សម្តេច ហ៊ុន សែន ស្នើឱ្យពលរដ្ឋពាក់ម៉ាស់ និងទៅទទួលវ៉ាក់សាំងដូសជំរុញ

ជាតិ

សម្តេច ហ៊ុន សែន ស្នើឱ្យពលរដ្ឋពាក់ម៉ាស់ និងទៅទទួលវ៉ាក់សាំងដូសជំរុញ

15, Apr 2022 , 9:39 am

រូបភាព

ដោយ: សារព័ត៌មានថ្មីៗ

សម្តេច ហ៊ុន សែន បានអំពាវនាវឱ្យប្រជាពលរដ្ឋដែលដើរលេងកម្សាន្តយ៉ាងកុះករ ក្នុងអំឡុងចូលឆ្នាំខ្មែរនេះ ពាក់ម៉ាស់ឱ្យខ្ជាប់ខ្ជួន ក៏ដូចជាអនុវត្តវិធានការ«៣កុំ និង៣ការពារ» ដើម្បីបង្ការការឆ្លងជំងឺកូវីដ-១៩។

តាមរយៈសំឡេងជាង ៧នាទីនៅតាមប្រព័ន្ធតេឡេក្រាម នៅព្រឹកថ្ងៃទី១៥ មេសានេះ ប្រមុខរដ្ឋាភិបាល ក៏ទទូចឱ្យពលរដ្ឋឆ្លៀតទៅចាក់វ៉ាក់សាំងដូសជំរុញឱ្យបានច្រើន នៅក្នុងអំឡុងបុណ្យចូលឆ្នាំនេះដែរ ខណៈតួលេខនៃអ្នកដែលទៅទទួលវ៉ាក់សាំងមានចំនួនតិចតួច។ សម្តេច ហ៊ុន សែន ជឿជាក់ថា ក្រោយពិធីបុណ្យប្រពៃណីនេះ អត្រានៃអ្នកបានចាក់វ៉ាក់សាំងដូសជំរុញ មានកំណើនខ្ពស់ ដែលនឹងធ្វើឱ្យសហគមន៍កាន់តែមានភាពស៊ាំនឹងជំងឺកូវីដ-១៩។

ក្រៅពីស្នើពលរដ្ឋការពារខ្លួនពីកូវីដ-១៩ សម្តេចនាយករដ្ឋមន្ត្រីក៏មិនភ្លេចអំពាវនាវទៅដល់អាជ្ញាធរ និងកងកម្លាំងប្រដាប់អាវុធគ្រប់លំដាប់ បង្កើនការការពារសន្តិសុខ សុវត្ថិភាពសម្រាប់ពលរដ្ឋដែលដើរកម្សាន្ត។ ទន្ទឹមនឹងនេះ ប្រមុខរដ្ឋាភិបាលក៏ទទូចឱ្យពលរដ្ឋទាំងអស់ ចូលរួមគោរពច្បាប់ចរាចរណ៍ឱ្យម៉ឹងម៉ាត់ ដើម្បីកាត់បន្ថយអត្រាគ្រោះថ្នាក់ចរាចរណ៍ ក្នុងអំឡុងពេលដ៏រីករាយនេះ៕