អន្តរជាតិ
អធិការបតីអាល្លឺម៉ង់ ទៅទស្សនកិច្ចនៅជប៉ុនក្នុងដំណើរលើកដំបូងនៅអាស៊ី អធិការបតីអាល្លឺម៉ង់ អូឡាហ្វ ស្ហូល ចាប់ដៃនាយករដ្ឋមន្រ្តីជប៉ុន គីស៊ីដា ហ្វូមីអូ។ រូបថត AFP
× អធិការបតីអាល្លឺម៉ង់លោក អូឡាហ្វ ស្ហូល នៅថ្ងៃទី២៨ ខែមេសា បានធ្វើដំណើរទស្សកិច្ចទៅកាន់ជប៉ុន ក្នុងទស្សនកិច្ចនៅតំបន់អាស៊ីជាលើកដំបូង។ មេដឹកនាំអាល្លឺម៉ង់ ចាត់ទុកជប៉ុនជាដៃគូដ៏សំខាន់មួយក្នុងតំបន់ដែលអាចធ្វើការរួមគ្នាជាមួយអាល្លឺម៉ង់បាន។ យ៉ាងណាមិញ ចិនដែលជាដៃគូពាណិជ្ជកម្មដ៏សំខាន់របស់អាល្លឺម៉ង់ មិនស្ថិតក្នុងគម្រោងទស្សនកិច្ចនេះឡើយ។
ជប៉ុន ជាគោលដៅទស្សនកិច្ចមុនគេរបស់អធិបការតីអាល្លឺម៉ង់ អូឡាហ្វ ស្ហូល ក្នុងដំណើរទស្សនកិច្ចតំបន់អាស៊ី តាំងពីបានឡើងកាន់តំណែងជាអធិការបតីអាល្លឺម៉ង់នៅចុងឆ្នាំ២០២១ មក។ ទំនាក់ទំនងទ្វេភាគី និងបញ្ហាអ៊ុយក្រែន ជាប្រធានបទសំខាន់ក្នុងជំនួបរវាងលោក ស្ហូល និងនាយករដ្ឋមន្រ្តីជប៉ុន គីស៊ីដា ហ្វូមីអូ ។
«វាមិនមែនជារឿងចៃដន្យទេដែលការធ្វើដំណើរលើកដំបូងរបស់ខ្ញុំក្នុងនាមជាអធិការបតីមកកាន់តំបន់នេះ ហើយបានមកកាន់ទីក្រុងតូក្យូ»។ អធិការបតីអាល្លឺម៉ង់បានសង្កត់ធ្ងន់ បែបនេះរួចបន្តថា ដំណើរទស្សកិច្ចរបស់់លោកបង្ហាញច្បាស់ពីសញ្ញានយោបាយរបស់អាល្លឺម៉ង់ និងសហភាពអឺរ៉ុប (EU) ដែលចង់ពង្រឹងការចូលរួមក្នុងតំបន់ឥណ្ឌូប៉ាស៊ីហ្វិក។
ក្នុងសន្និសីទកាសែតរួមគ្នា នាយករដ្ឋមន្ត្រីជប៉ុន គីស៊ីដាបានគូសបញ្ជាក់អំពីការបដិសេធរបស់ប្រទេសទាំងពីរចំពោះការលុកលុយរបស់រុស្ស៊ីលើអ៊ុយក្រែន និងបានព្រមានអំពីការប៉ុនប៉ងឈ្លានពានណាមួយដោយប្រើកម្លាំងក្នុងទ្វីបអាស៊ី។ មេដឹកនាំទាំងពីរក៏បានបញ្ជាក់ឡើងវិញពីការព្យាយាមកាត់បន្ថយការពឹងផ្អែកលើការនាំចូលថាមពលរុស្ស៊ី។
មេដឹកនាំអាល្លឺម៉ង់ ក៏ឆ្លៀតរិះគន់វិធានការរបស់ប្រធានាធិបតីរុស្ស៊ី វ្ល៉ាឌីមៀ ពូទីន ដែលចង់ស្ដារសន្តិភាពដោយប្រើកម្លាំងទ័ពនឹងមិនទទួលបានជោគជ័យនោះឡើយ។ ក្រៅពីនេះ មេដឹកនាំទាំងពីរក៏បានចែករំលែកពីការបារម្ភជាខ្លាំងជុំវិញបញ្ហានៅហុងកុង និងបញ្ហាសិទ្ធិមនុស្ស នៅតំបន់ស៊ីនជាំងជាដើម។
យ៉ាងណាមិញ លោក ស្ហូល បែរជាមិនមានគម្រោងទៅចិនដែលជាទីផ្សារដ៏ធំមួយទៅវិញ។ សមាជិកប្រតិភូដែលអមដំណើរលោក ស្ហូល លើកហេតុផលថា ចិនកំពុងចាត់វិធានការរឹតបន្តឹងយ៉ាងតឹងរ៉ឹងក្នុងការទប់ស្កាត់ជំងឺកូវីដ-១៩៕
© រក្សាសិទ្ធិដោយ thmeythmey.com