អន្តរជាតិ
ការសិក្សា៖ ការឡើងកម្ដៅផែនដីបង្កើនហានិភ័យនៃជំងឺរាតត្បាតថ្មី រូបភាព៖ AFP
× តាមការសិក្សាថ្មីមួយ ការកើនឡើងកម្ដៅផែនដីមិនត្រឹមតែបង្កឱ្យមានគ្រោះធម្មជាតិប៉ុណ្ណោះទេ វាបានបង្កឱ្យមានវីរុសថ្មី និងជំងឺឆ្លងថ្មីកើនឡើងនៅថ្ងៃអនាគត។ បម្រែបម្រួលអាកាសធាតុនឹងធ្វើឱ្យពពួកសត្វជាច្រើនប្រភេទ រួមទាំងមនុស្សផ្លាស់ប្ដូរទីលំនៅទៅកន្លែងត្រជាក់ដែលសមស្របសម្រាប់ជីវិត។ ដំណើរនេះបានធ្វើឱ្យវីរុសថ្មីៗ ប្រហែល ៤ពាន់ប្រភេទដែលរស់នៅជាមួយសត្វ មានឱកាស ខ្ពស់ក្នុងការចម្លងមកមនុស្ស និងបង្កជាជំងឺរាតត្បាតផ្សេងៗ។
នៅពេលនិយាយអំពីបញ្ហាបម្រែបម្រួលអាកាសធាតុ មនុស្សគ្រប់គ្នា តែងនឹកដល់គ្រោះធម្មជាតិ ក៏ដូចជាគ្រោះរាំងស្ងួត និងគ្រោះទឹកជំនន់។ យ៉ាងណាមិញ ផលវិបាកនៃបម្រែបម្រួលអាកាសធាតុ នឹងចូលរួមបង្កើតវីរុសថ្មី ដែលបង្កជាជំងឺថ្មីថែមទៀត។ ការកើនឡើងកម្ដៅផែនដី នឹងជំរុញឱ្យពពួកសត្វផ្លាស់ប្ដូរលំនៅ ខណៈមនុស្សក៏ធ្វើដូចគ្នា។ ជាលទ្ធផល វីរុសដែលរស់នៅជាប់នឹងសត្វមានឱកាសខ្ពស់ ក្នុងការឆ្លងមកមនុស្ស ហើយបង្កជាជំងឺរាតត្បាតថ្មី។ ការសិក្សាមួយដែលចុះផ្សាយលើទិនានុប្បវត្តិ Nature បានបង្ហាញបែបនេះ។
យ៉ាងហោចណាស់ វីរុសចំនួន១ម៉ឺនប្រភេទមានសមត្ថភាពចម្លងទៅកាន់មនុស្ស និងសត្វ ប៉ុន្តែបច្ចុប្បន្នវាទើបតែចម្លងតិចតួចប៉ុណ្ណោះក្នុងចំណោមសត្វ។ ដោយឡែក ក្រុមអ្នកស្រាវជ្រាវ បានរកឃើញថា ការកើនឡើងកម្ដៅផែនដី ទំនងជាអាចបង្កើនឱកាសឱ្យវីរុសប្រហែល ៤ពាន់ប្រភេទមានឥទ្ធិពលឆ្លងមកកាន់មនុស្សនៅឆ្នាំ២០៧០។ ក្នុងចំណោមសត្វជាច្រើនដែលបានសិក្សា សត្វប្រចៀវជាសត្វដែលបង្កហានិភ័យនៃការចម្លងវីរុសខ្លាំងជាងគេ ព្រោះវាជាសត្វដែលអាចហើរបាន។
អ្នកជំនាញអាកាសធាតុបានអះអាងថា បណ្តាប្រទេសអាហ្រ្វិក និងអាស៊ី គឺជាអ្នកប្រឈមមុខនឹងការគំរាមកំហែងដ៏ធំបំផុតនៃការកើនឡើងវីរុសថ្មី។ បណ្តាប្រទេសអាហ្រ្វិក និងអាស៊ី តែងក្លាយជាអ្នករងគ្រោះខ្លាំងជាងគេ ដោយសារបញ្ហាបរិស្ថាន ខណៈប្រទេសទាំងនេះ បានចូលរួមចំណែកបង្កើតបញ្ហា បរិស្ថានតិចតួចប៉ុណ្ណោះ។ ជាក់ស្ដែង ជំងឺឆ្លងជាច្រើនរួមមានជំងឺអេដស៍ ជំងឺអ៊ីបូឡា និងជំងឺកូវីដ-១៩ បានរាលដាលយ៉ាងខ្លាំងពីសត្វមកមនុស្ស ក្នុងរយៈពេលមួយទសវត្សរ៍ចុងក្រោយនេះ។
ស្របពេលពិភពលោកកំពុងប្រែប្រួលជារៀងរាល់ថ្ងៃ ការវិវដ្តនៃជំងឺឆ្លងត្រូវបានអ្នកវិទ្យាសាស្ត្រអះអាងពីការប្រែប្រួលរបស់វាទៅរកសភាពកាន់តែអាក្រក់។ នៅថ្ងៃអនាគត ពិភពលោកមិនត្រឹមតែក្ដៅជាងមុនទេ មនុស្សលោកក៏មានបញ្ហាសុខភាពច្រើនជាងមុនដែរ៕
Tag:
បម្រែបម្រួលអាកាសធាតុ
© រក្សាសិទ្ធិដោយ thmeythmey.com