ក្រោយការប៉ះទង្គិចគ្នារវាងអ្នកកាន់សាសនាឥស្លាម ​និងហិណ្ឌូនៅឥណ្ឌា មេដឹកនាំនៃក្រុមមូស្លីមល្បីៗបានចេញសារមួយជំរុញឱ្យសាវ័ករបស់សាសនាមួយនេះ ផ្អាកការតវ៉ា។ សារដែលធ្វើឡើងនោះ គឺដើម្បីចៀសវាងការប្រមូលផ្ដុំធ្វើបាតុកម្មដ៏ធំ បន្ទាប់ពីបាតុកម្មនៅសប្តាហ៍មុន បានឈានទៅរកហិង្សា​ ដែលបណ្តាលឱ្យក្មេងជំទង់មូស្លីមពីរនាក់ស្លាប់ និងមានអ្នករងរបួសជាង ៣០ នាក់ រួមទាំងប៉ូលិសផងដែរ។

 

«វាជាកាតព្វកិច្ចរបស់មូស្លីមគ្រប់រូបក្នុងការឈរជាមួយគ្នា នៅពេលដែលនរណាម្នាក់មើលងាយសាសនាឥស្លាម ប៉ុន្តែនៅពេលជាមួយគ្នានោះ វាគឺមានសារៈសំខាន់ណាស់ក្នុងការថែរក្សាសន្តិភាព»។ លោក Malik Aslam សមាជិកជាន់ខ្ពស់នៃក្រុម Jamaat-e-Islami Hind អង្គការឥស្លាមដែលប្រតិបត្តិការនៅក្នុងរដ្ឋឥណ្ឌាមួយចំនួន បាននិយាយបែបនេះនៅថ្ងៃទី១២ ខែមិថុនា។ 

 

គួររំលឹកថា នៅចុងខែឧសភា និងដើមខែមិថុនា អ្នកនាំពាក្យជាន់ខ្ពស់ពីររូបរបស់គណបក្ស Bharatiya Janata (BJP) ដែលជាបក្សជាតិនិយមមាននិន្នាការរកហិណ្ឌូរបស់នាយករដ្ឋមន្ត្រី​ នារិន្ទ្រា ម៉ូឌី បានប្រមាថដល់ប្រជាជនមូស្លីម​។​ ការប្រមាថនេះធ្វើឡើង២ដង ដោយមួយលើកនៅក្នុងកម្មវិធីជជែកដេញដោលមួយដែល​បានចាក់ផ្សាយលើទូរទស្សន៍ និងមួយទៀតនៅលើប្រព័ន្ធផ្សព្វផ្សាយសង្គម។

 

ក្រោយកើតបញ្ហានេះ បក្ស Bharatiya Janata បានសម្រេចព្យួរសមាជិកភាពរបស់បុគ្គលទាំង២។ លើសពីនេះ បក្ស Bharatiya Janata បាន​ថ្កោលទោស​រាល់​ការ​ប្រមាថ​ចំពោះ​សាសនា​ណាមួយ។ ប៉ូលិសឥណ្ឌា ក៏បានដាក់ពាក្យបណ្តឹងជាផ្លូវការប្រឆាំងនឹងអ្នកទាំងពីរដែរ ដែលនេះជាជំហានមួយអាចឈានទៅដល់ការស៊ើបអង្កេតជាផ្លូវការ។ យ៉ាងណាមិញ បើទោះបីជាមានចំណាត់ការទាំងនេះក្តី ប្រជាជនមូស្លីមនៅតែបន្តខឹងសម្បារ និងធ្វើបាតុកម្ម។ 

 

ប៉ូលិសឥណ្ឌាបាននិយាយថា ពួកគេបានចាប់ខ្លួនជនសង្ស័យយ៉ាងតិច ៤០០នាក់ អំឡុងពេលមានចលាចលក្នុងរដ្ឋមួយចំនួន។ ទន្ទឹមនេះ បម្រាមគោចរត្រូវបានអនុវត្តក្នុងប្រទេស ខណៈសេវាអ៊ីនធឺណិតត្រូវបានកាត់ផ្តាច់នៅកន្លែងខ្លះ៕