ជាតិ
ថវិកា ២ពាន់ដុល្លារ បានចូលគណនីអតីតសហជីពណាហ្គាវើលដ៍ ក្រោយពួកគេប្រកាសរកជំនួយ
×
ដោយ៖ ញឹក សំអូន
ភ្នំពេញ៖ អតីតសហជីពណាហ្គាវើលដ៍ ដែលនាំគ្នាតវ៉ាក្រុមហ៊ុននេះ បានទទួលថវិកាពីសប្បុរសជនជាបន្តបន្ទាប់ ក្រោយពួកគេប្រកាសរកជំនួយកាលពីសប្ដាហ៍មុន។ រយៈពេល ៦ថ្ងៃនេះ ពួកគេទទួលទឹកប្រាក់បានប្រមាណ ២ ០០០ដុល្លារ។
ថវិកាដែលសប្បុរសជនបានផ្ដល់ឱ្យពួកគេ នៅក្នុងគណនីតំណាងសហជីពឈ្មោះ Nop Tithboravy។ កញ្ញា ឈឹម ស៊ីថរ បានប្រាប់សារព័ត៌មានថ្មីៗ(ThmeyThmey) តាមទូរស័ព្ទនៅរសៀលថ្ងៃទី ០៣ ខែឧសភាថា សមាជិកកូដករមានគ្នាច្រើន ដូច្នេះពួកគេត្រូវបន្តកៀងគរ និងស្វែករកជំនួយពីសប្បុរសជនបន្តទៀត ដើម្បីដោះស្រាយការខ្វះខាតខ្លាំង ក្នុងអំឡុងពេលតវ៉ាទាមទារលក្ខខណ្ឌការងារ ពីក្រុមហ៊ុនណាហ្គាវើលដ៍នេះ។
តំណាងសហជីពរូបនេះ បានបញ្ជាក់ថា៖« ពួកយើងព្យាយាមរកជំនួយគ្រប់មជ្ឈដ្ឋានទាំងអស់ ដើម្បីយកមកឧបត្ថម្ភសមាជិកកូដករ ឱ្យមានអាហារហូប មានលទ្ធភាពជួលផ្ទះស្នាក់នៅ និងសម្រាប់ចាយវាយ ទិញថ្នាំផ្សេងៗ»។
បច្ចុប្បន្ន ពួកគេទទួលបានជំនួយជាថវិកា ដោយពុំទាន់មានសប្បុរសជនណា ផ្ដល់ជំនួយជាសម្ភារនោះទេ។ នេះជាការបញ្ជាក់របស់កញ្ញា ស៊ីថរ ដែលបានបន្ថែមថា ជំនួយដែលក្រុមការងារតំណាងសហជីព ទទួលបានពីសាធារណជន ភាគច្រើនជាអ្នករស់នៅក្នុងប្រទេសកម្ពុជា។
«និយាយទៅខ្ញុំអត់ដឹងដែរ មិនដឹងថាជាជំនួយនៅក្នុងប្រទេស ឬក្រៅប្រទេសទេ។ ប៉ុន្តែបើតាមមើលឈ្មោះ ភាគច្រើនឈ្មោះខ្មែរយើង»។ នេះបើតាមកញ្ញា ស៊ីថរ ។
ជុំវិញវិវាទការងាររវាងក្រុមកូដករ និងភាគីក្រុមហ៊ុនណាហ្គាវើលដ៍ នឹងត្រូវបញ្ចប់ បើសិនមានការដោះស្រាយសមស្របណាមួយ ដែលពួកគេអាចទទួលយកបានទាំងសងខាង។ ជាពិសេសទទួលយកពួកគេចូលធ្វើការ និងផ្ដល់ប្រាក់ខែឡើងវិញ។ នេះបើតាមកញ្ញា ស៊ីថរ ។
សូមរំឭកថា កាលពីថ្ងៃពុធសប្ដាហ៍មុន សហជីពណាហ្គាវើលដ៍ បានអំពាវនាវរកសប្បុរសជនក្នុងស្រុក និងអន្តរជាតិ ព្រមទាំងសា្ថប័ននានា ដើម្បីជួយគាំទ្រដល់កូដករ។ ពួកគេបានតវ៉ាជិត ៥ខែមកហើយ ចាប់ពីថ្ងៃទី១៨ ធ្នូ ២០២១មក ប៉ុន្តែក្រុមហ៊ុនពុំទាន់មានដំណោះស្រាយឱ្យពួកគេ។
បច្ចុប្បន្នតំណាងសហជីព រួមទាំងអតីតបុគ្គលិកណាហ្គាវើលដ៍ ជិត២០០នាក់ កំពុងបន្តការតវ៉ា។ ពួកគេទាមទារឱ្យនិយោជិតក្រុមហ៊ុន ដែលភាគច្រើនជាសមាជិកសហជីព ចូលធ្វើការវិញ ហើយក្រុមហ៊ុនត្រូវគោរពសិទ្ធិស្ត្រី ក៏ដូចជាអត្ថប្រយោជន៍ផ្សេងៗរបស់កម្មករ។
កន្លងមកក៏មានសកម្មជន និងមេដឹកនាំសហជីពរបស់ពួកគេចំនួន ១១នាក់ ត្រូវបានចាប់ខ្លួន ក្រោមការចោទប្រកាន់ពីបទញុះញង់ឱ្យមានភាពចលាចលក្នុងសង្គម និងរំលោភលើវិធានការទប់ស្កាត់ការរីករាលដាលនៃជំងឺកូវីដ-១៩។ ប៉ុន្តែពួកគេទាំងនោះ បានដោះលែងវិញទាំងអស់ នៅអំឡុងខែមីនា ២០២២៕
© រក្សាសិទ្ធិដោយ thmeythmey.com