ដោយភ័យខ្លាចពីការវាយប្រហាររបស់រុស្ស៊ី ហ្វាំងឡង់ និងស៊ុយអែតបានដាក់ពាក្យសុំចូលជាសមាជិកណាតូជាផ្លូវការ កាលពីពាក់កណ្តាល ខែឧសភា ដើម្បីស្វែងរកការការពារបែបសមូហភាព។ ប៉ុន្តែតួកគីបានបង្ហាញជំហរប្រឆាំងនឹងសមាជិកភាពរបស់ប្រទេសពីរនេះ លុះត្រាតែហ្វាំងឡង់ និងស៊ុយអែតឆ្លើយតបទៅនឹងក្តីបារម្ភរបស់ខ្លួនជុំវិញបក្សពលករឃើដ និងក្រុមផ្សេងទៀតដែលតួកគីចាត់ទុកថាជាភេរវករ។ តួកគី បានចោទហ្វាំងឡង់ និងស៊ុយអែតថាបានផ្តល់កន្លែងស្នាក់នៅដល់ជនជាតិឃើដ ដែលត្រូវបានចាត់ទុកជាភេរវករ

 

ស្របពេលបើកដៃទាំងពីរទទួលយកសមាជិកភាពរបស់ប្រទេសអឺរ៉ុបខាងជើងទាំងពីរនេះ ប្រមុខសម្ព័ន្ធយោធាណាតូលោក Jens Stoltenberg ក៏បានចាត់ទុកក្តីបារម្ភរបស់តួកគីជារឿងសំខាន់ដល់សន្តិសុខរបស់សម្ព័ន្ធយោធាណាតូដែរ។ 

 

«ក្តីបារម្ភទាំងនេះ គឺស្របទៅតាមច្បាប់របស់ណាតូ។ នេះគឺជាបញ្ហាអំពីភារវកម្ម និងការនាំចេញអាវុធ»។ ប្រមុខណាតូ បានសង្កត់ធ្ងន់បែបនេះអំឡុងសន្និសីទកាសែតរួមជាមួយប្រធានាធិបតីហ្វាំងឡង់ លោក Sauli Niinisto នៅហ្វាំងឡង់នៅថ្ងៃទី១២ ខែមិថុនា។ បើតាមលោក Stoltenberg គ្មានសមាជិកណាតូណារងការវាយប្រហារពីភេរវករខ្លាំងជាងតួកគីឡើយ។

 

បើទោះហ្វាំងឡង់ និងស៊ុយអែត បានចរចាជាមួយតួកគីជុំវិញសមាជិកភាពអង្គការណាតូក្តី ប៉ុន្តែកិច្ចពិភាក្សាទាំងនោះ មិនទាន់សម្រេចបានតាមការចង់បានរបស់ភាគីណាមួយឡើយ។ នៅថ្ងៃដដែល លោក Stoltenberg និងលោក Niinisto អះអាងថា ខ្លួននឹងបន្តចរចាជាមួយក្រុងអង់ការ៉ាឱ្យបានលឿនតាមដែលអាចធ្វើទៅបាន បើទោះជាកិច្ចប្រជុំកំពូលណាតូនៅអេស្ប៉ាញនៅចុងខែមិថុនាខាងមុខនេះទំនងជាមិនអាចពន្លឿនការចូលជាសមាជិកភាពរបស់ហ្វាំងឡង់ និងស៊ុយអែតក៏ដោយ។ 

 

រដ្ឋមន្រ្តីការបរទេសស៊ុយអែតលោកស្រីអាន លីនដេ កាលពីសប្តាហ៍មុនក៏បានប្រកាសរកកិច្ចចរចាបន្តប្រកបដោយការស្ថាបនាជាមួយតួកគីផងដែរ។ 

 

ក្នុងសន្និសីទដដែល លោក Stoltenberg បានចាត់ទុកតួកគីជាសម្ព័ន្ធមិត្តណាតូដ៏សំខាន់មួយ ដោយសារប្រទេសនេះស្ថិតនៅជាប់សមុទ្រខ្មៅ ហើយនៅចន្លោះតំបន់អឺរ៉ុប និងមជ្ឈិមបូព៌ាដែលជាទីតាំងយុទ្ធសាស្រ្ត។ កន្លងមក តួកគីបានចូលរួមជាមួយលោកខាងលិចទទួលយកជនភៀសខ្លួនអ៊ុយក្រែន និងជួយជម្លៀសជនរងគ្រោះអ៊ុយក្រែនរាប់ម៉ឺននាក់ចេញពីតំបន់សង្រ្គាម ក៏ដូចជាបានលក់ដ្រូនឱ្យអ៊ុយក្រែន ដើម្បីប្រយុទ្ធប្រឆាំងរុស្ស៊ីផងដែរ៕