ជាតិ
ក្រសួងការបរទេសអាមេរិកបញ្ជាឲ្យបុគ្គលិកខ្លួនដែលគ្មានភារកិច្ចចាំបាច់ ចាកចេញពីសៀងហៃ
×![]()
ដោយ: VOA
ក្រសួងការបរទេសសហរដ្ឋអាមេរិក បានបញ្ជាឲ្យបុគ្គលិករបស់ខ្លួនដែលគ្មានភារកិច្ចចាំបាច់នៅក្នុងទីក្រុងសៀងហៃ ត្រូវចាកចេញពីទីក្រុងនៅភាគខាងកើតរបស់ចិនមួយនេះ ដែលកំពុងទប់ទល់នឹងការផ្ទុះឡើងនៃករណីឆ្លងថ្មីៗជាច្រើននៃជំងឺកូវីដ១៩។
បទបញ្ជារបស់ក្រសួងការបរទេសអាមេរិកកាលពីថ្ងៃចន្ទ កើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីក្រសួងនេះ បានប្រកាសឲ្យបុគ្គលិករបស់ខ្លួនអាចចាកចេញដោយស្ម័គ្រចិត្តពីស្ថានកុងស៊ុលអាមេរិកនៅក្នុងទីក្រុងសៀងហៃ។
«ការផ្លាស់ប្តូរគោលជំហររបស់យើង កើតមានឡើងដោយយោងទៅលើការវាយតម្លៃរបស់យើងដែលថា វាមានសារៈសំខាន់ក្នុងការកាត់បន្ថយចំនួនបុគ្គលិកនិងក្រុមគ្រួសាររបស់ពួកគេ ហើយប្រតិបត្តិការរបស់យើង ក៏នឹងអាចត្រូវបានកាត់បន្ថយផងដែរ ដោយយោងទៅលើកា លៈទេសៈផ្លាស់ប្តូរជាក់ស្តែងនៅទីនេះ»។ នេះបើតាមការបញ្ជាក់នៅក្នុងសេចក្តីថ្លែងការមួយរបស់ស្ថានកុងស៊ុលអាមេរិកនៅក្នុងទីក្រុងសៀងហៃ ដែលត្រូវបានបង្ហោះនៅលើគេហទំព័រស្ថានទូត និងកុងស៊ុលអាមេរិកនានានៅក្នុងប្រទេសចិន។
ពលរដ្ឋចិនចំនួន២៦លាននាក់ដែលកំពុងរស់នៅក្នុងទីក្រុងសៀងហៃ ត្រូវបានបញ្ជាឲ្យស្ថិតនៅក្នុងផ្ទះចាប់តាំងពីដើមខែមេសាមកជាការទប់ទល់ទៅនឹងការឆ្លងជំងឺកូវីដ១៩ថ្មីដែលកំពុងមានសន្ទុះខ្លាំងដែលភាគច្រើនជាការឆ្លងដោយសារវីរុសបំប្លែងថ្មីអូមីក្រុងដែលមានលក្ខណៈឆ្លងយ៉ាងឆាប់រហ័ស។ ការឆ្លងថ្មីប្រមាណជាង២៧.០០០ករណីដែលត្រូវបានគេរកឃើញកាលពីថ្ងៃចន្ទនៅក្នុងប្រទេសចិនទាំងមូលនោះ គឺភាគច្រើនត្រូវបានគេរកឃើញនៅក្នុងទីក្រុងសៀងហៃនេះ។
ការបិទខ្ទប់ទីក្រុងទាំងមូល បានធ្វើមានការត្អូញត្អែយ៉ាងខ្លាំងពីសំណាក់ពលរដ្ឋចិននៅក្នុងទីក្រុងសៀងហៃនៅតាមបណ្តាញអនឡាញ ដោយសារតែការខ្វះម្ហូបអាហារស្រស់ៗ ជាពិសេសបន្លែហើយហាងលក់គ្រឿងទេសនានា ត្រូវបានទ្វារ ដែលធ្វើឲ្យពលរដ្ឋចិននៅទីនោះមិនអាចបញ្ជាទិញតាមប្រព័ន្ធអនឡាញបាន។ ការខឹងសម្បារពីសំណាក់ពលរដ្ឋក្នុងទីក្រុងសៀងហៃ បានធ្វើឲ្យពួកគេស្រែកឡូឡាចេញតាមបង្អួចផ្ទះរបស់គេដែលស្ថិតនៅលើអគារខ្ពស់កាលពីថ្ងៃសៅរ៍សប្តាហ៍មុន ហើយដែលត្រូវគេថតបាននិងបង្ហោះយ៉ាងព្រោងព្រាតនៅលើបណ្តាញសង្គមភ្លាមៗ៕
ព័ត៌មានខ្លះនៃសេចក្តីរាយការណ៍នេះ ដកស្រង់ពីទីភ្នាក់ងារព័ត៌មាន AP AFP និង Reuters។
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 9 ម៉ោង
