ជាតិ
សេដ្ឋកិច្ច
ក្រុមហ៊ុនចិន បញ្ចប់ការសិក្សាគម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ លោក ស៊ុន ចាន់ថុល រួមគណៈប្រតិភូក្រុមហ៊ុនសាជីវកម្មស្ពានថ្នល់ចិនកំពុងទស្សនាវីដេអូនៃគម្រោងផ្លូវនាវាចរណ៍ និងប្រព័ន្ធភ័ស្តុភារកម្មទន្លេបាសាក់។
× ភ្នំពេញ៖ ក្រុមហ៊ុនសាជីវកម្មស្ពានថ្នល់ចិន (CRBC) បានបញ្ចប់ការសិក្សាសមិទ្ធិលទ្ធភាព (Feasibilty Study) នៃគម្រោងផ្លូវនាវាចរណ៍ និងប្រព័ន្ធភ័ស្តុភារកម្មទន្លេបាសាក់។ ការបញ្ចប់នៃគម្រោងនេះ ត្រូវបានលើកឡើងនៅក្នុងជំនួបពិភាក្សាការងាររវាងលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន ជាមួយគណៈប្រតិភូក្រុមហ៊ុនសាជីវកម្មស្ពានថ្នល់ចិន តំណាងឱ្យក្រុមហ៊ុន CCCC Transportation Consultants Co., Ltd តាមរយៈប្រព័ន្ធវីដេអូពីចម្ងាយ នាថ្ងៃទី២២មេសា។
គម្រោងផ្លូវនាវាចរណ៍ និងប្រព័ន្ធភ័ស្តុភារកម្មទន្លេបាសាក់ នឹងធ្វើឱ្យប្រសើរឡើងនូវ ការដឹកជញ្ជូនតាមផ្លូវទឹក និងភស្តុភារកម្ម។ នេះបើយោងតាមក្រសួងសាធារណការនិងជញ្ជូន ដែលបានស្រង់សម្តីរបស់ លោក ស៊ុន ចាន់ថុល មកចុះផ្សាយ ដោយបញ្ជាក់ថា គម្រោងនេះក៏ធ្វើឱ្យប្រសើរឡើងនូវបណ្តាញផ្លូវទឹករបស់កម្ពុជាឱ្យមានការតភ្ជាប់គ្នា ដោយរលូន និងផ្ដល់ផលប្រយោជន៍ដល់សេដ្ឋកិច្ចជាតិ ជួយជំរុញឱ្យមានការដឹកជញ្ជូនតាមផ្លូវទឹកច្រើនជាងការដឹកជញ្ជូនតាមផ្លូវគោក ផងដែរ។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។ រូបថត៖ MPWT
រដ្ឋមន្ត្រីក្រសួងសាធារណការរូបនេះ រៀបរាប់ថា កម្ពុជាសម្បូរទៅដោយបណ្ដាញផ្លូវទឹកទន្លេ ដូចជា ទន្លេមេគង្គ បឹងទន្លេសាប ទន្លេបាសាក់ ទន្លេសេកុង ទន្លេសេសាន ទន្លេស្រែពក ប៉ុន្តែ កម្ពុជាមិនទាន់បានទាញយកសក្កានុពលដ៏ធំធេងនៃធនធានធម្មជាតិទាំងអស់នោះមកប្រើប្រាស់ឱ្យបានក្នុងកម្រិតអតិបរមានៅឡើយទេ។ ដូច្នេះ គម្រោងផ្លូវនាវាចរណ៍ និងប្រព័ន្ធភស្តុភាកម្មទន្លេ បាសាក់នេះ លោក ស៊ុន ចាន់ថុល សង្ឃឹមថាវានឹងធ្វើឱ្យការដឹកជញ្ជូនតាមផ្លូវទឹករបស់កម្ពុជាមានការផ្លាស់ប្ដូរជាវិជ្ជមាន។
បើតាមលោក ស៊ុន ចាន់ថុល គម្រោងត្រូវបញ្ចប់សិក្សាដោយក្រុមហ៊ុនសាជីវកម្មស្ពានថ្នល់ចិន រួមជាមួយក្រុមហ៊ុន CCCC Transportation Consultants៕
Tag:
ភស្តុភារកម្ម
ទន្លេបាសាក់
© រក្សាសិទ្ធិដោយ thmeythmey.com