គិតត្រឹមថ្ងៃទី៣ ខែមិថុនា វាមានរយៈពេល ១០០ថ្ងៃហើយ ដែលសង្រ្គាមនៅអ៊ុយក្រែននៅតែបន្ត ខណៈរុស្ស៊ីកំពុងផ្តោតការវាយប្រហារនៅតំបន់ដុនបាស។ ចំណែកកិច្ចចរចាស្វែងរកសន្តិភាពវិញ ត្រូវបានផ្អាកអស់រយៈពេលជាច្រើនថ្ងៃ។ ស្របពេលរុស្ស៊ី និងអ៊ុយក្រែន មិនទាន់មានដំណោះស្រាយបែបនេះ ប្រមុខសម្ព័ន្ធយោធាណាតូ លោក Jens Stoltenberg បានជំរុញឱ្យបណ្តាប្រទេសលោកខាងលិចត្រៀមខ្លួន សម្រាប់សង្រ្គាមរយៈពេលវែងជាមួយរុស្ស៊ី។ 

 

«យើងត្រូវតែត្រៀមខ្លួនឱ្យរួចរាល់សម្រាប់រយៈពេលវែង»។ លោក Stoltenberg បានថ្លែងបែបនេះ នៅក្នុងសន្និសីទសារព័ត៌មានមួយ បន្ទាប់ពីជំនួបជាមួយលោក ចូ បៃឌិន ប្រធានាធិបតីអាម៉េរិក នៅថ្ងៃទី២ ខែមិថុនា ។ លោកបន្តថា អ្វីដែលសម្ព័ន្ធយោធាណាតូបានឃើញ គឺសង្រ្គាមមួយនេះ កំពុងវិវដ្ដជាសង្រ្គាម ដែលបង្កឱ្យមានការខូតខាតសម្រាប់ភាគីទាំងសងខាង។ 

 

នៅចំពោះមុខអ្នកសារព័ត៌មានក្នុងក្រុងវ៉ាស៊ីនតោន អគ្គលេខាធិការអង្គការណាតូរូបនេះ បានបញ្ជាក់ជាថ្មីថា ប្លុកយោធារបស់ខ្លួន មិនចង់ប្រឈមមុខដោយផ្ទាល់ជាមួយរុស្ស៊ីឡើយ ប៉ុន្តែសម្ព័ន្ធយោធាណាតូ មានការទទួលខុសត្រូវ ក្នុងការគាំទ្រអ៊ុយក្រែនឱ្យមានសមត្ថភាពខ្លួន។ បើតាមមេដឹកនាំអង្គការណាតូ អ៊ុយក្រែន បានទទួលរងផលវិបាកជាច្រើនដោយសារតែការការពារប្រទេសរបស់ខ្លួននៅតំបន់ប្រយុទ្ធ ប៉ុន្តែកម្លាំងរុស្ស៊ី ក៏មានរបួស និងស្លាប់ ក្នុងកម្រិតខ្ពស់ដែរ។ 

 

យ៉ាងណា លោក Stoltenberg បានបន្តទៀតថា សង្រ្គាមមួយនេះ នឹងបញ្ចប់ដោយកិច្ចចរចា ប៉ុន្តែកិច្ចចរចានោះ អាចសម្រេចទៅបាន គឺអាស្រ័យលើស្ថានការណ៍ប្រយុទ្ធ៕