អន្តរជាតិ
សភាហ្វីលីពីនប្រកាសលោក Marcos Jr ជាប្រធានាធិបតី ឯកូនស្រីលោក ឌូទើតេ ជាអនុប្រធានាធិបតី សភាហ្វីលីពីនប្រកាសលោក Ferdinand Marcos Jr (កណ្ដាល) ជាប្រធានាធីបតីជាប់ឆ្នោត។ រូបថត AFP
× សម័យប្រជុំរួមនៃសភាទាំងពីរថ្នាក់របស់ហ្វីលីពីន នៅថ្ងៃទី២៥ ខែឧសភា បានប្រកាសថា លោក Ferdinand Marcos Jr ជាអ្នកឈ្នះក្នុងការបោះឆ្នោតកាលពីដើមខែឧសភា ឯកូនស្រីលោក រ៉ូឌ្រីហ្គោ ឌូទើតេ ជាអនុប្រធានាធិបតីជាប់ឆ្នោត។ ប្រធានាធិបតី និងអនុប្រធានាធិបតី នឹងស្បថចូលកាន់តំណែងនៅថ្ងៃទី៣០ ខែមិថុនា។
ក្នុងការរាប់សន្លឹកឆ្នោតនៅក្នុងសភា លោក Ferdinand Marcos Jr ដែលត្រូវស្គាល់ជាទូទៅថា លោក Bongbong វ័យ៦៤ឆ្នាំ បានទទួលសន្លឹកឆ្នោតនាំមុខដាច់គេរហូតដល់៣១,៦លានសន្លឹក ឬ ៥៨,៧៧ ភាគរយនៃសន្លឹកឆ្នោតសរុប។ ឈរលំដាប់ទីពីរ គឺអនុប្រធានាធិបតីបច្ចុប្បន្ន ឡេនី រ៉ូប្រេដូ ។
ជាកូនរបស់អតីតប្រធានាធិបតីហ្វីលីពីន Ferdinand Marcos ហើយមានទំនាក់ទំនងជិតស្និទ្ធជាមួយប្រធានាធិបតីហ្វីលីពីនសព្វថ្ងៃ រ៉ូឌ្រីហ្គោ ឌូទើតេ ដែលរងការិះគន់ជាច្រើនជាពិសេសសង្គ្រាមគ្រឿងញៀន ការជាប់ឆ្នោតរបស់លោក Marcos Jr ធ្វើឱ្យមានការបារម្ភខ្លះទាក់ទងការស្ដារប្រជាធិបតេយ្យនៅហ្វីលីពីន។ ម្យ៉ាង គេក៏បារម្ភថា លោកអាចនឹងប្រកាន់យកគោលនយោបាយដូចមេដឹកនាំមុនដែរ។
យ៉ាងណមិញ លោក Marcos ធ្លាប់បញ្ជាក់ហើយថាប្រជាជនមិនគួរគិតពីអតីតកាលនោះឡើយ ហើយគួរគិតពីអនាគតវិញ។ លោកក៏បានសន្យាដោះស្រាយបញ្ហាសង្គមផ្សេងៗ និងជំរុញផ្នែកឱ្យមានថាមពលប្រើប្រាស់ក្នុងតម្លៃថោក ឱកាសការងារ ហេដ្ឋារចនាសម្ព័ន្ធ និងការអប់រំស្មើៗគ្នាជាដើម។
តាមច្បាប់ហ្វីលីពីន លោក Marcos Jr នឹងចូលកាន់តំណែងនៅថ្ងៃទី ៣០ ខែមិថុនា បន្តពីលោក ឌូទើតេ ហើយនឹងបម្រើការងាររហូតដល់ឆ្នាំ២០២៨។ កូនស្រីរបស់លោកឌូទើតេ លោកស្រី Sara Duterte-Carpio នឹងធ្វើជាអនុប្រធានាធិបតីក្រោមអាណត្តិរបស់លោក Marcos Jr ផងដែរ។
«ខ្ញុំសូមស្នើឱ្យអ្នកទាំងអស់គ្នាបួងសួងជូនពរឱ្យខ្ញុំសុខសប្បាយ។ ខ្ញុំចង់ធ្វើការងារឱ្យបានល្អសម្រាប់ប្រទេសមួយនេះ»។ លោក Marcos Jr បានលើកឡើងបែបនេះបន្ទាប់ពីសភាហ្វីលីពីនបានប្រកាសការតែងតាំងលោកជាប្រធានាធិបតីជាប់ឆ្នោត៕
© រក្សាសិទ្ធិដោយ thmeythmey.com