នៅជប៉ុន ​វិស័យទេសចរណ៍ ជាចលករដ៏សំខាន់សម្រាប់រុញច្រានកំណើនសេដ្ឋកិច្ច។ ប៉ុន្តែ​ចាប់តាំងពីជំងឺកូវីដ-១៩ បានវាយលុកមក ​ប្រទេសនេះ​បានចាត់វិធានការបិទព្រំដែនដ៏តឹងតែងបំផុតប្រឆាំងនឹងការរីករាលដាល​ ដោយមិនអនុញ្ញាតឱ្យអ្នកដំណើរបរទេសធ្វើដំណើរចូលឡើយ លើកលែងតែប្រជាជនខ្លួនប៉ុណ្ណោះ។

 

​ប៉ុន្តែនាប៉ុន្មានខែចុងក្រោយនេះ ជ​ប៉ុន​ក៏បានបន្ធូរបន្ថយវិធានការមួយកម្រិតដែរដើម្បីអនុញ្ញាតឱ្យនិស្សិត និងអ្នកជំនួញអាចធ្វើដំណើរចូលប្រទេសខ្លួនបាន។ ​​ឯអ្នកទេសចរវិញ នៅតែមិនទាន់ត្រូវបានអនុញ្ញាត បើទោះកន្លងមក បណ្តាមេដឹកនាំរោងចក្របានអំពាវនាវឱ្យបើកវិស័យទេសចរណ៍ឡើងវិញ ដើម្បីជំរុញឱ្យតម្លៃរូបិយប័ណ្ណក្នុងស្រុកកើនឡើង ក្រោយពីធ្លាក់ចុះដល់កម្រិតទាបមិនធ្លាប់មានក្នុងរយៈពេល២០ឆ្នាំចុងក្រោយនេះ។ នេះបើតាមការចេញផ្សាយដោយទីភ្នាក់ងារ​​​​ Reuters។

 

យោងតាមការប្រកាសរបស់ទីភ្នាក់ងារទេសចរណ៍រដ្ឋជប៉ុននៅថ្ងៃទី១៧ខែឧសភា​ ជប៉ុននឹងចាប់ផ្តើ​មអនុញ្ញាតឱ្យអ្នកដំណើរទេសចរណ៍ជាក្រុមតូចៗចូលក្នុងប្រទេសខ្លួនចាប់ពីចុងខែឧសភានេះតទៅ​ ដែលជាករណីសាកល្បង ដើម្បីប្រមូលព័ត៌មានពីកម្រិតហានិភ័យនៃការឆ្លងជំងឺកូវីដ-១៩ និងឆ្ពោះទៅរកការបើកទទួលភ្ញៀវទេសចរទ្រង់ទ្រាយធំឡើងវិញ។

 

ភ្ញៀវទេសចរ ដែលបានចាក់វ៉ាក់សាំងបង្ការជំងឺកូវីដ-១៩ ចំនួន៣ដូស និងទៅពីអាម៉េរិក ​​​សិង្ហបុរី អូស្រ្តាលី ​និងថៃ នឹងត្រូវបានអនុញ្ញាតឱ្យធ្វើដំណើរចូលជប៉ុនតាមរយៈក្រុមហ៊ុនទេសចរណ៍។ ក្រុមហ៊ុន ត្រូវមានគម្រោងនៃដំណើរកម្សាន្តហ្មត់ចត់ដោយសហការជា​មួយទីភ្នាក់ងារទេសចរណ៍របស់ជប៉ុន ហើយអ្នករៀបចំដំណើរកម្សាន្ត ឬ មគ្គុទេសក៍ត្រូវអមដំណើរភ្ញៀវទេសចរគ្រប់ពេលវេលា។

 

​មុនពេលជំងឺកូវីដ-១៩ផ្ទុះឡើង​ ជប៉ុនបានកត់ត្រាភ្ញៀវទេសចរអន្តរជាតិចំនួន៣១,៩លាននាក់នៅឆ្នាំ២០១៩ ដែលរកចំណូលស្មើនឹងទំហំទឹកប្រាក់សរុបជាង​៣៧ពាន់លានដុល្លារ៕