លោក ថោង ខុន បានថ្លែងក្នុងពិធីសំណេះសំណាលជាមួយប្រតិភូកីឡាកម្ពុជាថា ការបញ្ជូនអត្តពលិកទៅប្រកួតស៊ីហ្គេមនៅវៀតណាមនេះ មានលក្ខណៈទ្រង់ទ្រាយធំជាងពេលមុនៗ សម្រាប់ការប្រកួតក្នុងក្របខ័ណ្ឌយុទ្ធសាស្ដ្រ ក្នុងការវាយតម្លៃវាស់ស្ទង់ និងផ្ទៀតផ្ទាត់សមត្ថភាព និងគុណផលកីឡារបស់អត្តពលិកជម្រើសជាតិកម្ពុជា ដើម្បីប្រមូលទិន្នន័យ សម្រាប់វិភាគលើភាពខ្លាំង និងខ្សោយពួកគេ។ 
 

បើតាមប្រធានគណៈកម្មាធិការជាតិអូឡាំពិកកម្ពុជារូបនេះ ព្រឹត្តិការណ៍ស៊ីហ្គេមលើកទី៣១ នៅវៀតណាម ជាឱកាសល្អសម្រាប់កម្ពុជា ក៏ដូចជាមន្ដ្រីកីឡាប្រចាំសហព័ន្ធកីឡាជាតិ និងមន្ដ្រីជំនាញ ទទួលបានបទពិសោធន៍ក្នុងការអនុវត្ត និងរៀបចំការប្រកួតស៊ីហ្គេមនៅកម្ពុជា។ ជាពិសេសពង្រឹងសមត្ថភាព អត្តពលិក ឲ្យបានមុតស្រួច ឆ្ពោះទៅរកឧត្តមភាពបច្ចេកទេសកីឡា ក្នុងការប្រកួតស៊ីហ្គេម នាឆ្នាំ២០២៣ ។ 
 

កម្ពុជា នឹងបញ្ជូន ប្រតិភូកីឡាសរុប៥៦០នាក់ ក្នុងនោះថ្នាក់ដឹកនាំ និងមន្ត្រីកីឡាចំនួន ៤៥នាក់, កីឡាករ-កីឡាការិនីចំនួន ៣៦៣នាក់, គ្រូបង្វឹក-គ្រូជំនួយចំនួន ៩៣នាក់, អាជ្ញាកណ្ដាលចៅក្រមអន្តរជាតិចំនួន ១៦នាក់, អ្នកដឹកនាំក្រុមចំនួន២២នាក់ និងក្រុមគ្រូពេទ្យចំនួន ២១នាក់ ដើម្បីចូលរួមស៊ីហ្គេមលើកទី៣១។
 

គួរបញ្ជាក់ថា វៀតណាម ត្រូវធ្វើម្ចាស់ផ្ទះស៊ីហ្គេមនេះ នៅឆ្នាំ២០២១ តែដោយសារបញ្ហារីករាលដាលកូវីដ-១៩ ទើបវៀតណាមសុំលើកពេល មកធ្វើនៅអំឡុងខែឧសភា ឆ្នាំ២០២២វិញ។ វៀតណាមបានរៀបចំកីឡា៤០ប្រភេទ និង៥២៦វិញ្ញាសា សម្រាប់ប្រទេស ដែលជាសមាជិកសហព័ន្ធកីឡាអាស៊ីអាគ្នេយ៍ចូលរួមប្រកួត៕