លោក លី រស្មី បានរៀបរាប់ប្រាប់សារព័ត៌មាន ThmeyThmey25ថា ខេត្តព្រះសីហនុ បានដាក់តាំងរូបសំណាកចំនួន៣រួចមកហើយ ក្នុងនោះមានរូបបដិមាព្រះឧមា-មហេសូរ កម្ពស់៩ម៉ែត្រ ធ្វើពីស្ពាន់ ដាក់តាំងនៅចំណុចប្រសព្វ រវាងឆ្នេររាម និងមហាវិថីរាម។ រូបសំណាកទី២ គឺរូបសីហរាជមុខ៣ កម្ពស់៩ម៉ែត្រ នៅចំណុចប្រសព្វផ្លូវជាតិលេខ៤ និងវិថីជោតិញាណ។ រូបសំណាកទី៣ គឺរូបសំណាកព្រះថោង នាងនាគ កម្ពស់២១ម៉ែត្រ ស្ថិតនៅចំណុចប្រសព្វនៃមហាវិថីឆ្នេររាម និងមហាវិថីជំទាវម៉ៅ។ 


 រូបសំណាកព្រះថោង នាងនាគ ។ រូបភាព៖ រដ្ឋបាលខេត្តព្រះសីហនុ

ជុំវិញការដំឡើងរូបសំណាកធំៗធ្វើពីស្ពាន់ ជាបន្តបន្ទាប់ នៅខេត្តព្រះសីហនុត្រូវបាន លោក លី រស្មី ពន្យល់ថា គឺដើម្បីផ្សារភ្ជាប់វប្បធម៌ ក្នុងទីក្រុងបែបទំនើប។ លោក លី រស្មី បញ្ជាក់ដូច្នេះ៖ «ខេត្តព្រះសីហនុ ជាទីក្រុងបែបទំនើប ហើយត្រូវបានរដ្ឋាភិបាល ចាត់ទុកជាទីក្រុងសេដ្ឋកិច្ចពិសេសពហុបំណង។ ដូច្នេះយើងត្រូវផ្សារភ្ជាប់ព្រលឹងជាតិ នៅក្នុងទីក្រុងទំនើបនេះ ដើម្បីឱ្យមានអត្តសញ្ញាណជាតិ និងបង្ហាញថា នេះជាទីក្រុងក្នុងប្រទេសកម្ពុជា។ មួយវិញទៀត រូបសំណាកទាំងនេះ ធ្វើឱ្យយើងដឹងពីវប្បធម៌ អរិយធម៌ខ្មែ »។ 
  

ក្រៅពីរូបសំណាកទាំង៣នេះ រដ្ឋបាលខេត្តព្រះសីហនុ ក៏កំពុងត្រៀមដាក់តាំងរូបសំណាកមួយទៀត គឺរូបព្រះស្កន្ទកម្ពស់ ៦,៦៨ម៉ែត្រ នៅខែកក្កដាខាងមុខនេះដែរ។ រូបសំណាកត្រូវបានធ្វើឡើងក្នុងប្រទេសកម្ពុជា បានប្រមាណ៧០ភាគរយហើយ គ្រោងនឹងដាក់នៅទីលានតេជោ។
 

បើតាម លោក លី រស្មី ថវិកាដែលបានចំណាយលើការធ្វើរូបសំណាកទាំង៤នេះ គឺអស់ជាង ២លានដុល្លារ។ រូបសំណាកព្រះសីហរាជមុខ៣ ព្រះឧមា-មហេសូរ និងរូបសំណាកព្រះថោង នាងនាគ ត្រូវបានធ្វើពុម្ពនៅស្រុកខ្មែរហើយ ចាក់ស្ពាន់នៅប្រទេសចិន។ ចំណែករូបព្រះស្កន្ទ ត្រូវបានធ្វើទាំងស្រុងនៅកម្ពុជា។ នេះជាការបន្ថែមរបស់លោក លី រស្មី៕