​ក្នុងរបាយការណ៍របស់ក្រសួងទេសចរណ៍ នៅថ្ងៃចូលឆ្នាំ និងថ្ងៃអាទិត្យ ចាប់ពីថ្ងៃទី១៤-១៧ មេសា ខេត្តនៅតំបន់សមុទ្រ ទទួលបានទេសចរ ៧៤៤ ៦៤៩នាក់ ក្នុងនោះទេសចរបរទេសផ្ទៃក្នុងមាន ២០ ៤៦០នាក់​។ ខេត្តកំពតទទួលបានទេសចរចំនួន ២៨៤ ៨៩៣នាក់, ខេត្តព្រះសីហនុ មានទេសចរ ២៦៤ ៨០៣នាក់, ខេត្តកែបមានភ្ញៀវ ១៥៦ ៦៤៤នាក់ និងខេត្តកោះកុងមានភ្ញៀវចំនួន ៣៨ ៨០៤នាក់។ 
  

កំណើនភ្ញៀវទេសចរនេះ បានធ្វើឱ្យកន្លែងកម្សាន្តមួយចំនួនមនុស្សច្រើនកុះករ ដែលនាំឱ្យកន្លែងស្នាក់នៅត្រូវបានខ្វះសម្រាប់ទទួលភ្ញៀវ ខណៈផ្លូវចូលកន្លែងកម្សាន្តខ្លះកកស្ទះខ្លាំង។ យ៉ាងណាមិញ ការកើនឡើងចំនួនទេសចរនៅខេត្តកោះកុង ក៏កើនឡើងដោយសារព្រឹត្តិការណ៍សង្ក្រាន្តផងដែរ។ ចំណែកខេត្តកំពត កែប និងព្រះសីហនុ ដ្បិតមិនមានព្រឹត្តិការណ៍សង្ក្រាន្តធំដុំដូចខេត្តដទៃ ប៉ុន្តែទេសចរ និងប្រជាជនក្នុងខេត្តក៏បានរាំលេងនៅទីរួមខេត្ត ខណៈទេសចរមួយផ្នែកទៀតចេញដើរតាមរមណីយដ្ឋាន​ និងតាមកោះ។
 

សូមជម្រាបដែរថា ទេសចរ ដើរកម្សាន្តទូទាំងប្រទេសជាង ៥លាននាក់ ក្នុងរយៈពេល៤ថ្ងៃ គឺថ្ងៃចូលឆ្នាំខ្មែរ និងថ្ងៃអាទិត្យ។ ខេត្តបាត់ដំបង កំពង់ចាម បន្ទាយមានជ័យ សៀមរាប និងព្រៃវែង ទទួលបានទេសចរច្រើនជាងគេ ។ នេះបើតាមរបាយការណ៍ពីក្រសួងទេសចរណ៍៕