ពិធីបុណ្យចូលឆ្នាំខ្មែរនៅកម្ពុជាក្រោម រៀបចំក្នុងសភាពអ៊ូអរ ដូចនៅកម្ពុជាដែរ

ជាតិ

ពិធីបុណ្យចូលឆ្នាំខ្មែរនៅកម្ពុជាក្រោម រៀបចំក្នុងសភាពអ៊ូអរ ដូចនៅកម្ពុជាដែរ

15, Apr 2022 , 11:20 am

រូបភាព

ដោយ ៖ ធន់ សេងហុង

បុណ្យចូលឆ្នាំខ្មែរនៅទឹកដីកម្ពុជាក្រោម ត្រូវបានរៀបចំឡើងដូចនៅប្រទេសកម្ពុជាដែរ។ ប្រជាពលរដ្ឋ សិស្ស និស្សិត និងកម្មករខ្មែរក្រោម ដែលធ្វើការនៅទីក្រុងបានត្រលប់ទៅស្រុកកំណើត ដើម្បីជួបជុំគ្រួសារ រៀបចំសម្អាតផ្ទះសម្បែង រៀបរណ្ដាប់សែនព្រេន ត្រៀមទទួលទេវតាឆ្នាំថ្មីនៅតាមផ្ទះ និងតាមទីវត្តអារាមនានា។

ពលរដ្លខ្មែរកម្ពុជាក្រោម បានប្រារព្ធពិធីបុណ្យចូលឆ្នាំថ្មី ដូចគ្នានឹងពេលានៅកម្ពុជាដែរ ហើយល្បែងប្រជាប្រិយនានាដូចជា បោះអង្គញ់ ចោលឈូង ទាញព្រ័ត្រ លាក់កន្សែង ជាដើម ក៏ត្រូវបានប្រជាពលរដ្ឋខ្មែរក្រោម លេងកម្សាន្ត នៅតាមបណ្តាវត្តអារាមនានា ក្នុងវេលាចូលឆ្នាំថ្មីនេះដែរ។

ពលរដ្ឋខ្មែរក្រោម មានជំនឿលើរឿង កបិលមហាព្រហ្ម កាត់សិរសា ព្រោះចាញ់ប្រស្នាធម្មបាលកុមារដែរ ទើបបង្កើតឲ្យមានទេវតា៧អង្គ ផ្លាស់វេនគ្នា ចុះមកផែនដី ដើម្បីគ្រងថែរក្សាមនុស្សជាតិ។ នៅកម្ពុជាក្រោម ពិធីបុណ្យចូលឆ្នាំថ្មី គេមិនហៅថា សង្ក្រាន្តឆ្នាំថ្មីទេ គេហៅថា ថ្ងៃឆ្លងចូលឆ្នាំថ្មី។

ជារៀងរាល់ឆ្នាំ ពលរដ្ឋខ្មែរក្រោមភាគច្រើន តែងតែណាត់គ្នាទទួលទេវតាឆ្នាំថ្មី នៅតាមវត្តអារាម។ នៅវេលាទេវតាចុះ ខ្មែរក្រោម ធ្វើពិធីសូត្រមន្តទទួលទេវតា។ ថ្ងៃទី១ ដែលជាថ្ងៃឆ្លងឆ្នាំ គេតែងជួបជុំគ្នាទទួលទេវតា ព្រសង្ឃសម្ដែងព្រះបរិត្ត ពូនភ្នំខ្សាច់ លេងល្បែងប្រជាប្រិយ។ ថ្ងៃចូលឆ្នាំ ទី២ គឺវារៈវ័នបត ពលរដ្ឋខ្មែរក្រោម នាំគ្នាធ្វើពិធីងូតទឹកជូនឪពុកម្ដាយ តាមផ្ទះរៀងៗខ្លួន ហើយពួកគេបន្តទៅវត្ត ធ្វើពិធីងូតទឹកប្រគេន ព្រះគ្រូចៅអធិការ និងតាជី យាយជី នៅក្នុងវត្តអារាម។ ឯថ្ងៃចូលឆ្នាំ ទី៣ ជាថ្ងៃឡើងស័ក ពលរដ្ឋខ្មែរក្រោមនាំគ្នា ធ្វើពិធីស្រង់ព្រះពុទ្ធបដិមា តាមវត្តពេលរសៀល៕