កសិករដែលរស់នៅជុំវិញបឹងទន្លេសាប កំពុងប្រឈមមុខកាន់តែខ្លាំងឡើងនឹងខ្វះខាតទឹក និងការសឹករេចរឹលដី ដែលធ្វើឱ្យប៉ះពាល់ដល់ការប្រកបរបររបស់ពួកគេ។ ការថយចុះគុណភាពដីកសិកម្ម មានន័យថា កសិករត្រូវពឹងផ្អែកកាន់តែខ្លាំងលើជីគីមីដើម្បីបង្កើនទិន្នផល ដែលតម្រូវឱ្យចំណាយលុយច្រើន ស្របពេលពួកគាត់ជួបការលំបាកជាច្រើនស្រាប់ហើយនោះ។
«រាល់រដូវធ្វើស្រែម្ដងៗ បញ្ហាប្រឈមជាងគេសម្រាប់កសិករ គឺខ្វះលុយ និងទឹក»។ លោក រ៉េត ភាច កសិករនៅឃុំសាគ្រាម ខេត្តកំពង់ធំនិយាយបែបនេះ។ អង្គុយក្រោមផ្ទះឈើធ្លុះធ្លាយដោយអន្លើចម្ងាយប្រមាណ៨០គីឡូម៉ែត្រពីបឹងទន្លេសាប លោក ភាច បន្តថា ពីមុន មិនដែលខ្វះទឹកឡើយ ហើយគ្រោះរាំងស្ងួត ក៏មិនងាយមានដែរ តែឥឡូវធាតុអាកាសប្រែប្រួលពិបាកស្មាន តែលោកមិនដឹងមកពីអ្វីឡើយ។
ស្របពេលខ្វះទឹក កង្វះប្រព័ន្ធស្រោចស្រព រឹតតែធ្វើឱ្យបញ្ហាកាន់តែយ៉ាប់។ អ្នកជំនាញជាច្រើនព្រមានថា ប្រព័ន្ធអេកូឡូស៊ីទន្លេ រងការបំផ្លាញធ្ងន់ធ្ងរនៅប៉ុន្មានឆ្នាំចុងក្រោយនេះ។ លំហូរទឹកចេញចូលបឹងទន្លេសាប ពឹងផ្អែកលើទន្លេមេគង្គដើម្បីបំពេញការផ្គត់ផ្គង់ទឹកឡើងវិញតាមរយៈទន្លេសាបនារដូវវស្សា បន្ទាប់ពីហូរចេញនៅរដូវប្រាំង។
ក្នុងរដូវប្រាំងដែលមានរយៈពេលប្រាំមួយខែចាប់ពីខែធ្នូ ដល់ខែមេសា បឹងនេះគ្របដណ្តប់លើផ្ទៃដីប្រហែល១៥០០គីឡូម៉ែត្រការ៉េ ហើយរីកមាឌរហូតដល់៦ដងនៃទំហំដើមរបស់វាក្នុងរដូវវស្សាចាប់ពីខែឧសភាដល់ខែវិច្ឆិកា។ ប៉ុន្តែវិបត្តិអាកាសធាតុដែលកើនឡើងខ្លាំង រួមផ្សំនឹងកត្តាផ្សេងៗទៀតជាពិសេសការសាងសង់ទំនប់វារីអគ្គិសនីថ្មីនៅតាមដងទន្លេ បានធ្វើឱ្យកម្រិតទឹកក្នុងបឹងធ្លាក់ចុះ។ យោងតាមរបាយការណ៍របស់គណៈកម្មការទន្លេមេគង្គ ចាប់តាំងពីឆ្នាំ២០១៨ កម្រិតទឹកបឹង បានចុះទាបជាងកម្រិតមធ្យមជាប្រវត្តិសាស្ត្រទៀតផង។
យ៉ាងណាមិញ ក្នុងឆ្នាំនេះ បរិមាណទឹកបឹងត្រូវបានចាត់ទុកថា មានកម្រិតធម្មតាគិតត្រឹមថ្ងៃទី២៣ ខែឧសភា ដែលខ្ពស់ជាងកម្រិតមធ្យមរយៈពេលវែងបន្តិច និងខ្ពស់ជាងកម្រិតក្នុងឆ្នាំ២០១៩ ២០២០ និង២០២១។
ផែនទីបង្ហាញពីស្រុកសូទ្រនិគម ខេត្តសៀមរាប និងឃុំសាគ្រាម ខេត្តកំពង់ធំ។ រចនាដោយ ទូច សុវណ្ណឌី
ហេតុអ្វីដីកសិកម្មនៅជុំវិញបឹងទន្លេសាបលែងសូវមានជីវជាតិ?
