អន្តរជាតិ
ការសិក្សា៖ បំណែកប្លាស្ទិកត្រូវបានរកឃើញក្នុងជាលិកាសួតមនុស្សរស់ ជាលើកដំបូង រូបភាព៖ AP
× ថ្មីៗនេះ អ្នកវិទ្យាសាស្ត្រ បានរកឃើញបំណែកប្លាស្ទិកតូចៗនៅក្នុងសួតរបស់មនុស្សនៅរស់ជាលើកដំបូង។ ពួកគេបានកំណត់អត្តសញ្ញាណភាគល្អិតប្លាស្ទិកសរុបចំនួន៣៩ ហើយត្រូវបានរកឃើញនៅគ្រប់ផ្នែកទាំងអស់នៃសួត។ ភាគច្រើន គេបានរកឃើញសារធាតុគីមី Polypropylene ដែលប្រើដើម្បីផលិតថង់ប្លាស្ទិកសម្រាប់ការវេចខ្ចប់ និងបំពង់បឺត និង សារធាតុគីមី PET ដែលប្រើជាទូទៅសម្រាប់ផលិតដបទឹក និងភេសជ្ជៈ។
ការសិក្សាមួយ ដែលត្រូវបានចុះផ្សាយលើទិនានុប្បវត្តិ Science of the Total Environment បានបង្ហាញពីការរកឃើញបំណែកតូចៗនៃប្លាស្ទិកនៅក្នុងជាលិកាសួតរបស់មនុស្ស ដែលនៅមានជីវិត។ នេះជាការរកឃើញដំបូង ខណៈកន្លងមក ការសិក្សាបានធ្វើឡើងលើអ្នកជំងឺមហារីកសួត ឬអ្នកដែលបានស្លាប់។ ការសិក្សាបានបញ្ជាក់ថា បំណែកប្លាស្ទិកក្នុងជាលិកាសួតមនុស្សដែលមានជីវិតនោះ ស្ថិតនៅជ្រៅក្នុងសួតជាងការរំពឹងទុករបស់អ្នកស្រាវជ្រាវ។
អ្នកនិពន្ធជាន់ខ្ពស់ លោកស្រី Laura Sadofsky នៅសាលាវេជ្ជសាស្ត្រ Hull York បានប្រាប់កាសែត The Guardian ថា៖ «យើងមិនដែលរំពឹងថានឹងរកឃើញចំនួនបំណែកប្លាស្ទិកច្រើន ហើយមានទំហំធំដល់ថ្នាក់នេះ នៅក្នុងតំបន់ខាងក្រោមនៃសួតទេ»។ ផ្លូវដង្ហើមនៅផ្នែកខាងក្រោមសួតមានទំហំតូចណាស់ ដូច្នេះវាជារឿងគួរឱ្យភ្ញាក់ផ្អើលមួយដែលបំណែកប្លាស្ទិកអាចចូលទៅក្នុងសួតបាន ព្រោះជាធម្មតាវាគួរតែត្រូវបានរាំងស្ទះ។
ជាការពិត ការសិក្សាពីមុន ក៏បានរកឃើញបំណែកប្លាស្ទិកនៅក្នុងសួតមនុស្សដែរ តែវាជាការធ្វើកោសល្យវិច័យលើសាកសព។ ការសិក្សាដែលបានធ្វើឡើងឆ្នាំ ១៩៩៨ នៅអាម៉េរិក ក៏ដូចជាការសិក្សារបស់ប្រេស៊ីល ក្នុងឆ្នាំ ២០២១ បានរកឃើញប្លាស្ទិកក្នុងសួតអ្នកជំងឺមហារីកសួត។ យ៉ាងណាមិញ ការសិក្សាថ្មីនេះ គឺជាការសិក្សាដំបូងដែលបានធ្វើលើមនុស្សរស់ដែលមិនមានបញ្ហាសួត។
សារធាតុគីមី ដែលបានរកឃើញភាគច្រើនគឺ Polypropylene ដើម្បីផលិតថង់ប្លាស្ទិកសម្រាប់ការវេចខ្ចប់ និងបំពង់បឺត និងសារធាតុគីមី PET ដែលប្រើជាទូទៅសម្រាប់ផលិតដបទឹក និងភេសជ្ជៈ។ ការស្រាវជ្រាវនេះ បានកំណត់អត្តសញ្ញាណភាគល្អិតប្លាស្ទិកសរុបចំនួន៣៩ ហើយត្រូវបានរកឃើញនៅគ្រប់ផ្នែកទាំងអស់នៃសួត។ បំណែកប្លាស្ទិកចំនួន ១១ប្រភេទ ត្រូវបានរកឃើញនៅផ្នែកខាងលើនៃសួត និង៧ប្រភេទនៅផ្នែកកណ្តាល ហើយ ២១ប្រភេទនៅផ្នែកខាងក្រោមសួត។
ដូច្នេះ មនុស្សគួរតែប្រុងប្រយ័ត្ន និងយកចិត្តទុកដាក់ឱ្យបានខ្ពស់លើការប្រើប្រាស់ប្លាស្ទិក សំណល់ប្លាស្ទិក ការបំពុលខ្យល់ជាដើម ដែលសុទ្ធសឹងជាកត្តាសំខាន់នាំឱ្យប៉ះពាល់ដល់សុខភាពរាងកាយ ពិសេសផ្លូវដង្ហើម៕
© រក្សាសិទ្ធិដោយ thmeythmey.com