ភ្លាមៗបន្ទាប់ពីនាយករដ្ឋមន្រ្តី Jean Castex បានលាលែងពីតំណែង ដែលជាផ្នែកមួយនៃការរុះរើគណៈរដ្ឋមន្រ្តី លោកប្រធានាធិបតី អេម៉ានុយអែល ម៉ាក្រុង នៅថ្ងៃទី១៦ ខែឧសភា បានជ្រើសតាំង លោកស្រី Elisabeth Borne ជានាយករដ្ឋមន្រ្តីថ្មី។ ការជ្រើសតាំងនាយករដ្ឋមន្រ្តីជាស្រ្តីក្នុងរយៈពេល ៣ទសវត្សរ៍មកនេះ ធ្វើឡើងបន្ទាប់ពីលោកម៉ាក្រុង បានស្បថចូលកាន់តំណែងជាប្រមុខរដ្ឋ នៅអាណត្តិទីពីរ។ 

 

បន្ទាប់ពីមានការតែងតាំងនៅក្នុងសេចក្តីថ្លែងការណ៍របស់វិមាន Elysee លោកស្រី Borne បានធ្វើដំណើរទៅនិវេសនដ្ឋាននាយករដ្ឋមន្រ្តីបារាំង Matignon ក្នុងក្រុងប៉ារីស ដើម្បីទទួលកិច្ចការដឹកនាំរដ្ឋាភិបាល បន្ទាប់ពីលោក Castex។ 

 

«គ្មានអ្វីអាចបញ្ឈប់ការតស៊ូរបស់ស្រ្តី សម្រាប់តួនាទីក្នុងសង្គមបានឡើយ»។ លោកស្រី Borne បានថ្លែងសារលើកទឹកចិត្តទៅកាន់ស្រ្តីផ្សេងទៀតបែបនេះ ក្នុងពិធីទទួលតំណែង ដោយផ្តែផ្តាំឱ្យក្មេងស្រីទាំងអស់ ធ្វើឱ្យក្តីស្រមៃរបស់ពួកគេក្លាយជាការពិត។ 

 

តាមរយៈបណ្តាញសង្គម Twitter លោក ម៉ាក្រុង បញ្ជាក់ថា​ លោកស្រី Borne បានដាក់ចេញ​គោលនយោបាយអាទិភាពរួចហើយ ក្នុងនោះមានដូចជា ប្រព័ន្ធអេកូឡូស៊ី សុខាភិបាល អប់រំ ភាពមានការងារធ្វើពេញលេញ ការស្តារប្រជាធិបតេយ្យ សន្តិសុខ និងអឺរ៉ុបជាដើម។ បើតាមលោកម៉ាក្រុង រដ្ឋាភិបាលបារាំងថ្មីនេះ នឹងខិតខំដោយគ្មានការនឿយហត់សម្រាប់ប្រជាជនរបស់ខ្លួន។ 

 

ក្នុងអាណត្តិថ្មី លោក ម៉ាក្រុង ត្រូវការសំឡេងគាំទ្របន្ថែមទៀតពីសភាដើម្បីអនុម័តគោលនយោបាយក្នុងស្រុក។ យ៉ាងណាមិញ សម្ព័ន្ធឆ្វេងនិយម និងស្តាំនិយមជ្រុល បានព្រមានមិនគាំទ្រគោលនយោបាយរបស់លោកម៉ាក្រុង។ បារាំង ក៏ត្រូវរៀបចំការបោះឆ្នោតសភានៅខែមិថុនាខាងមុខ ហើយលោក ម៉ាក្រុង រំពឺងឈ្នះសំឡេងភាគច្រើនក្នុងការបោះឆ្នោតនេះដែរ។

 

ក្នុងយុទ្ធនាការឃោសនាបោះឆ្នោត លោកម៉ាក្រុង បានសន្យាដំឡើងអាយុចូលនិវត្តន៍របស់ប្រជាជនបារាំងពី៦២ឆ្នាំ ទៅ៦៥ឆ្នាំ, បង្កើនការងារធ្វើ និងការវិនិយោគនៅក្នុងប្រទេស រួមទាំងប្តេជ្ញាធ្វើឱ្យមានការងារពេញលេញផង។ កន្លងមក អត្រាគ្មានការងារធ្វើនៅបារាំងបានធ្លាក់ចុះមកត្រឹម ៧,៤ភាគរយប៉ុណ្ណោះ ដោយថយចុះពីជាង ១០ភាគរយចាប់តាំងពីលោកម៉ាក្រុងចូលកាន់តំណែង នៅក្នុងឆ្នាំ២០១៧។ 

 

សូមបញ្ជាក់ថា លោកស្រី Borne ជានាយករដ្ឋមន្រ្តីស្រ្តីទីពីររបស់បារាំង បន្ទាប់ពីលោកស្រី Edith Cresson ដែលបានកាន់តំណែងនៅចន្លោះឆ្នាំ១៩៩១ ដល់ឆ្នាំ១៩៩២។ ក្នុងពេលជារដ្ឋមន្រ្តីការងារនៅឆ្នាំ២០២០ លោកស្រីបានធ្វើឱ្យអត្រាភាពគ្មានការងារធ្វើធ្លាក់ចុះទាបបំផុត ក្នុងរយៈពេល​១៥ឆ្នាំកន្លងមកនេះ និងអត្រាក្មេងជំទង់គ្មានការងារធ្វើនៅទាបបំផុត ក្នុងរយៈពេល៤០ឆ្នាំ។ មុននឹងក្លាយជារដ្ឋមន្រ្តីការងារ លោកស្រីBorne ធ្លាប់ជារដ្ឋមន្រ្តីដឹកជញ្ជូន និងជាទីប្រឹក្សាបច្ចេកទេសក្នុងរដ្ឋាភិបាលបារាំងមុនៗ៕