Erik ten Hag នឹងមកកាន់កាប់ការងារនៅ Manchester United នាដើមខែមិថុនា បន្ទាប់ពីជួយក្រុមខ្លាំងប្រចាំហូឡង់ Ajax Amsterdam ឈ្នះពានរង្វាន់លីគកំពូល Eredivisie លើកទី៣៦ និងជាពានទី៣របស់លោក ដែលដឹកនាំ៤រដូវកាលមកនេះ។ ប៉ុន្តែមុនការធ្វើដំណើរទៅកាន់ប្រទេសអង់គ្លេស គ្រូបង្វឹកសញ្ជាតិហូឡង់ បានចាត់ទុកការងារជួយក្រុមបិសាចក្រហម ឆ្ពោះទៅរកការឈ្នះវិញ ជាការប្រកួតប្រជែងខ្លាំង។
 

«វាដូចជាអារម្មណ៍នៃការប្រកួតប្រជែងដ៏ខ្លាំងមួយ ក្នុងការនាំក្លិបទៅរកការឈ្នះឡើងវិញ នៅទីនោះមានជម្រើសច្រើន រួមទាំងហិរញ្ញវត្ថុ។ ខ្ញុំក៏មានអារម្មណ៍ល្អចំពោះមនុស្សទាំងអស់នៅទីនោះ (Man United) ហើយយើងអាចប្រើប្រាស់ជំហ៊ានដំបូងបានតែម្តងសម្រាប់គោលដៅក្លិប។»។ លោក Ten Hag និយាយបែបនេះប្រាប់ទស្សនាវដ្តី Voetbal International។
 

ទោះជាយ៉ាងនេះក្តី តបទៅនឹងសំណួរដែលអ្នកទស្សនាវដ្តីបានចោទសួរអំពីរឿងរ៉ាវនៅ Man United លោកបានបដិសេធមិនព្រមឆ្លើយ ប៉ុន្តែលោកបានពន្យល់អំពីការជ្រើសរើសបុគ្គលិកថ្មី និងការងារដែលក្លិបកំពុងរង់ចាំលោកទៅដល់។
 

ទោះជាយ៉ាងនេះក្តីលោក Ten Hag បានបញ្ជាក់ថា ៖ «ក្រុមបិសាចក្រហមកំពុងរង់ចាំលោកទៅដឹកនាំការងារ ហើយបិសាចក្រហមត្រូវការកសាងឡើងវិញច្រើនណាស់ ដើម្បីក្លាយជាក្រុមដែលឈ្នះវិញ»។ 
 

យ៉ាងណាមិញមុនមកដឹកនាំក្រុមថ្មី គ្រូបង្វឹកសញ្ជាតិហូឡង់ ក៏បានអះអាងបន្ថែមថា លោកកំពុងតែស្រាវជ្រាវពីបច្ចុប្បន្នភាព អនាគតនិងលទ្ធភាពរបស់ក្រុមក្នុងការប្រកួតប្រជែងផងដែរ។
 

ក្រុមបិសាចក្រហមនឹងត្រូវង្ហើយប្រកួតចុងក្រោយ Premier league ដោយធ្វើដំណើរទៅកាន់ កីឡដ្ឋាន Selhurst Park តទល់ជាមួយម្ចាស់ផ្ទះ Crystal Palace នៅថ្ងៃទី២២ ខែឧសភាខាងមុខនេះ៕