ជាជំនួបដែលធ្វើឱ្យរបបយោធាមីយ៉ាន់ម៉ាក្ដៅស្លឹកត្រចៀកខ្លាំង ប្រមុខការទូតម៉ាឡេស៊ី Saifuddin Abdullah បានជួបរដ្ឋមន្ត្រីការបរទេសរដ្ឋាភិបាលបង្រួបបង្រួមជាតិមីយ៉ាន់ម៉ា Zin Mar Aung នៅទឹកដីអាម៉េរិក។ លោក Saifuddin សរសេរលើ Twitter ថា ជំនួបនេះជជែកពីស្ថានការណ៍ចុងក្រោយនៅមីយ៉ាន់ម៉ា។

 

«ពួកយើងបានឆ្លៀតឱកាសដើម្បីផ្លាស់ប្តូរទស្សនៈស្តីពីការវិវឌ្ឍចុងក្រោយបង្អស់នៅមីយ៉ាន់ម៉ា ដែល​រដ្ឋមន្ត្រី Zin បានចែករំលែកការយល់ដឹង ក៏ដូចជាបញ្ហាប្រឈមរដ្ឋាភិបាល NUG កំពុងជួបប្រទះ រួម​ទាំងតម្រូវការជំនួយមនុស្សធម៌ ការបណ្តុះបណ្តាល បច្ចេកទេស និងការអប់រំសម្រា​ប់​ជន​ភៀស​ខ្លួន​មីយ៉ាន់ម៉ា»។ លោក Saifuddin បានលើកឡើងបែបនេះ រួចបន្តថា ម៉ាឡេស៊ី​បាន​ត្រៀមខ្លួន​រួច​ជា​ស្រេច​ក្នុងការជួយស្ដារសន្តិភាព និងលទ្ធិប្រជាធិបតេយ្យនៅមីយ៉ាន់ម៉ាឡើងវិញ។

 

ក្រសួងការបរទេសមីយ៉ាន់ម៉ា បង្ហាញការជំទាស់ទៅនឹងជំនួបរវាងប្រមុខការទូតប្រទេសអាស៊ាន និងតំណាងរដ្ឋាភិបាលស្រមោល ដែលត្រូវបានបញ្ចូលក្នុងបញ្ជីក្រុមភេរវករ។ ក្នុងសេចក្ដីថ្លែងការណ៍មួយ ក្រសួងការបរទេសមីយ៉ាន់ម៉ា បរិហារទំនាក់ទំនងរវាងរដ្ឋាភិបាល NUG ជាមួយនឹង​ក្រសួងការ​បរទេសអាម៉េរិក ហើយក៏បាន​ផ្ញើសារ​តវ៉ា​ទៅ​ប្រទេស​អាស៊ាន​ទាំង​អស់ និង​​អាម៉េរិក​ដោយស្នើ​ឱ្យ​ពួកគេ​ដកខ្លួនចេញពីការពិភាក្សាជាមួយរដ្ឋាភិបាលស្រមោលនោះ។

 

សេចក្ដីថ្លែងការណ៍ដដែលនោះ ក៏បដិសេធកថាខណ្ឌដែលមាននៅក្នុងសេចក្តីថ្លែងការណ៍រួម២៨ទំព័រ​ចេញក្រោយជំនួបពិសេសអាម៉េរិក និងអាស៊ានដែលរួមមានការកំណត់ពេលវេលាឱ្យរ​បប​យោធា​មីយ៉ាន់ម៉ាសម្រេចតាមផែនការ៥ចំណុច។ ក្រសួងការបរទេសរបបមីយ៉ាន់ម៉ា លើកឡើងទៀតថា ភាសា​ដែលប្រើប្រាស់ក្នុងកថាខណ្ឌខាងលើនោះបានជ្រៀតជ្រែកផ្ទៃក្នុង និងអធិបតេយ្យភាព​របស់​មីយ៉ាន់ម៉ា ហើយលើសពីផែនការ៥ចំណុចទៀតផង៕