​ខណៈជាទូទៅ សមាជិកភាពសម្ព័ន្ធយោធាណាតូអាចចំណាយពេលរហូតដល់មួយឆ្នាំដើម្បីទទួលបានសច្ចាប័នពីសមាជិកមុនៗ អាល្លឺម៉ង់ រួមទាំងប្រមុខណាតូបានសន្យាផ្ដល់សច្ចាប័នរហ័សសម្រាប់​ហ្វាំងឡង់ និងស៊ុយអែតដោយសារតែពួកគេត្រូវការការការពារផ្នែកសន្តិសុខជាបន្ទាន់ ប្រឈមមុខការគំរាមរបស់រុស្ស៊ី។ អាម៉េរិកឯណេះក៏បេ្ដជ្ញាជួយឱ្យប្រទេសទាំងពីរក្លាយជាសមាជិកឱ្យបានលឿនមុនខែ​សីហាខាងមុខទៀតផង។
 

អំឡុងសន្និសីទកាសែតក្រោយជំនួបជាមួយប្រធានាធិបតីហ្វាំងឡង់ សាវលី នីនីស្តូ នៅរដ្ឋធានី​ហែលស៊ិនគី ប្រធានសំឡេងភាគតិចព្រឹទ្ធសភាអាម៉េរិក Mitch McConnell បញ្ជាក់ថា សមាជិក​សភា​អាម៉េរិកទាំងពីរបក្សបានគាំទ្រយ៉ាងទូលំទូលាយសម្រាប់ការចូលជាសមាជិកសម្ព័ន្ធ​យោធា​ណាតូ​របស់​ហ្វាំងឡង់។ ទោះបីជាការគាំទ្រមិនមែនដោយឯកច្ឆន្ទក៏ដោយ សំឡេងគាំទ្រមានដ៏ច្រើននេះ​មាន​សារ​សំខាន់ណាស់។
 

«ប្រាកដណាស់ ពួកយើងសង្ឃឹមថានឹងសម្រេចវា (ការចូលជាសមាជិកណាតូរបស់ហ្វាំងឡង់) មុន​ពេលវិសមកាលខែសីហាដែលជាពេលដែលសភាជាធម្មតាមិនប្រជុំអ្វីនោះឡើយ»។ លោក McConnell បានបញ្ជាក់បែបនេះ។
 

នៅថ្ងៃដដែល រដ្ឋមន្ត្រីការបរទេសកាណាដា លោកស្រី Melanie Joly បានបញ្ជាក់ពីការគាំទ្រឱ្យ​ហ្វាំងឡង់ និងស៊ុយអែតចូលសម្ព័ន្ធយោធាណាតូឱ្យបានលឿនផងដែរ។ ពីទីក្រុងព្រុចសែល លោកស្រី Joly បានថ្លែងថា កាណាដានឹងចំណាយពេលតែប៉ុន្មានថ្ងៃប៉ុណ្ណោះដើម្បីផ្ដល់សច្ចាប័ន​ឱ្យ​ប្រទេស​ទាំង​ពីរ។
 

ជុំវិញរឿងនេះ អនុរដ្ឋមន្ត្រីការបរទេសរុស្ស៊ី Sergei Ryabkov បានព្រមានថា លោកខាង​លិចមិនគួរ​ភាន់​ច្រឡំក្រុងមូស្គូនឹងនៅស្ងៀមចំពោះការពង្រីកសម្ព័ន្ធយោធាដែលដឹកនាំដោយអាម៉េរិក​មក​ដល់​តំបន់​ប៉ែកខាងជើងអឺរ៉ុបឡើយ។ លោកក៏សង្កត់ធ្ងន់ថា ការពង្រីកសមាជិកសម្ព័ន្ធមួយនេះ​គឺ​ជា​កំហុស​ដែល​នឹងបង្កភាពតានតឹងផ្នែកយោធារវាងលោកខាងលិចនិងរុស្ស៊ីបន្ថែមទៀត៕