ជាតិ
សង្គមជាតិ
ប៉ូលិសចរាចរណ៍ម្នាក់រងពិន័យ៤សែនរៀល ក្រោយបើកបរទាំងស្រវឹង និងជ្រុលចង្កូតបុករបងទីសាធារណៈ
× មន្រី្តប៉ូលីសចរាចរណ៍ម្នាក់ដែលមិនត្រូវបានបញ្ចេញឈ្មោះជាសាធារណៈ ត្រូវបានសមត្ថកិច្ចនាំទៅអប់រំ និងពិន័យចំនួន៤សែនរៀល ក្រោយមន្ត្រីរូបនេះ បានបើកបរក្រោមស្ថានភាពស្រវឹង ហើយជ្រុលចង្កូតបុករបងសាលាថែទាំវេជ្ជសាស្ត្រ ខណ្ឌបឹងកេងកង រាជធានីភ្នំពេញ។
តាមរយៈទំព័រហ្វេសប៊ុករបស់ខ្លួន ស្នងការនគរបាលរាជធានីភ្នំពេញ បានបំភ្លឺថា មន្រី្តប៉ូលីសចរាចរណ៍ដែលបង្កគ្រោះថ្នាក់ចរាចរណ៍កាលពីយប់ថ្ងៃទី២៧ ខែមេសា គឺជាករណីបុគ្គល។ មន្ត្រីបង្កហេតុរូបនេះ ត្រូវបានសមត្ថកិច្ចនៃការិយាល័យចរាចរណ៍ផ្លូវគោក នាំទៅធ្វើការផាកពិន័យតាមច្បាប់។
កាលពីយប់ថ្ងៃទី២៧មេសា ម៉ោងប្រមាណ២២យប់ នៅចំណុចកែងផ្លូវលេខ២៧១ លើផ្លូវ១៨៣ ស្ថិតក្នុងសង្កាត់ទំនប់ទឹក ខណ្ឌបឹងកេងកង មន្រី្តប៉ូលីសម្នាក់បានបង្កគ្រោះថ្នាក់ចរាចរណ៍ដោយបើករថយន្តក្រោមស្ថានភាពស្រវឹង។ ករណីនេះ នាំឲ្យរថយន្តបុរសនោះ ទៅបុកនឹងរបងសាលាថែទាំវេជ្ជសាស្ត្រ។
ក្នុងការស្រាយបំភ្លឺរបស់ខ្លួន ស្នងការដ្ឋាននគរបាលជាតិលើបណ្ដាញសង្គម បានបង្ហាញរូបភាពនៃការធ្វើកិច្ចសន្យានិងអមជាមួយរូបប័ណ្ណពិន័យដែលមានចំនួនទឹកប្រាក់៤សែនរៀល។ អនុក្រឹត្យ ស្តីពីការពិន័យអន្តរការណ៌ចំពោះអំពើល្មើសនឹងច្បាប់ចរាចរណ៌ផ្លូវគោក មាត្រា១០ថ្មីចែងថាអ្នកបើកបររថយន្តធុនស្រាលក្នុងភាពស្រវឹង ដែលមានអត្រាជាតិអាល់កុល ចាប់ពី០,៤០ មីលីក្រាម ក្នុងមួយលីត្រខ្យល់ នឹងត្រូវពិន័យ២លានរៀល ហើយរថយន្តធុនធ្ងន់នឹងរងពិន័យ៤លានរៀល។
យ៉ាងណាក្ដី លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានអះអាងថា សមត្ថកិច្ចបានអនុវត្តតាមច្បាប់ ហើយដាក់វិន័យកងកម្លាំងនគរបាលលើមន្រី្តរូបនេះ។
លោកថ្លែងប្រាប់សារព័ត៌មានថ្មីៗតាមប្រព័ន្ធតេឡេក្រាមយ៉ាងដូច្នេះ៖ «នៅថ្ងៃនេះ យើងអនុវត្តផាកពិន័យ ណែនាំអប់រំ ធ្វើកិច្ចសន្យា និងដាក់ពិន័យកងកម្លាំង។ ហើយទាក់ទងនឹងច្បាប់ផាកពិន័យ គេមិនបានផ្ដោតតែលើឡានតូចឡានធំទេ គឺគេភ្ជាប់ជាមួយគ្នា មានឡានតូច ឡានធំ ហើយកម្រិតនៃសារធាតុស្រវឹងទៀត។ អ៊ីចឹង គេផ្ដោតលើការវាស់ជាក់ស្ដែង ហើយគេពិន័យទៅតាមហ្នឹង»៕
© រក្សាសិទ្ធិដោយ thmeythmey.com