អន្តរជាតិ
ចិន អបអរនាយករដ្ឋមន្ត្រីអូស្ត្រាលីថ្មី ខណៈទំនាក់ទំនងទ្វេភាគីបន្តជាប់គាំង
× នាយករដ្ឋមន្ត្រីចិន លី ខឹឈាំង បានផ្ញើសារអបអរសាទរនាយករដ្ឋមន្ត្រីអូស្ត្រាលីថ្មី អាន់ថូនី អាល់បានីស ដែលទើបតែបានចូលកាន់តំណែង។ នេះបើតាមការផ្សាយរបស់ទីភ្នាក់ងារព័ត៌មានចិន Xinhua នៅថ្ងៃទី ២៣ ខែឧសភា។ មេដឹកនាំចិនបានអះអាងថា ចិនបានត្រៀមខ្លួនរួចជាស្រេចក្នុងការពិនិត្យរឿងចាស់ៗ និងទំនាក់ទំនងនាពេលអនាគតដើម្បីបង្កើតភាពរីកចម្រើនសម្រាប់ភាគីទាំងពីរ។
ទំនាក់ទំនងចិន-អូស្ត្រាលី មិនល្អឡើយអំឡុងពីរឆ្នាំចុងក្រោយនេះ បន្ទាប់ពីទីក្រុងកង់ប៉េរ៉ាទទូចឱ្យមានការស៊ើបអង្កេតលើប្រភពដើមនៃជំងឺកូវីដ-១៩ ការហាមឃាត់ក្រុមហ៊ុនចិន Huawei ពីការអភិវឌ្ឍបណ្ដាញ 5G និងការរិះគន់បញ្ហាសិទ្ធិមនុស្សនៅតំបន់ស៊ីនជាំងជាដើម។ ជាការឆ្លើយតប ចិនបានចាត់វិធានការតបវិញដូចជាការដាក់ពន្ធលើស្រា និងធ្យូងថ្មដែលនាំចូលពីអូស្ត្រាលី។
ជាជំហានដែលត្រូវមើលឃើញថាអាចបើកផ្លូវដល់ទំនាក់ទំនងល្អ នាយករដ្ឋមន្រ្តីចិន លី ខឹឈាំង បានផ្ញើសារទៅកាន់នាយករដ្ឋមន្រ្តីថ្មីអូស្ត្រាលី អាន់ថូនី អាល់បានីស ដែលទើបស្បថកាន់តំណែង។
«ភាគីចិនបានត្រៀមខ្លួនជាស្រេចដើម្បីធ្វើការជាមួយភាគីអូស្ត្រាលីដើម្បីពិនិត្យឡើងវិញពីរឿងអតីតកាល និងសម្លឹងមើលទៅរឿងនៅអនាគត»។ ទីភ្នាក់ងារព័ត៌មានរដ្ឋចិន Xinhua ស្រង់សំណេរក្នុងសំបុត្រលោក លី បែបនេះ រួចបន្តថា ចិននឹងព្យាយាមចូលរួមជំរុញឱ្យមានការរីកចម្រើនក្នុងភាពជាដៃគូយុទ្ធសាស្ត្រដ៏ទូលំទូលាយរវាងក្រុងប៉េកាំង និងកង់ប៉េរ៉ាផងដែរ។
ទោះជាយ៉ាងណា លោក អាល់បានីស ក្នុងសុន្ទរកថារបស់ខ្លួន លើកឡើងថា ទំនាក់ទំនងជាមួយចិន អាចបន្តពិបាកទៅមុខទៀត។ លោកក៏ទទូចឱ្យចិនត្រូវតែផ្លាស់ប្តូរទង្វើដែលកំពុងធ្វើដើម្បីស្ដារស្ថានភាព ទំនាក់ទំនងទ្វេភាគីឡើងវិញ។
សាររបស់មេដឹកនាំចិន ផ្ញើចំពេលដែលលោក អាល់បានីស កំពុងធ្វើដំណើរទស្សនកិច្ចនៅជប៉ុនជាលើកដំបូងក្នុងនាមជាមេដឹកនាំអូស្ត្រាលី។ នៅទីក្រុងតូក្យូ នាយករដ្ឋមន្ត្រីអូស្ត្រាលី ជួបជាមួយមេដឹកនាំសន្តិសុខចតុភាគី (Quad) មានជប៉ុន ឥណ្ឌា និងអាម៉េរិក៕
© រក្សាសិទ្ធិដោយ thmeythmey.com