លោក យ៉ាម៉ាហ្សាគី កូជី បានប្រាប់សម្ដេច ហ៊ុន សែន ថា លោកបានជួបពិភាក្សាការងារជាមួយលោក វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ និងលោក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក អំពីកិច្ចសហប្រតិបត្តិការរយៈពេលវែងលើវិស័យការពារជាតិនេះហើយ។
 

បើតាមលោក យ៉ាម៉ាហ្សាគី កូជី កិច្ចប្រតិបត្តិការយោធានេះ គឺផ្ដោតការយកចិត្តទុកដាក់លើការហ្វឹកហ្វឺនសមយុទ្ធសម្រាប់ជំនួយមនុស្សធម៌, សង្គ្រោះបន្ទាន់ពីគ្រោះមហន្តរាយ និងទប់ស្កាត់អំពីអំពើភេរវកម្មផង និងឈានឆ្ពោះទៅទទួលបានឥណ្ឌូ-ប៉ាស៊ីហ្វិកសេរី និងបើកចំហផង។
 

សម្ដេច ហ៊ុន សែន គាំទ្រចំពោះគោលបំណងកិច្ចសហប្រតិបត្តិការរយៈពេលវែង លើវិស័យការពារជាតិនេះ។ ប្រមុខរដ្ឋាភិបាលកម្ពុជា ក៏លើកទឹកចិត្តឱ្យកងទ័ពប្រទេសទាំងពីរ បន្តកិច្ចសហប្រតិបត្តិការលើកម្មវិធីដែលមានស្រាប់ ជាពិសេសយកចិត្តទុកដាក់លើការហ្វឹកហ្វឺនរួមគ្នា ក្នុងការសង្គ្រោះបន្ទាន់ពីគ្រោះមហន្តរាយ និងទប់ស្កាត់អំពើភេរវកម្ម ដែលមាននៅក្នុងផែនការប្រតិបត្តិយោធានេះ។ នេះបើតាមហ្វេសប៊ុកសម្ដេច ហ៊ុន សែន ដែលបានស្រង់ខ្លឹមសារនៃជំនួបលោក យ៉ាម៉ាហ្សាគី កូជី (Yamazaki Koji) អគ្គសេនាធិការចម្រុះកងទ័ពស្វ័យការពារនៃប្រទេសជប៉ុន។