីកម្ពុជាបានប្រកាសបើកប្រទេសលើកដំបូង។ លើសពីនេះ រដ្ឋាភិបាលបានដកលក្ខខណ្ឌធ្វើតេស្ត PCR និងតេស្តរហ័ស លោក ស៊ីន ចាន់សេរីវុត្ថា ជឿថាជើងហោះហើរនឹងបន្តកើនឡើង តែលោកមិនអាចសន្និដ្ឋានពីចំនួនជើងហោះហើរភ្លាមៗនោះទេ។
 

អ្នកនាំពាក្យអាកាសចរណ៍ស៊ីវិលកម្ពុជារូបនេះបញ្ជាក់ដូច្នេះ៖ « ជាធម្មតាជើងហោះហើរនឹងកើនឡើងហើយ តែយើងមិនអាចវាសវែងបានទេ ត្រូវការមួយខែ ឬពីរខែបានដឹង។ អ្នកដំណើរត្រូវរៀបចំផែនការ កក់សំបុត្រ និងកម្មវិធីធ្វើដំណើររបស់ពួកគាត់។ ប៉ុន្តែការព្យាកររបស់យើងគឺផលវិជ្ជមាន នៃការធ្វើដំណើរចូលមកកម្ពុជា។ ខែមីនានេះជើងហោះហើរកើនឡើង ៣-៤ជើងទៀត ហើយនៅពេលយើងប្រកាសបើកបែបនេះទៀត វានឹងអាចកើនលើសពីនេះទៀត»។
 

ក្រៅពីកំណើនជើង ហោះហើរ តម្លៃសំបុត្រយន្តហោះក៏នឹងអាចទាបជាងមុនផងដែរ ព្រោះនៅពេលក្រុមហ៊ុនជើងហោះហើរបើកច្រើនវិញ អ្នកដំណើរកើនឡើង នោះតម្លៃសំបុត្រយន្តហោះនឹងមានការប្រកួតប្រជែង។ នេះជាការបន្ថែមរបស់លោក ស៊ីន ចាន់សេរីវុត្ថា។
 

បច្ចុប្បន្នអាកាសយាន្តដ្ឋានភ្នំពេញ ទទួលបានជើងហោះហើរច្រើនជាងគេ។ ចំណែកអាកាសយាន្តដ្ឋានខេត្តសៀមរាប ទទួលបានជើងហោះហើរពីប្រទេសសឹង្ហបុរីជាប្រចាំ ដោយមួយថ្ងៃមួយជើង និងមានជើងហោះពីប្រទេសថៃ និងក្នុងស្រុកមួយសប្តាហ៍ ពីរជើង។ ដោយឡែកអាកាសយាន្តដ្ឋានកងកេង ក្នុងខេត្តព្រះសីហនុទទួលបានជើងហោះហើរពីក្រៅប្រទេសតិចតួចប៉ុណ្ណោះ។
 

យ៉ាងណាមិញ បើតាមលោក តុប សុភ័ក រដ្ឋលេខាធិការក្រសួងទេសចរណ៍ ក្នុងមួយថ្ងៃភ្ញៀវទេសចរអន្តរជាតិប្រមាណ ១ពាន់អ្នកបានចូលមកកម្ពុជា ដោយភាគច្រើនមកតាមជើងហោះហើរប្រទេសសឹង្ហបុរី និង ភ្ញៀវក្នុងតំបន់អាស៊ាន។ កាលពីខែកុម្ភៈកន្លងទៅអ្នកដំណើរអន្តរជាតិចូលមកកម្ពុជា ប្រមាណ ៤ម៉ឺន ៦ពាន់នាក់។ ក្រសួងទេសចរណ៍ក៏កំពុងធ្វើការជាមួយដៃគូពាក់ព័ន្ធ និងស្នើអគ្គរាជទូតថ្មីមួយចំនួន ដែលប្រចាំនៅប្រទេសកម្ពុជា ឱ្យជំរុញជើងហោះហើរត្រង់មកកម្ពុជាដែរ។


 លោក ស៊ីន ចាន់សេរីវុត្ថា អ្នកនាំពាក្យអាកាសចរណ៍ស៊ីវិល ។ រូបភាពពីអង្គភាពអ្នកនាំពាក្យរដ្ឋាភិបាល

ដោយឡែកការទទួលទេសចរអន្តរជាតិ ដោយមិនតម្រូវឯកសារធ្វើតេស្ត PCR និង តេស្តរហ័ស ក្រសួងទេសចរណ៍ អះអាងថានឹងមិនមានបញ្ហាប្រឈមច្រើននោះទេ ព្រោះ រដ្ឋាភិបាលបានគិតគូរហ្មត់ចត់ហើយពីផែនការនេះ។ លោក តុប សុភ័ក បញ្ជាក់ដូច្នេះ៖ « រាជរដ្ឋាភិបាលបានប្រជុំ គិតល្អិតល្អន់រួចហើយ មុននឹងកែតម្រូវលក្ខខណ្ឌធ្វើដំណើរ។ យើងជឿថាពេលកែប្រែលក្ខខណ្ឌនឹងអាចនាំចូលនៃមេរោគបំប្លែងថ្មីមកកម្ពុជាទៀត ប៉ុន្តែក្រមខណ្ឌពិភពលោកមានអត្រាឆ្លងកូវីដ-១៩ ៩៩ភាគរយហើយនៃប្រភេទអូមីក្រុងរួចទៅហើយ ។ តែបើសិនមានមេរោគអ្វីថ្មីទៀត យើងជឿថា រដ្ឋាភិបាលនឹងពិចារណាតាមស្ថានភាព  ដើម្បីការងើបឡើងវិញនៃកំណើនសេដ្ឋកិច្ចជាតិ »។
 

សូមជម្រាបផងដែរថា គិតត្រឹមថ្ងៃទី ២៤មីនា កម្ពុជាមានករណីឆ្លងជំងឺកូវីដ-១៩ សរុប ១៣៥ ៣៤៤ករណី ក្នុងនោះករណីនាំចូលពីក្រៅប្រទេសចំនួន ២១ ២០៣ករណី ។ អ្នកជាសះស្បើយសរុប ១៣១ ៣១៣ករណី និងស្លាប់សរុបមាន ៣ ០៥៤ករណី ៕