កីឡាអន្តរជាតិ
អន្តរជាតិ
Chiellini នឹងចូលនិវត្តន៍ពីក្រុមជម្រើសជាតិអ៊ីតាលី ក្រោយប្រកួតពាន Finalissima
× ខ្សែការពារ Giorgio Chiellini នឹងចូលនិវត្តន៍ពីអាជីពកីឡាករបាល់ទាត់ជាមួយក្រុមជម្រើសជាតិអ៊ីតាលី ក្រោយបញ្ចប់ការប្រកួតដណ្តើមពាន Finalissima 2022 រវាងម្ចាស់ជើងឯកអឺរ៉ុប Euro ជាមួយអាហ្សង់ទីន ដែលជាម្ចាស់ជើងឯក Copa America នៅខែក្រោយ។
ខ្សែការពាររបស់ក្រុម Juventus វ័យ៣៧ឆ្នាំរូបនេះបានបង្ហាញខ្លួន១១៦ប្រកួតសម្រាប់ក្រុមជម្រើសជាតិអ៊ីតាលី។ ទោះបីធ្លាប់ជួយអ៊ីតាលីលើកពាន World Cup ឆ្នាំ២០០៦ និង Euro 2020 ក្តី ប៉ុន្តែ Chiellini មិនអាចជួយក្រុមបានកៅអីទៅប្រកួតបាល់ទាត់ពិភពលោកឆ្នាំ២០២២ នៅប្រទេសកាតាឡើយ។
Chiellini បានប្រាប់កាសែត DAZN បន្ទាប់ពី Juventus យកឈ្នះ Sassuolo ២-១ ក្នុងជំនួប Serie A នៅរាត្រីថ្ងៃទី២៥ ខែមេសាថា រូបគេសូមលាក្រុមជម្រើសជាតិហើយ។ «ខ្ញុំនឹងចូលនិវត្តន៍ពីក្រុមជម្រើសជាតិអ៊ីលីនៅ Wembley ក្រោយជំនួបជាមួយក្រុមអាហ្សង់ទីនរួច»។
Chiellini ដែលបានបង្ហាញខ្លួនជាលើកដំបូងឱ្យអ៊ីតាលីក្នុងឆ្នាំ ២០០៤ ជាតួអង្គសំខាន់ក្នុងការរួមចំណែកជួយអ៊ីតាលីឈ្នះអង់គ្លេស ដោយស៊ុតបាល់ប៉េណាល់ទីក្នុងវគ្គផ្តាច់ព្រ័ត្រ Euro ឆ្នាំ២០២០។
ខ្សែការពារក្រុមសេះបង្កង់រូបនេះ ជាប់ចំណាត់ថ្នាក់ទី៥ក្នុងបញ្ជីកីឡាករ ដែលលេងច្រើនជាងគេបំផុតសម្រាប់អ៊ីតាលីជាមួយនឹង Andrea Pirlo ដោយតាមពីក្រោយមិត្តរួមជាតិ Daniele de Rossi, Paolo Maldini, Fabio Cannavaro និង Gianluigi Buffon។
ដោយឡែក សម្រាប់អាជីពជាមួយ Juventus វិញ Chiellini ប្រាប់ថា នៅមានរយៈពេលវែងទៅមុខទៀត តាមដែលអាចធ្វើទៅបាន ទោះសព្វថ្ងៃមានវ័យ៣៧ឆ្នាំហើយក្តី។
«ស្នេហារបស់ខ្ញុំជាមួយ Juventus មិនទាន់ចប់ទេ វានឹងមិនងាយចប់ទេ»។ ពិតណាស់ ចាប់ពីពេលនេះរហូតដល់ចប់រដូវកាល ខ្ញុំនឹងនិយាយជាមួយគ្រួសាររបស់ខ្ញុំ ដើម្បីបន្តអាជីពជាមួយក្លិបយក្សអ៊ីតាលីបន្តទៀត»។ Chiellini បន្ថែមដូច្នេះ។
Chiellini ត្រួវរួមដំណើរជាមួយអ៊ីតាលីទៅកាន់កីឡដ្ឋាន Wembley ដើម្បីតតាំងជាមួយអាហ្សង់ទីនក្នុងការប្រកួតមិត្តភាព Finalissima 2022 ក្នុងនាមម្ចាស់ជើងឯកទ្វីបអឺរ៉ុប Euro និងអាម៉េរិកខាងត្បូង Copa America នៅថ្ងៃទី១ ខែឧសភា៕
Tag:
Giorgio Chiellini
Finalissima
© រក្សាសិទ្ធិដោយ thmeythmey.com