ជនភៀសខ្លួនប្រមាណ ១,០២លាននាក់ដោយរួមមាន ជនបរទេសចំនួន ១២ម៉ឺននាក់ ត្រូវបានជម្លៀសចេញពីសាធារណរដ្ឋប្រជាមានិត Donetsk និង Luhansk ដែលជាតំបន់ផ្តាច់ទឹកដីស្ថិតនៅភាគខាងកើតអ៊ុយក្រែន។ ទន្ទឹមនេះទិន្នន័យរបស់អង្គការសហប្រជាជាតិ(UN) ចាប់តាំងពីរុស្ស៊ីបើកការឈ្លានពានមកប្រជាជនច្រើនជាង៥,៤លាននាក់ បានភៀសខ្លួនចេញពីអ៊ុយក្រែនទៅកាន់ប្រទេសជិតខាង ដើម្បីស្វែងរកទីសុវត្ថិភាព។

 

ក្នុងកិច្ចសម្ភាសន៍ជាមួយទីភ្នាក់ងារ​ Xinhua ចេញផ្សាយនៅថ្ងៃទី៣០ ខែមេសា  លោក ​ឡាវរ៉ូវបានបញ្ជាក់ថា ​មនុស្សចំនួន ២,៨លាននាក់នៅអ៊ុយក្រែន​ បានស្នើសុំឱ្យជម្លៀសពួកគេចូលរុស្ស៊ី។ យ៉ាងណាក្តីកាលពីថ្ងៃទី២០ខែមេសា​​ អ៊ុយក្រែនបានចោទរុស្ស៊ី​ថាបានជម្លៀសប្រជាជនពួកគេរាប់ពាន់នាក់ដោយបង្ខំ។

 

អស់ពេលជាង ២ខែហើយដែលរុស្ស៊ីវាយលុកអ៊ុយក្រែនដោយមិនដកថយ ​ប៉ុន្តែចំណាត់ការជម្លៀសជនស៊ីវិលចេញពីតំបន់ជួរមុខមួយចំនួនដូចជាក្រុងកំពង់ផែ Mariupol ដែលត្រូវឡោមព័ន្ធនៅតែជាប់ស្ទះដោយភាគីអ៊ុយក្រែន និងរុស្ស៊ី បន្ទោសគ្នាទៅវិញទៅមក។

 

បន្ថែមពីនេះ ​លោកឡាវរ៉ូវ បានលើកឡើងថា ​បើសិនជាអាម៉េរិកនិងអង្គការណាតូ ពិតជាចង់ដោះស្រាយវិបត្តិអ៊ុយក្រែនមែន ​ពួកគេគួរតែបញ្ឈប់សកម្មភាពបញ្ជូនអាវុធទៅកាន់ក្រុងកៀវ៕