ពីនេះ ពីនោះ
«កាស» ជារូបិយវត្ថុសម្រាប់ចាយ រីឯ «កាក់» ជាឯកតានៃរូបិយវត្ថុ
× «កាស» មានន័យថា រូបិយវត្ថុសម្រាប់ចាយ មានសណ្ឋានមូល ប្រហោងកណ្ដាល ៤ ជ្រុង ធ្វើដោយស្ពាន់, ទង់ដែង, សាំង្កសី រីឯ «កាក់» ជាឈ្មោះប្រាក់ដែលមានចំនួនតម្លៃផ្សេងៗគ្នា។ នេះបើតាមខ្លឹមសារនៃការពន្យល់ក្នុងវចនានុក្រមខ្មែរ សម្តេចព្រះសង្ឃរាជ ជួន ណាត។
តាមវចនានុក្រម ប្រភពប្រើប្រាស់ «កាស» នៅកម្ពុជា គឺមកអំពីស្រុកចិន ឬស្រុកអណ្ណាម ហើយសព្វថ្ងៃ សព្វថ្ងៃក្នុងដែនកម្ពុជា លែងប្រើរូបិយវត្ថុនេះតាំងអំពីមានសេន។
អ្វីដែលគួរឲ្យកត់សម្គាល់នោះ កម្ពុជាក៏ធ្លាប់ចេញចរាចរណ៍ប្រភេទកាសសម្រាប់ចាយផងដែរ ដូចជា៥០០រៀល, ១០០រៀល និង៥០រៀល ប៉ុន្តែក្រោយមកក៏បាត់វិញ។ ក្រៅពីនេះ យើងសង្កេត
មានការផលិតកាសអនុស្សាវីរយ៍ មួយចំនួន ដូចជា កាសអនុស្សាវរីយ៍ប្រភេទ ៣០០០រៀល អបអរសាទរការបង្កើតសហគមន៍អាស៊ាន, កាសប្រាក់អនុស្សាវរីយ៍ប្រភេទ ៣០០០រៀល អបអរសាទរខួបទី៦០ឆ្នាំ មិត្តភាពកម្ពុជា-ជប៉ុន, កាសអនុស្សាវរីយ៍ព្រះឆាយាល័ក្ខណ៍ព្រះបាទនរោត្តម សីហនុ, កាសប្រាក់ប្រាសាទ, កាសប្រាក់ស្លឹង ជាដើម។
រីឯពាក្យ «កាក់» វិញ គឺសំដៅលើឯកតានៃរូបិយវត្ថុ។ «ឈ្មោះប្រាក់ដែលប្រើក្នុងប្រទេសកម្ពុជាមាន ៣ យ៉ាងគឺ ចំនួនតម្លៃ ១០ សេន, ២០ សេន, ៥០ សេន»។ នេះបើតាមការពន្យល់ក្នុងវចនានុក្រម។
ទាក់ទងនឹងពាក្យទាំងពីរ អ្នកស្រី ជា សិរី ឧបការីទេសាភិបាល និងជាអគ្គនាយកបច្ចេសទេសធនាគារជាតិនៃកម្ពុជា ធ្លាប់សរសេរពន្យល់នៅលើហ្វេសប៊ុកដោយខ្លីថា កាសក្នុងភាសាអង់គ្លេស គឺ Coin ខណៈ កាក់ស្មើនឹងពាក្យ Cent។
ក្រៅពីន័យទាក់ទងនឹងរូបិយវត្ថុ «កាស» និង «កាក់» មានន័យដាច់ដោយឡែកផ្សេងទៀត។ «កាស» មានន័យថា បង្ខិតចូលឲ្យញឹក ឬ បង្ខិតចេញឲ្យស្រឡះ, ឲ្យស្រដាស់។ កាសបន្ទោះឫស្សី ឬ កាសរនាប; អង្គុយកាសឲ្យជិតៗគ្នាបន្តិចទៅ ដើម្បីឲ្យបានចុះគ្នាច្រើន ។
រីឯ «កាក់» សំដៅលើឈ្មោះអាវមួយបែបឥតដៃ។ អាវកាក់៕
© រក្សាសិទ្ធិដោយ thmeythmey.com