យោងតាមសេចក្ដីជូនដំណឹងរបស់គណៈកម្មការជាតិអូឡាំពិកកម្ពុជា កាលពីថ្ងៃទី២ ខែឧសភា ម្ចាស់ផ្ទះវៀតណាម បានកំណត់ពេលវេលាសម្រាប់ការទៅដល់ខុសៗគ្នា ដោយយោងតាមពេលវេលាប្រកួត នៃប្រភេទកីឡាខុសគ្នា ហើយបានកំណត់ឲ្យទៅដល់មុន២ថ្ងៃ និងត្រលប់មកវិញមួយថ្ងៃ ក្រោយចប់ការប្រកួត។
 

កីឡា៤ប្រភេទដែលត្រូវទៅនៅថ្ងៃ៤ ខែឧសភានោះ មានកីឡាបាល់ទាត់ទាំងពីវិញ្ញាសា បុរស-នារី, ប្រដាល់គុនខ្មែរ, ប្រដាល់ Kick Boxing និងប្រណាំងទូកកានូ/រ៉ូអ៊ីង។ រាជរដ្ឋាភិបាលកម្ពុជា យកចិត្តទុកដាក់លើការធ្វើដំណើររបស់អត្ដពលិក ក៏ដូចជាប្រតិភូកីឡាទាំងអស់ ដើម្បីសុវត្ថិភាព និងបង្ហាញនូវការយកចិត្តទុកដាក់ ដល់ប្រតិភូកីឡាទាំងអស់គ្នា។
 

គួរបញ្ជាក់ផងដែរថា កីឡា៤ប្រភេទនោះ បានត្រៀមខ្លួនរួចជាស្រេច ដើម្បីប្រកួតស៊ីហ្គេមនៅប្រទេសវៀតណាម។ តាមការបញ្ជាក់ពីមន្ដ្រីសហព័ន្ធកីឡាជាតិនីមួយៗ អត្ដពលិក នឹងប្រឹងប្រកួតឱ្យអស់ពីសមត្ថភាព ដើម្បីទទួលបានលទ្ធផលល្អប្រសើរ៕