សៀវភៅ «ក្តីសង្ឃឹម ហ៊ុន ម៉ានី» ជាស្នាដៃនិពន្ធរបស់លោក លាង ដឺលុច សហស្ថាបនិក និងជាចាងហ្វាង ការផ្សាយនៃសារព័ត៌មានអេឡិចត្រូនិកថ្មីៗ (ThmeyThmey.com)។ សៀវភៅនេះ រៀបរាប់អំពីការចាប់ផ្តើមប្រឡូកក្នុងវិស័យនយោបាយនិងសង្គម របស់លោក ហ៊ុន ម៉ានី ដែលចង់ឃើញប្រទេសកម្ពុជាចម្រើន ប្រជាពលរដ្ឋមានជីវភាពរុងរឿង និងយុវជនពោរពេញដោយសមត្ថភាពខ្ពស់ដែលអាចប្រកួតប្រជែងថ្នាក់តំបន់ និងពិភពលោក។
«ក្តីសង្ឃឹម ហ៊ុន ម៉ានី ជាចំណងជើងសៀវភៅ ដែលកើតចេញពីការសម្រេចចុងក្រោយ ដោយខ្ញុំយល់អំពីលោក ហ៊ុន ម៉ានី នៅពេលដែលខ្ញុំបានជួបជជែក សម្ភាសច្រើនម៉ោងជាមួយគាត់ ក៏ដូចជាជួបជាមួយអ្នកធ្លាប់ស្គាល់គាត់ និងអ្នកនៅជុំវិញគាត់»។ លោក លាង ដឺលុច បានថ្លែងបែបនេះនៅក្នុងសន្នីសីទសារព័ត៌មានផ្សព្វផ្សាយ សៀវភៅនៅការិយាល័យសារព័ត៌មានថ្មីៗ នាព្រឹកថ្ងៃទី២៨ ខែមេសា។
លោក លាង ដឺលុច បានចំណាយពេលពីរឆ្នាំក្នុងការសរសេរសៀវភៅកម្រាស់ជាង២៥០ទំព័រនេះ បន្ទាប់ពីគំនិតចងក្រង ស្រាវជ្រាវ និងសម្ភាសលោក ហ៊ុន ម៉ានី ជាបន្តបន្ទាប់ ក្រោយលោកក្លាយជាតំណាងរាស្ត្រខេត្តកំពង់ស្ពឺ ពីឆ្នាំ២០១៣ មក។
សៀវភៅ «ក្តីសង្ឃឹម ហ៊ុន ម៉ានី» បង្ហាញអំពីបុគ្គលិកលក្ខណៈរបស់លោក ហ៊ុន ម៉ានី ដែលសម្រេចចិត្តចូលប្រឡូក នយោបាយតាមគន្លងឪពុករបស់ខ្លួន។ លើសពីនេះ លោក ដឺលុច ក៏សរសេរអំពីឥទ្ធិពលរបស់អ្នកនយោបាយបន្តវេនរូបនេះ ទៅលើយុវជនកម្ពុជា ក្នុងឆន្ទៈដែលជួយធ្វើឱ្យកម្ពុជារីកចម្រើន និងមានអធិបតេយ្យភាពពេញលេញនៅលើឆាកអន្តរជាតិ។
ក្រៅពីជាកូនប្រុសពៅរបស់សម្តេចនាយករដ្ឋមន្ត្រី សម្តេច ហ៊ុន សែន លោក ហ៊ុន ម៉ានី ក៏ជាឥស្សរជនមួយរូប ដែលមានឥទ្ធិពលខ្លាំងក្នុងការដឹកនាំចលនាយុវជន និងនយោបាយ ផងដែរ។ នេះជាហេតុផលចម្បងមួយដែល លោក លាង ដឺលុច សម្រេចជ្រើសរើសតួអង្គ លោក ហ៊ុន ម៉ានី ក្នុងការសរសេរសៀវភៅ ជាស្នាដៃដំបូងរបស់ខ្លួនឡើង។
«ក្តីសង្ឃឹម ហ៊ុន ម៉ានី» ជាក្តីសង្ឃឹមមួយដែលមានមហិច្ឆតាខ្ពស់ តែបើនិយាយភាសាទូលាយ គឺជាក្តីសង្ឃឹមរបស់លោក ហ៊ុន ម៉ានី ដែលចង់ឃើញកម្ពុជារីកចម្រើន និងមានអធិបតេយ្យនៅក្នុងក្របខណ្ឌអន្តរជាតិ ដែលគេគោរពទទួលស្គាល់ និងជាក្តីសង្ឃឹមដែលចង់ឃើញពលរដ្ឋកម្ពុជាមានជីវភាព រុងរឿងរីកចម្រើនដូចគ្នា។ យុវជន ជំនាន់ក្រោយមានឱកាសទទួលបានការអប់រំប្រកបដោយគុណភាពចេះដឹង ហើយមានសមត្ថភាព ប្រកួតប្រជែង ជាមួយពលរដ្ឋដទៃទៀត។ បើតាមលោក ដឺលុច ទាំងនេះ គឺជាទិដ្ឋភាពរួមដែលបង្ហាញពី ក្តីសង្ឃឹម ហ៊ុន ម៉ានី។
