ជាមួយនឹងជំនួយយោធា និងអាវុធទំនើបៗជាច្រើនពីអាម៉េរិក និងបណ្ដាប្រទេសលោកខាងលិច កង​កម្លាំងអ៊ុយក្រែន អាចបន្តតតាំងជាមួយនឹងកងទ័ពរុស្ស៊ីរហូតមកដល់ពេលនេះ។ កាំភ្លើងធំ, ប្រព័ន្ធ​ការពារមីស៊ីល, ប្រព័ន្ធការពាររថក្រោះ និងអាវុធមានឥទ្ធិពលផ្សេងទៀតជាច្រើន ត្រូវបានបញ្ជូន​ទៅ​អ៊ុយក្រែន ក៏ប៉ុន្តែមេដឹកនាំប្រទេសមួយនេះនៅតែទទូចឱ្យលោកខាងលិច​បញ្ជូនជំនួយឱ្យ​បាន​ច្រើន​បន្ថែមទៀត។

 

អំឡុងជំនួបរវាងរដ្ឋមន្ត្រីការបរទេសក្រុម G7 ដោយមានវត្តមានសមភាគីអ៊ុយក្រែន និងម៉ុលដាវីនៅថ្ងៃទី​១៣ ខែឧសភានៅទីក្រុង Wangels ទឹកដីអាល្លឺម៉ង់ ភាគីទាំងអស់បានពិភាក្សា ពីជម្លោះអូស​បន្លាយ​រវាងរុស្ស៊ី និងអ៊ុយក្រែន ហើយនិងវិធានការផ្សេងៗដើម្បីជួយអ៊ុយក្រែន។ នេះបើតាមទីភ្នាក់ងារព័ត៌មាន AFP។ 

 

ក្នុងជំនួប រដ្ឋមន្ត្រីការបរទេសបារាំង Jean-Yves Le Drian បានថ្លែងថា រដ្ឋមន្ត្រីក្រុមប្រទេស G7 មានគំនិតតែមួយក្នុងការបន្តជួយគាំទ្រអ៊ុយក្រែនក្នុងរយៈពេលយូរទៅមុខទៀតដើម្បីឱ្យប្រទេសមួយនេះអាចប្រយុទ្ធការពារអធិបតេយ្យភាព​របស់​ខ្លួន និង​រហូត​ដល់​ទទួល​បាន​ជ័យជម្នះ។​

 

ជាមួយគ្នានេះ ប្រមុខគោលនយោបាយការបរទេស EU លោក Josep Borrell បានបញ្ជាក់ថា ប្លុក EU សន្យាផ្ដល់ជំនួយយោធាទំហំ៥០០លានអឺរ៉ូទៀត។ បូកជាមួយជំនួយយោធាកន្លងមក ប្លុកមួយនេះ​បាន​ផ្ដល់ជំនួយឱ្យអ៊ុយក្រែនរហូតដល់២ពាន់លានអឺរ៉ូឯណោះ។

 

«ពួកយើងត្រូវដាក់សម្ពាធកាន់តែខ្លាំងលើរុស្ស៊ីជាមួយនឹងទណ្ឌកម្មសេដ្ឋកិច្ច»។ លោក Borrell សង្កត់​ធ្ងន់បែបនេះ រួចបន្តថា ក្រុម G7 ត្រូវតែបន្តទុកឱ្យរុស្ស៊ីនៅតែឯង និង​ការ​បង្ហាញ​ពីការរួបរួមដើម្បី​បន្ត​គាំទ្រ​អ៊ុយក្រែន។

 

ឯរដ្ឋមន្ត្រីការបរទេសចក្រភពអង់គ្លេស  Liz Truss បានអំពាវនាវឱ្យដាក់សម្ពាធ និងទណ្ឌកម្ម​បន្ថែម​លើ​ប្រធានាធិបតីរុស្ស៊ី និងបញ្ជូនជំនួយអាវុធទៅក្រុងកៀវបន្ថែមទៀត។

 

ជាមួយគ្នានេះ រដ្ឋមន្ត្រីការបរទេសអ៊ុយក្រែន Dmytro Kuleba ដែលបានចូលរួមជំនួបខាងលើនេះ បានកោតសរសើការប្ដេជ្ញាចិត្តរបស់រដ្ឋមន្ត្រីការបរទេសទាំងអស់ តែក៏ឆ្លៀតស្នើសុំជំនួយឱ្យច្រើនទៀត។ លោក Kuleba បានសង្កត់ធ្ងន់លើការរឹបអូសយកទ្រព្យសម្បត្តិរុស្ស៊ី ហើយផ្ដល់ឱ្យអ៊ុយក្រែនវិញដើម្បី​កសាងប្រទេសជាថ្មី។ លោកក៏បានជំរុញ EU ដាក់បំរាមលើប្រេងរុស្ស៊ីដែរ៕