អន្តរជាតិ
កម្មកររង់ចាំបន្ទាប់ពីយកបាវអង្ករទៅក្នុងផ្សារលក់ដុំមួយ ក្នុងអំឡុងពេលដែលប្រទេសស្រីលង្កានេះមានវិបត្តិសេដ្ឋកិច្ច នៅរដ្ឋធានីកូឡុំបូ ។ រូបថត រ៉យទ័រ
×![]()
ដោយ: VOA
ប្រទេសស្រីលង្កាដែលកំពុងប្រឈមនឹងវិបត្តិហិរញ្ញវត្ថុដ៏ខ្លាំងនៅពេលនេះ កំពុងមានអតិផរ ណាក្នុងកម្រិតខ្ពស់បំផុតដែលមិនធ្លាប់មានកាលពីពេលមុនក្នុងរយៈពេល៨ខែជាប់ៗគ្នា រហូតមកដល់ខែឧសភានេះ ខណៈដែលប្រទេសដែនកោះមួយនេះ កំពុងតស៊ូទប់ទល់នឹងវិបត្តិសេដ្ឋកិច្ចដ៏អាក្រក់របស់ខ្លួន។ នេះបើតាមទិន្នន័យផ្លូវការដែលបានបង្ហាញឱ្យដឹងកាលពីថ្ងៃពុធ ហើយត្រូវបានរាយការណ៍ដោយទីភ្នាក់ងារព័ត៌មាន AFP។
សន្ទស្សន៍តម្លៃទំនិញប្រើប្រាស់ក្នុងរដ្ឋធានីកូឡំបូនៃប្រទេសស្រីលង្កាបានឡើងចំនួន៣៩,១ភាគរយនៅក្នុងខែឧសភានេះគឺឡើងពីចំនួន២៩,៨ភាគរយកាលពីខែមេសាកន្លងទៅ។ នេះបើតាមការឱ្យដឹងរបស់នាយកដ្ឋានស្ថិតិជាតិរបស់ស្រីលង្កា។
អតិផរណាម្ហូបអាហារនៅក្នុងរដ្ឋធានីកូឡំបូបានឡើងដល់៥៧,៤ភាគរយក្នុងខែឧសភាគឺ ឡើងពីចំនួន៤៦,៦ភាគរយកាលពីខែមេសា។
ការឡើងថ្លៃដ៏ខ្ពស់នេះនៅមិនទាន់រាប់បញ្ចូលតម្លៃប្រេងឥន្ធនៈដែលកំពុងឡើងថ្លៃខ្លាំងនៅក្នុងប្រទេសនេះដែលជាទំនិញប្រើប្រាស់ដ៏សំខាន់មួយក្នុងចំណោមមុខទំនិញសំខាន់ៗផ្សេងទៀតដែលស្រីលង្កាកំពុងប្រឈមការខ្វះខាតការផ្គត់ផ្គង់នៅទូទាំងប្រទេស។
ស្រីលង្កាដែលមានសេដ្ឋកិច្ចពឹងផ្អែកទៅលើការនាំចូលពីក្រៅប្រទេសបានប្រឈមនឹងកង្វះខាតរូបិយវត្ថុបរទេសយ៉ាងខ្លាំងដែលជំរុញឱ្យមានកង្វះខាតស្បៀងអាហារ ថ្នាំពេទ្យនិងទំនិញប្រើប្រាស់ចាំបាច់ផ្សេងៗទៀត។
ដោយប្រឈមនឹងការខ្វះខាតប្រាក់ដ៏ខ្លាំងនោះ រដ្ឋាភិបាលស្រីលង្កាកាលពីថ្ងៃអង្គារ បានបង្កើនការយកពន្ធលើគ្រប់វិស័យទាំងអស់ហើយបានដកចេញបទបញ្ជាកាត់បន្ថយពន្ធដារដែលបានដាក់ចេញដោយប្រធានាធិបតីស្រីលង្កាលោកGotabaya Rajapaksa កាលពីខែវិច្ឆិកា ឆ្នាំ២០១៩។
ការធ្វើបាតុកម្មប្រឆាំងតវ៉ាអស់រយៈពេលជាច្រើនសប្តាហ៍របស់ពលរដ្ឋស្រីលង្កានៅខាងមុខវិមានប្រធានាធិបតីបានទាមទារឱ្យប្រធានាធិបតីស្រីលង្កាចុះចេញពីតំណែងដោយសារតែរដ្ឋាភិបាលរបស់លោកបានបរាជ័យក្នុងការដោះស្រាយវិបត្តិដែលកំពុងកើតមានឡើងនៅក្នុងប្រទេសនេះ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 5 ថ្ងៃ