លើសពីនេះ ក្តីសង្ឃឹមរបស់លោក ហ៊ុន ម៉ានី គឺចង់ឃើញពលរដ្ឋខ្មែរមានចិត្តទូលាយ ដោយមិនយករឿងនយោបាយមកឈ្លោះប្រកែកគ្នាធ្វើឱ្យប្រទេសជាតិបែកបាក់។ អ្នកនិពន្ធ បានបន្តថា៖ «ដើម្បីសម្រេច គោលដៅទាំងហ្នឹង [លោក ហ៊ុន ម៉ានី] គឺត្រូវមានការងារដែលត្រូវធ្វើចាប់តាំងពេលនេះទៅ។ អ៊ីចឹង! ដូច្នេះ តើគាត់ត្រូវធ្វើអ្វីខ្លះ នៅក្នុងក្របខណ្ឌនយោបាយផង សង្គមផង ជាទិដ្ឋភាពបែបវិជ្ជមានដើម្បីអនាគតកម្ពុជា?»។ ក្តីសង្ឃឹម ហ៊ុន ម៉ានី ហ្នឹង ខ្ញុំអាចនិយាយបានថា គឺជាគំនិតសុទិដ្ឋិនិយមតែម្តងដែលជាមធ្យាបាយដែលគិតទៅធ្វើឱ្យគាត់មានសេចក្តីសប្បាយចិត្តក្នុងការធ្វើការងារទាំងអស់ហ្នឹង ដើម្បីប្រទេសកម្ពុជា ដើម្បីប្រជាជនកម្ពុជា»។
លោក ហ៊ុន ម៉ានី អ្នកនយោបាយបន្តវេន ជាអ្នកមានឥទ្ធិពលនៅក្នុងសង្គម ជាអ្នកចូលរួមធ្វើសេចក្តីសម្រេចចិត្ត ទាក់ទងនឹងប្រទេសកម្ពុជា ទាក់ទងនឹងជីវភាពរបស់ប្រជាពលរដ្ឋ។ សម្រាប់លោក ដឺលុច មនុស្សគ្រប់គ្នាត្រូវតែស្គាល់លោក ហ៊ុន ម៉ានី ជានរណា។ «និយាយបែបផ្សេង បើសិនលោក ហ៊ុន ម៉ានី ឡើងដល់ឆាកនយោបាយ ក្លាយជាបេក្ខជនដែលធ្វើឱ្យយើងត្រូវបោះឆ្នោតជ្រើសរើស ដើម្បីប្រទេសជាតិ ដើម្បីជីវភាពរបស់យើង ដូច្នេះយើងត្រូវតែស្គាល់ ហ៊ុន ម៉ានី»។ នេះជាការលើកឡើងរបស់អ្នកនិពន្ធ ដោយបញ្ជាក់ថានៅក្នុងសៀភៅនេះ ក្រៅតែពីស្គាល់លោក ហ៊ុន ម៉ានី ជារួមហើយនោះ ក៏ដឹងថាតើលោក ជាមនុស្សគិតជាប្រយោជន៍ផ្ទាល់ខ្លួន ប្រយោជន៍ប្រទេសជាតិ ឬប្រយោជន៍គ្រួសារ? ឬមួយ តើ លោក ហ៊ុន ម៉ានី មានសមត្ថភាពយ៉ាងដូចម្តេចនៅពេលដែលដឹកនាំការងារនយោបាយ ការងារយុវជន និងការងារសង្គម? លោក លាង ដឺលុច បានអះអាងថា៖ «នៅក្នុងសៀវភៅ«ក្តីសង្ឃឹម ហ៊ុន មានី» គឺមានការបកស្រាយនិងពន្យល់កាន់តែច្បាស់»។
អ្នកនិពន្ធសៀវភៅដែលជាសហស្ថាបនិកសារព័ត៌មានថ្មីៗរូបនេះបានបន្ថែមថា៖ «បើសិនជាមានអ្នកដែល ចាប់អារម្មណ៍នៅក្នុងវិស័យយុវជន វិស័យនយោបាយ ហើយចង់ដឹងច្រើនពីលោក ហ៊ុន ម៉ានី ខ្ញុំគិតថា សៀវភៅនេះមានសារសំខាន់ ដែលធ្វើឱ្យគាត់សម្រេចចិត្តបានថា តើគាត់ត្រូវចូលរួមជាមួយ លោក ហ៊ុន ម៉ានី ឬក៏យ៉ាងដូចម៉េច នៅក្នុងក្របខណ្ឌដោយប្រយោលឬក៏ដោយផ្ទាល់»។
សៀវភៅ«ក្តីសង្ឃឹម ហ៊ុន ម៉ានី» ដែលជាស្នាដៃដំបូងរបស់លោក លាង ដឺលុច ត្រូវបានសារព័ត៌មានថ្មីៗ បោះនៅរោងពុម្ព Diamond Printing ចំនួន១ម៉ឺនច្បាប់សម្រាប់ការបោះពុម្ពលើកទីមួយ៕