កីឡាជាតិ
ជាតិ
លោក ហែម គីរី នឹងបញ្ចូនអត្តពលិកហែលទឹក ហ្វឹកហាត់ក្រៅប្រទេស ដើម្បីសម្រេចមេដាយស៊ីហ្គេម ២០២៣ លោក ហែម គីរី និងអត្តពលិកហែលទឹកកម្ពុជា នាការប្រកួតស៊ីហ្គេមនៅវៀតណាម(ប្រភពសហព័ន្ធកីឡាហែលទឹកកម្ពុជា)
×
ដោយ៖ហៀក ឆក
អត្តពលិកហែលទឹកកម្ពុជា នឹងត្រូវទៅហ្វឹកហាត់ក្រៅប្រទេស ដើម្បីត្រៀមប្រកួតដណ្ដើមមេដាយស៊ីហ្គេមលើកទី៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។
លោក ហែម គីរី អគ្គលេខាធិការសហព័ន្ធកីឡាហែលទឹកកម្ពុជា បាននិយាយថា ការប្រកួតស៊ីហ្គេមលើកទី៣១ នៅវៀតណាម បានបង្ហាញពីការវាស់ស្ទង់សមត្ថភាព បទពិសោធ និងបច្ចេកទេសអត្តពលិកកម្ពុជា។ ជាពិសេសកម្ពុជា បានមេដាយសំរឹទ្ធ១ នៅស៊ីហ្គេម ជាលើកដំបូង ចាប់តាំងពីចូលរួមប្រកួតឡើងវិញ នៅឆ្នាំ១៩៩៥។ ដើម្បីសម្រេចបានមេដាយ លើប្រភេទកីឡាហែលទឹក ក្នុងនាមម្ចាស់ផ្ទះស៊ីហ្គេមលើកទី៣២នោះ លោក ហែម គីរី ត្រៀមបញ្ចូនអត្តពលិកហែលទឹក ទៅហ្វឹកហាត់ក្រៅប្រទេសផងដែរ។
អគ្គលេខាធិការសហព័ន្ធកីឡាហែលទឹកកម្ពុជា។បានប្រាប់សារពត៌មានថ្មីៗ តាមរយៈហ្វេសប៊ុកថា៖ «កីឡាករ កីឡាការិនីវ័យក្មេងរបស់យើង គឺមានសន្ទស្សន៍រីកចម្រើនខ្ពស់ផ្នែកបច្ចេកទេស ក្នុងនោះក៏មានកីឡាការិនីយើង បានបំបែកឯកត្តកម្មថ្នាក់ជាតិ និងមានកីឡាហែលទឹកជើងទាជាក្រុម ទទួលបានមេដាយសំរឹទ្ធ ១ នៅស៊ីហ្គេមលើកទី៣១ នៅប្រទេសវៀតណាម ដែលជាលទ្ធផលដំបូងរបស់យើង ។ ហើយយើងនឹងបញ្ជូនកីឡាករកីឡាការិនី យើងចេញទៅហ្វឹកហាត់នៅក្រៅប្រទេសនាពេលឆាប់ៗនេះ»។
កីឡាករ លឹម កែវឧត្តម ជាកីឡាករ១រូប ក្នុងក្រុមកីឡាហែលទឹក ដែលទទួលបានមេដាយសំរឹទ្ធនៅស៊ីហ្គេមលើកទី៣១ លើវិញ្ញាសាហែលបណ្តាក់ ៤x២០០ម (surface) បាននិយាយថា ការប្រកួតនោះ ជួបសុទ្ធសឹងតែកីឡាករដែលមានបច្ចេកទេស និងបទពិសោធច្រើន ដូច្នេះក្នុងការប្រកួតស៊ីហ្គេមលើកទី៣២ មានតែការខិតខំប្រឹងប្រែងថែមទៀត។
«ខ្ញុំទទួលបានបទពិសោធន៍ច្រើនដែលបានជួបកីឡាករខ្លាំងៗដូចជា ឥណ្ឌូណេស៊ី, វៀតណាម, ហ្វីលីពីន និងថៃ ដែលសុទ្ធសឹងតែមានបច្ចេកទេស និងបទពិសោធខ្លាំង ។ សម្រាប់ស៊ីហ្គេមលើកទី៣២ ខ្ញុំមានតែការខិតខំប្រឹងប្រែងបន្ត»។ សម្តីរបស់កីឡាករ លឹម កែវឧត្តម។
គួបញ្ជាក់ផងដែរថា កីឡាហែលទឹកកម្ពុជា ចូលរួមប្រកួតខ្នាតអន្តរជាតិពីឆ្នាំ ១៩៩៥ មក ដោយមានអតីតកីឡាករឆ្នើម ហែម ថុន ចូលរួមប្រកួត។ នៅស៊ីហ្គេមលើកទី ៣១ កីឡានេះទទួលបានមេដាយសំរឹទ្ធ ១ លើវិញ្ញាសាហែលបណ្តាក់៤x២០០ម ដែលជាលើកដំបូងសម្រាប់សហព័ន្ធកីឡាហែលទឹកកម្ពុជា៕
Tag:
មេដាយ
កីឡាហែលទឹក
កម្ពុជា
© រក្សាសិទ្ធិដោយ thmeythmey.com