បញ្ហាសមុទ្រចិនខាងត្បូង ជាបញ្ហាចោទមួយដែលជាប់គាំងអស់ពេលជាយូរ ដោយចិនទាមទារដែនអធិបតេយ្យខ្លួនស្ទើរតែទាំងស្រុង។ ការទាមទាររបស់ចិនបែបនេះ​ បានបង្កជាជម្លោះជាមួយបណ្តាប្រទេសដូចជាហ្វីលីពីន ព្រុយណេ ម៉ាឡេស៊ី​​ និងវៀតណាម។ នៅឆ្នាំ២០១៦ តុលាការមជ្ឈត្តការអចិន្ត្រៃយ៍នៅក្រុងឡាអេ បានសម្រេចឱ្យហ្វីលីពីនឈ្នះចិន និងថាអំណះអំណាងចិនលើសមុទ្រចិនខាងត្បូងគ្មានមូលដ្ឋានច្បាស់លាស់។​ ប៉ុន្តែចិនបានបដិសេធ មិនទទួលស្គាល់យុត្តាធិការរបស់តុលារអន្តរជាតិមួយនេះ។ 

 

​ថ្លែងទៅក្នុងបទសម្ភាសន៍មួយក្នុងថ្ងៃទី២៦ ខែឧសភា​​ ​ប្រធានាធិបតីជាប់ឆ្នោតហ្វីលីពីន​លោក​ Ferdinand Marcos Jr បានលើកឡើងថា រូបលោកមិនអនុញ្ញាតឱ្យនរណាម្នាក់ឈ្លានពានសិទ្ធិដែនសមុទ្រខ្លួន សូម្បីតែមួយមីលីម៉ែត្រឡើយ។

 

«យើងមានសេចក្តីសម្រេចនៅខាងពួកយើង ហើយយើងនឹងប្រើប្រាស់វា ដើម្បីបន្តអះអាងពីសិទ្ធិដែនដីរបស់យើង។វា មិនមែនការទាមទារទេ។ វា​ជាសិទ្ធិដែនដីរបស់ពួកយើងរួចហើយ»។ ​លោក​ Marcos បានលើកឡើងបែបនេះ ដោយបន្តសង្កត់ធ្ងន់ទៀតថា ​រូបលោក​ និយាយទៅកាន់ចិនតែម្តង និងជាមួយសំឡេងដ៏មុតមាំ។

 

យ៉ាងណាមិញ ប្រធានាធិបតីជាប់ឆ្នោតក៏បានបន្ថែមទៀតថា​ លោកនឹងព្យាយាមស្វែងរកតុល្យភាពរវាងចិន និងអាម៉េរិកដែលកំពុងប្រកួតប្រជែងគ្នា ឱ្យប្រែក្លាយជាមានទំនាក់ទំនងជិតស្និទ្ធបំផុតជាមួយរដ្ឋបាលលោក។ ​លោកបានអះអាងថា ហ្វីលីពីនជាប្រទេសតូចមួយក្នុងចំណោមក្រុមប្រទេសមហាអំណាចដ៏ធំបំផុតនៅក្នុងភូមិសាស្រ្តនយោបាយ។ បើតាមលោក Marcos ហ្វីលីពីនត្រូវតែដើរលើផ្លូវខ្លួនឯង៕