ភ្នំពេញ៖ ការ៉ុត ក្លាយជាដំណាំសក្ដានុពលថ្មីមួយរបស់ខេត្តប៉ៃលិន បន្ទាប់ពីមៀនប៉ៃលិន និងចេកអំបូងលឿង។ នាពេលថ្មីៗនេះ ក្រុមហ៊ុនកូរ៉េមួយ បានសិក្សា និងបញ្ជាទិញ ការ៉ុតប្រមាណ ៤០តោនក្នុងមួយខែពីខេត្តកសិកម្មមួយនេះ។

 

ការ៉ុត ត្រូវបានមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន​ ដាក់ឱ្យដាំសាកល្បងលើកដំបូងក្នុងឆ្នាំ ២០២១។ ដំណាំប្រភេទនេះ មានទីផ្សារខ្ពស់ ខណៈការផលិតមានចំនួនតិចតួចនៅឡើយ ដែលទាមទារឱ្យកសិករពង្រីកការដាំដុះបន្ថែមទៀត ដើម្បីបំពេញតម្រូវក្នុងស្រុក និងការនាំចេញ។


 

លោក សាយ សុផាត ប្រធានមន្ទីរកសិកម្មខេត្តប៉ៃលិន បានលើកឡើងថា នាពេលថ្មីៗនេះ លោក បាន​ជួប​ពិភាក្សាការងារជាមួយក្រុមហ៊ុន Koima ដែលជាក្រុមហ៊ុននាំចូលផលិតផលកសិកម្មពីបណ្តាប្រទេសផ្សេងទៅកូរ៉េ អំពីលទ្ធភាពនាំចេញដំណាំសក្ដានុពល ៤ប្រភេទ។ បើតាមប្រធានមន្ទីរកសិកម្មខេត្តប៉ៃលិន ដំណាំសក្ដានុពល ​រួមមាន ការ៉ុត មៀនប៉ៃលិន ស្វាយកែវរមៀត និងចេកអំបូងលឿង។
 

ជំហានដំបូងភាគីប្រទេសកូរ៉េ ចង់ប្រមូលទិញ ការ៉ុតប្រមាណ ៤០តោនក្នុងមួយខែ។ លោក សាយ សុផាត អះអាងថា ការ៉ុត ងាយស្រួលនាំចេញទៅទីផ្សារកូរ៉េ ជាងដំណាំផ្សេង ដោយសារប្រទេសនេះ កំពុងខ្វះខាត។ បើតាមលោក  សុផាត យ៉ាងយូរខែមិថុនា កម្ពុជានឹងឈានដល់ការនាំចេញការ៉ុតដោយផ្ទាល់ទៅកាន់ប្រទេសកូរ៉េ។
 

 កសិករនាខេត្តប៉ៃលិន ចាប់ផ្ដើមដាំការ៉ុត ក្នុងរយៈពេល ២ឆ្នាំចុងក្រោយ​នេះ ដែលទំហំផលិតនៅទាបនៅឡើយ ខណៈការបញ្ជាពីកូរ៉េនេះក្នុងទំហំច្រើន។ ដើម្បីបង្រ្គប់ទីផ្សារក្រៅប្រទេស មន្រ្តីកសិកម្មខេត្ត​ប៉ៃលិន ត្រូវប្រមែប្រមូលទិញពីតំបន់ ឬខេត្តផ្សេង។
 

ប្រធានមន្ទីរកសិកម្មខេត្តប៉ៃលិន ប្រាប់សារព័ត៌មានថ្មីៗ២៥ ដូច្នេះ៖«ខាងកូរ៉េ គេចាប់អារម្មណ៍ខ្លាំងលើដំណាំការ៉ុត ព្រោះប្រទេសកំពុងត្រូវការ។ អ៊ីចឹង គាត់ឱ្យយើងប្រមូលទិញតែម្ដង។ មួយខែគេបញ្ជាទិញ ៤០តោន ហើយខាងយើង មានមិនដល់អ្វីដែលគេចង់បានទេ ដោយសារនៅប៉ៃលិន ទើបតែសាកល្បងដាំនៅឆ្នាំ ២០២១នេះទេ។ អ៊ីចឹង មានតែប្រមូលទិញពីខេត្តប៉ៃលិនខ្លះ និងតំបន់ផ្សេងៗខ្លះ ដើម្បីឱ្យបានគ្រប់ ៤០តោន»។
 

ការសាកល្បងដាំដំណាំ​ការ៉ុត លើកដំបូងទទួលបានជោគជ័យគួរឱ្យកត់សម្គាល់ ដោយសារប៉ៃលិន មានដីល្អ សមស្របនឹងដំណាំប្រភេទនេះ។ ប្រធានមន្ទីរកសិកម្មរូបនេះ ជំរុញឱ្យកសិករពង្រីកការដាំដុះបន្ថែមទៀត ដើម្បីបំពេញតម្រូវការទីផ្សារក្នុងស្រុក និងការនាំចេញទៅទីផ្សារអន្តរជាតិ៕