ភ្នំពេញ៖ ក្នុងរយៈពេល៣ខែនៃឆ្នាំ២០២២នេះ ការនាំចេញស្វាយស្រស់ តំណាប់ស្វាយ និងទឹកស៊ីរ៉ូស្វាយទៅក្រៅប្រទេស ត្រូវបានធ្លាក់ចុះ បើធៀបនឹងរយៈពេលដូចគ្នាក្នុងឆ្នាំ២០២១។ នេះបើតាមរបាយការណ៍ដែលផ្សព្វផ្សាយដោយលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២ ខែមេសាកន្លងទៅ។
កម្ពុជាបាននាំចេញផ្លែស្វាយស្រស់ចំនួន ៨១ ៤១៨,០៧តោន ក្នុងរយៈពេល៣ខែនៃឆ្នាំ២០២២នេះ ដោយបរិមាណនេះធ្លាក់ចុះ ២០,៧៣ភាគរយ ធៀបនឹងរយៈពេលដូចគ្នាក្នុងឆ្នាំ២០២១។ ក្នុងចំណោមស្វាយស្រស់ទាំងនោះ ត្រូវបាននាំចេញទៅវៀតណាមចំនួន ៤០ ៨៤៩,៧២តោន, ចិនចំនួន ២២ ២៤៤,៦៨តោន, ថៃចំនួន ១៨ ១៨១,១២តោន និងកូរ៉េចំនួន ១៤២,៥៥តោន។
បើតាមរបាយការណ៍ដែលបង្ហោះនៅទំព័រហ្វេសប៊ុករបស់លោក វេង សាខុន តំណាប់ស្វាយចំនួន ៥ ១៣៦,២៧តោន ត្រូវបាននាំចេញ ប៉ុន្តែបរិមាណនេះធ្លាក់ចុះ ១៣,៤៣ភាគរយ។ តំណាប់ស្វាយខាងលើ បាននាំចេញទៅចិនចំនួន ៤ ៤១៤,១១តោន, ថៃចំនួន ២៨៨,៤៤តោន, វៀតណាមចំនួន ២០០តោន, ហ្វីលីពីនចំនួន ១៩២,៥៥តោន, ជប៉ុនចំនួន ២៥តោន, ចក្រភពអង់គ្លេសចំនួន ៩,៧៨តោន, កូរ៉េចំនួន ៣,៨៧តោន និងអ៊ីតាលីចំនួន ២,៥២តោន។
ក្រៅពីការនាំចេញផ្លែស្វាយស្រស់ និងតំណាប់ស្វាយធ្លាក់ចុះ ទឹកស៊ីរ៉ូស្វាយក៏មានការធ្លាក់ចុះក្នុងរយៈពេល៣ខែនេះផងដែរ។ របាយការណ៍ដដែល បង្ហាញថា ការនាំចេញទឹកស៊ីរ៉ូស្វាយ មានត្រឹម ៤០៣,៤២តោនប៉ុណ្ណោះ ដោយធ្លាក់ចុះដល់ ៧៥,៦៧ភាគរយ។ ទឹកស៊ីរ៉ូស្វាយ ត្រូវបាននាំចេញទៅចិនចំនួន ២៤៦តោន និងហ្វីលីពីនចំនួន ១៥៧,៤២តោន។
គួររម្លឹកថា ក្នុងរយៈពេលជាង១ខែចុងក្រោយនេះ តម្លៃស្វាយកែវរមៀតហាក់ធ្លាក់ថ្លៃខ្លាំងពី៥០០រៀល មកត្រឹម១៥០រៀលប៉ុណ្ណោះក្នុងមួយគីឡូក្រាម។ ជុំវិញបញ្ហានេះ បានធ្វើឱ្យកសិករមួយចំនួន ត្អូញត្អែរថាលក់មិនចំណេញ មិនរួចថ្លៃដើមដែលពួកគេចំណាយ ខណៈជី និងថ្នាំកសិកម្មបន្តឡើងថ្លៃ៕