ដោយ ៖ ធន់ សេងហុង
ភ្នំពេញ៖ ហិរញ្ញប្បទានពីទីភ្នាក់ងារ KOICA ដល់កម្ពុជាសម្រាប់ឆ្នាំបន្តបន្ទាប់នឹងផ្តោតលើវិស័យសំខាន់ៗមួយចំនួនដូចជា កសិកម្ម សុខាភិបាល អភិវឌ្ឍន៍ជនបទ ឌីជីថលនិងបរិស្ថាន និងការប្រែប្រួលអាកាសធាតុ។ ផែនការផ្តល់ហិរញ្ញប្បទាននេះ ត្រូវបានលើកឡើងក្នុងកិច្ចពិភាក្សានាថ្ងៃទី១៦ឧសភា រវាងប្រតិភូទីភ្នាក់ងារសហប្រតិបត្តិការអន្តរជាតិកូរ៉េ (KOICA) ជាមួយគណៈកម្មាធិការនីតិសម្បទានិងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC)។ គិតពីឆ្នាំ១៩៩១ ដល់ឆ្នាំ២០២១ ទីភ្នាក់ងារ KOICAបានផ្តល់ហិរញ្ញប្បទានប្រហែល ៣១០លានដុល្លារ ដើម្បីជួយដល់ការអភិវឌ្ឍសេដ្ឋកិច្ចសង្គមកម្ពុជា។
ទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងក្រុមប្រឹក្សាអភិវឌ្ឍន៍កម្ពុជា (CDC) បានជួបពិភាក្សាគ្នា ពាក់ព័ន្ធជុំវិញការស្នើសុំសំណើគម្រោងថ្មី សម្រាប់ឆ្នាំ២០២៤នៅកម្ពុជា។ KOICA បានចុះផ្សាយខ្លឹមសារនៃជំនួបនេះ នៅទំព័រហ្វេសប៊ុករបស់ខ្លួន។
បើតាមទីភ្នាក់ងារ KOICA គោលបំណងនៃកិច្ចប្រជុំនេះ គឺដើម្បីពិភាក្សាអំពីវិស័យអាទិភាពសំខាន់ៗ មួយចំនួនរបស់ខ្លួន រួមមានសុខាភិបាល អភិវឌ្ឍន៍ជនបទ ឌីជីថល និងបរិស្ថាន ការប្រែប្រួលអាកាសធាតុ និងគម្រោងថ្មីរបស់ KOICA សម្រាប់ប្រទេសកម្ពុជានៅឆ្នាំ២០២៤។ ក្រៅពីនេះទីភ្នាក់ងារ KOICA ក៏បានចែករំលែកវឌ្ឍនភាព នៃគម្រោងរបស់ខ្លួនដែលកំពុងដំណើរការ គម្រោងសម្រាប់ឆ្នាំ២០២២ និង២០២៣ និងអ្នកស្ម័គ្រចិត្តដែលទើបនឹងបញ្ជូនមក។
លោក Rho Hyunjunប្រធានទីភ្នាក់ងារសហប្រតិបត្តិការអន្តរជាតិកូរ៉េ។ រូបថត៖ ហ្វេសប៊ុក KOICA
ក្នុងជំនួបនេះ លោក នោ ហ្យន់ជូន (Rho Hyunjun) ប្រធានទីភ្នាក់ងារសហប្រតិបត្តិការអន្តរជាតិកូរ៉េ (KOICA) បានឆ្លៀតលើកឡើងពីការកត់សម្គាល់លើសមិទ្ធផល ដែលរាជរដ្ឋាភិបាលកម្ពុជាសម្រេចបាន ពិសេសជោគជ័យនៃការទប់ស្កាត់ការឆ្លងរាលដាលនៃកូវីដ-១៩។ ប្រធានតំណាង KOICA ក៏គូសបញ្ជាក់ផងដែរ ជំហានបន្ទាប់នៃការធ្វើការជាមួយក្រសួងពាក់ព័ន្ធរបស់ប្រទេសកម្ពុជា ដើម្បីរៀបចំឯកសារទស្សនទានគម្រោង (Project Concept Paper -PCP) សម្រាប់ការស្នើសុំសំណើគម្រោងថ្មី សម្រាប់ឆ្នាំ២០២៤។
ជុំវិញជំនួបនេះ ក្រុមប្រឹក្សាអភិវឌ្ឍន៍កម្ពុជា(CDC) ក៏បានចេញសេចក្តីប្រកាសព័ត៌មានមួយដែរ ដោយបានវាយតម្លៃខ្ពស់ ចំពោះការចូលរួមយ៉ាងសកម្មរបស់ KOICA ក្នុងការអភិវឌ្ឍប្រទេសកម្ពុជា។ លោក ឈៀង យ៉ាណាម្ពុជាពេញចិត្តយ៉ាងខ្លាំងចំពោះគំនិតផ្តួចផ្តើមនៃការរៀបចំឯកសារទស្សរ៉ា អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កនទានគម្រោង (Project Concept Paper -PCP) សម្រាប់ការស្នើសុំសំណើគម្រោងថ្មី សម្រាប់ឆ្នាំ២០២៤ ផ្តួចផ្តើមដោយ KOICA។ អគ្គលេខាធិការ រូបនេះ បានលើកទឹកចិត្ត KOICA ឲ្យពិភាក្សាលម្អិត អំពីបច្ចេកទេស នៃកិច្ចសហប្រតិបត្តិការជាមួយក្រសួងពាក់ព័ន្ធ ដើម្បីរៀបចំឯកសារទាំងនេះ។
លោក ឈៀង យ៉ាណារ៉ា អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា។ រូបភាពហ្វេសប៊ុក KOICA
តាមរយៈសេចក្តីប្រកាសព័ត៌មានដដែល CDC បានអះអាងថា សម្រាប់ឆ្នាំខាងមុខ KOICA នឹងផ្តល់ហិរញ្ញប្បទាន ផ្តោតសំខាន់ទៅលើវិស័យកសិកម្ម សុខាភិបាល ឌីជីថល អភិវឌ្ឍន៍ជនបទ បរិស្ថាន និងការប្រែប្រួលអាកាសធាតុ។ លើសពីនេះ ទីភ្នាក់ងារ KOICA បានផ្តល់កិច្ចសហប្រតិបត្តិការបន្ថែមជាច្រើន រួមមាន ការបញ្ជូនអ្នកជំនាញការ និងអ្នកស្ម័គ្រចិត្តកូរ៉េ និងការផ្តល់កម្មវិធីបណ្តុះបណ្តាលរយៈពេលខ្លី និងកម្មវិធីអាហារូបករណ៍រយៈពេលវែង រួមទាំងកម្មវិធីភាពជាដៃគូជាមួយអង្គការសង្គមស៊ីវិល។
សូមជម្រាបថា ចាប់តាំងពីឆ្នាំ១៩៩១ ដល់ឆ្នាំ២០២១ KOICA បានផ្តល់ជំនួយឥតសំណងប្រហែល ៣១០លានដុល្លារ ដើម្បីជួយដល់ការអភិវឌ្ឍសេដ្ឋកិច្ចសង្គមកម្ពុជា។ សម្រាប់ឆ្នាំ២០២២នេះវិញ ជំនួយឥតសំណងរបស់ KOICA សម្រាប់ប្រទេសកម្ពុជា ត្រូវបានគេរំពឹងថានឹងមានចំនួនប្រហែល ២០,៧ លានដុល្លារ៕