៣ខែដើមឆ្នាំ២០២២ កម្ពុជាបាន​នាំចេញ​ចំណិតដំឡូងមីក្រៀមចំនួន ១ ២៥២ ៣៤០ តោន ដោយកើនឡើង ១២,៧៥ភាគរយ ធៀបនឹងរយៈពេលដូចគ្នាក្នុងឆ្នាំ​២០២១។ ក្នុងចំណោមបរិមាណនៃការនាំចេញនោះ ត្រូវ​បាន​នាំចេញទៅថៃចំនួន ៩១៩ ០៥០តោន និងវៀតណាមចំនួន ៣៣៣ ២៩០តោន។ ចំណែក​ការនាំចេញដំឡូងមីស្រស់ មាន​ការកើនឡើង ៤៥,៨១ភាគរយ ដោយមានចំនួន ៣៥៣ ៩៥០តោន។ ក្នុងនោះនាំចេញទៅវៀតណាមចំនួន ២៩៩ ០០០តោន និងថៃចំនួន ៥៤ ៩៥០តោន។
 

របាយការណ៍​បង្ហោះលើទំព័រហ្វេសប៊ុក​លោក វេង សាខុន បង្ហាញថា ម៉្សៅដំឡូងមីចំនួន ២៥ ២៦១តោន ត្រូវបាន​ចេញទៅចិនចំនួន ២៤ ៧៥៨តោន, អាម៉េរិកចំនួន ៤០៨តោន, ណេដឺឡែនចំនួន ៧៦តោន និងអ៊ីតាលីចំនួន ១៩តោន។ បរិមាណនៃការនាំចេញនេះ កើនដល់៩០,១៥ភាគរយ ធៀបនឹង​រយៈពេល៣ខែនៃឆ្នាំ២០២១។
 

ដោយឡែកការនាំចេញកាកសំណល់ដំឡូងមីវិញ រឹតតែមានកើនឡើងខ្ពស់ដល់ ១៣៩,៣២ភាគរយ។ បើតាមរបាយការណ៍ខាងលើ ក្នុងត្រីមាសទី១ ការនាំចេញកាកសំណល់ដំឡូងមី​ មានចំនួន ៦ ១២២,៨៩តោន ដែលបាននាំចេញទៅចិនចំនួន ៥ ៦២២,៨៩ តោន និងវៀតណាមចំនួន ៥០០តោន៕