អន្តរជាតិ
តំបន់ប៉ូលខាងជើង និងខាងត្បូង ឡើងកម្តៅខ្លាំងខុសពីធម្មតា ទ្វីបអង់តាក់ទិក។ រូបភាព៖ Unsplash
× ក្នុងឆ្នាំ ២០២២ តំបន់ទឹកកកនៅប៉ូលខាងជើង និងខាងត្បូងផែនដី មានសីតុណ្ហភាពក្តៅខ្លាំងខុសពីធម្មតា។ នៅពេលតំបន់អាក់ទិកចូលដល់រដូវផ្ការីក វាបានកើនកម្ដៅក្តៅជាងធម្មតា ៥០ហ្វារិនហៃ ឬ១០អង្សាសេ។ ចំណែកឯពេលតំបន់អង់តាក់ទិកខិតជិតដល់រដូវស្លឹកឈើជ្រុះ វាមានកម្ដៅលើសពីធម្មតា ៧០ ហ្វារិនហៃឬ ២១អង្សាសេឯណោះ។ ការកើនឡើងកម្ដៅបែបនេះ បណ្ដាលឱ្យទឹកកកតំបន់ប៉ូលរលាយយ៉ាងខ្លាំង ដែលធ្វើឱ្យកើនឡើងកម្ពស់ទឹកសមុទ្រសកល។
តំបន់ប៉ូលខាងជើង និងខាងត្បូង ត្រូវបានកត់ត្រាថាមានកម្ដៅកើនឡើងខ្លាំងខុសពីធម្មតា ចាប់ពីដើមខែមីនា ឆ្នាំ២០២២មក។ នៅពេលតំបន់អង់តាក់ទិក ខិតជិតដល់រដូវស្លឹកឈើជ្រុះ វាមានកម្ដៅលើសពីធម្មតា ៧០ហ្វារិនហៃ ឬ ២១អង្សាសេឯណោះ។ នេះគឺជារឿងមិនប្រក្រតីមួយ ព្រោះជាធម្មតាតំបន់អង់តាក់ទិក មានសីតុណ្ហភាពត្រជាក់ខ្លាំងដល់ទាបជាងសូន្យប្រហែល -៤៥ ទៅ -៥១អង្សា ហើយឥឡូវវាមានសីតុណ្ហភាពឡើងដល់ក្បែរសូន្យ។
ជាក់ស្ដែងនៅបឹងVostok នៃតំបន់អង់តាក់ទិកធ្លាប់តែមានសីតុណ្ហភាពប្រហែល -៥២អង្សា បានឡើងសីតុណ្ណភាពមកនៅ -១៧អង្សា ដែលជាកំណត់ត្រាខ្ពស់បំផុត។ ចំណែកនៅស្ថានីយ៍ស្រាវជ្រាវ Concordia សីតុណ្ហភាពបានប្រែប្រួលមកនៅត្រឹម -១២អង្សា ខណៈកន្លងមកតំបន់នេះមានសីតុណ្ហភាពត្រជាក់ដល់ -៤៨អង្សាឯណោះ។ នេះបើតាមរបាយការណ៍របស់ទីភ្នាក់ងារព័ត៌មាន AP។
ស្របគ្នានេះ នៅពេលតំបន់អាក់ទិកចូលដល់រដូវផ្ការីក វាបានកើនកម្ដៅក្តៅជាងកម្រិតសីតុណ្ហភាពធម្មតា ៥០ហ្វារិហៃ ឬ១០អង្សា។ តំបន់អាក់ទិកបានឡើងកម្ដៅលឿនជាងការប៉ាន់ស្មានជាមធ្យមរបស់ពិភពលោកប្រហែល ២ទៅ៣ដងរួចមកហើយដោយសារវិបត្តិអាកាសធាតុ។ នៅមហាសមុទ្រអាត្លង់ទិកថ្មីៗនេះ ក៏បានរងឥទ្ធិពលខ្យល់ក្ដៅដែលផាត់ចេញពីកោះហ្គ្រោអង់ឡង់នៃតំបន់អាក់ទិកដែរ។
គួរបញ្ជាក់ថា ការកើនឡើងកម្ដៅខ្លាំងនៅតំបន់ប៉ូលទាំងពីនេះជាព្រឹត្តិការណ៍មិនធ្លាប់មាន ហើយវាជាលទ្ធផលនៃវិបត្តិបម្រែបម្រួលអាកាសធាតុ។ ការកើនឡើងកម្ដៅបែបនេះនឹងធ្វើឱ្យទឹកកកតំបន់ប៉ូលរលាយលឿនជាងការរំពឹងទុក ហើយធ្វើឱ្យកម្ពស់ទឹកសមុទ្រកើនឡើង ដែលជាកត្តាបង្កើនហានិភ័យនៃទឹកជំនន់នៅក្នុងប្រទេសឆ្នេរសមុទ្រទូទាំងពិភពលោក។ មិនត្រឹមតែបង្កើនកម្ពស់ទឹកសមុទ្រប៉ុណ្ណោះទេ ការរលាយទឹកកកក៏បានរំខានដល់ប្រព័ន្ធជីវចម្រុះក្នុងមហាសមុទ្រទឹកកក ដែលជាប្រភពអាហាររបស់ជនជាតិដើមរស់នៅទីនោះថែមទៀត៕
Tag:
បម្រែបម្រួលអាកាសធាតុ
© រក្សាសិទ្ធិដោយ thmeythmey.com