លោកស្រី Abby Seiff អ្នកកាសែតជនជាតិអាមេរិក និងជាអ្នកនិពន្ធសៀវភៅមួយក្បាលដែលមានចំណងជើងថា៖ «Troubling the Water: A Dying Lake and a vanishing World in Cambodia» យល់ស្របថា បឹងទន្លេសាបដែលជាបឹងទឹកសាបដ៏ធំ និងសំខាន់បំផុតនៅអាស៊ីអាគ្នេយ៍ បានទទួលរងការគំរាមកំហែងពីកត្តាជាច្រើនដូចជាការបាត់បង់ព្រៃលិចទឹក ការប្រែប្រួលជលសាស្ត្រ ក៏ដូចជាបម្រែបម្រួលអាកាសធាតុ។
ប៉ុន្តែលោកស្រីកត់សម្គាល់ថាការប្រែប្រួលផ្នែកជលសាស្ត្រ ពោលគឺលំហូរទឹកចេញបឹងទន្លេសាប បានជះឥទ្ធិពលមិនត្រឹមលើប្រព័ន្ធអេកូឡូស៊ីឡើយ តែក៏កើតលើដីស្រែជុំវិញបឹងដែរ។
«នៅរដូវវស្សា ដីទំនាបជុំវិញ ត្រូវជន់លិចដោយទឹក និងដីល្បាប់សម្បូរជីជាតិ ដែលពិតជាសំខាន់សម្រាប់ដំណាំស្រូវ»។ លោកស្រី Abby លើកឡើងបែបនេះ រួចបន្តថា ដូច្នេះការប្រែប្រួលជលសាស្រ្តមិនប៉ះពាល់ត្រឹមតែលើត្រីឡើយ វាក៏ប៉ះពាល់ដល់កសិកម្មនៅជុំវិញនោះដែរ។
លោក ឡេង វីរ៉ា មន្រ្តីបច្ចេកទេស និងជាអ្នកស្រាវជ្រាវកសិកម្មនៅនាយកដ្ឋានគ្រប់គ្រងធនធាន និងកសិកម្មនៃអគ្គនាយកដ្ឋានកសិកម្មលើកឡើងថា កត្តាដែលធ្វើឱ្យដីរេចរឹលនៅជុំវិញបឹងទន្លេសាប ទៅហួសពីអ្វីដែលកសិករអាចយល់បានទៅទៀត។
ប្រព័ន្ធកសិអេកូឡូស៊ីនេះ មានភាពផុយស្រួយដោយសារកត្តាជាច្រើន។ ការកាប់ព្រៃឈើដើម្បីយកដីធ្វើស្រែកាន់តែច្រើន ការដាំដុះដំណាំមួយតែមុខ កង្វះការគ្រប់គ្រងលើការប្រើប្រាស់ដីជាទូទៅ និងគម្រោងអភិវឌ្ឍន៍ធំ សុទ្ធតែមានចំណែកក្នុងការធ្វើឱ្យមានបម្រែបម្រួលប្រព័ន្ធអេកូឡូស៊ីដ៏មានផលិតភាពមួយរបស់ពិភពលោក។
លោក វីរ៉ា អះអាងដូច្នេះ៖ «ព្រៃឈើនៅតំបន់នោះត្រូវបានកាប់ឆ្ការ និងប្រែក្លាយទៅជាដីកសិកម្ម។ បើគ្មានព្រៃឈើទេ ការរេចរឹលដីអាចកើតឡើងយ៉ាងងាយ។ ហើយបើយើងមើលព្រៃលិចទឹក ក៏ត្រូវបំផ្លាញដែរ។ នោះហើយជាមូលហេតុដែលបង្ខំឱ្យកសិករបង្កើនការប្រើប្រាស់សារធាតុគីមីពីមួយឆ្នាំទៅមួយឆ្នាំ។ បើមិនធ្វើបែបនេះទេ ពួកគាត់មិនអាចប្រមូលផលបានទេ»។
សម្រាប់កសិករដូចលោកភាច ការធ្លាក់ចុះជីជាតិរបស់ដី ជារឿងធម្មជាតិ ហើយវាជារឿងធម្មតាសម្រាប់គាត់ដែលត្រូវប្រើសារធាតុគីមី ប្រសិនបើចង់ធ្វើស្រែខុសរដូវនោះ។ ការប្រើប្រាស់ជីគីមីកាន់តែច្រើន ជាមធ្យោបាយតែមួយគត់ដើម្បីធានាទិន្នផលស្រូវ។
ទិដ្ឋភាពវាលស្រែនៅស្រុកសូទ្រនិគម ខេត្តសៀមរា។ រូបថតដោយ សែម វណ្ណា
ជីគីមីឡើងថ្លៃ ក្លាយជាអម្រែកសម្រាប់កសិករ
ខណៈបរិមាណទឹកភ្លៀងកើនឡើងដែលធ្វើឱ្យមិនមែនជាបញ្ហាអ្វីនោះសម្រាប់ឆ្នាំនេះ ការឡើងថ្លៃតម្លៃជីកាន់តែបង្កការលំបាកសម្រាប់លោក ភាច។ កសិករខេត្តកំពង់ធំរូបនេះ និយាយថា ជាធម្មតា គាត់ចំណាយប្រាក់ជិតមួយលានរៀលទៅលើជីគីមីដើម្បីធ្វើស្រែ និងដាំបន្លែ។ ប៉ុន្តែនៅឆ្នាំនេះ គាត់បានចំណាយជិតទ្វេដងលើបរិមាណជីគីមីដូចគ្នា ដោយត្រូវប្រើជីប្រហែល៣៥០គីឡូក្រាមលើផ្ទៃដីស្រែទំហំ២ហិកតា និង២០០គីឡូក្រាមទៀតសម្រាប់ចម្ការបន្លែមួយហិកតា។
«មួយរដូវត្រូវប្រើរហូតដល់៥៥០គីឡូក្រាម ហើយមិនរាប់ថ្នាំសម្លាប់សត្វល្អិត និងថ្នាំសម្លាប់ស្មៅផង»។ បុរសជាឪពុកដែលមានកូនបីនាក់ពន្យល់បែបនេះ មុនបន្តទៀតថា ការប្រើជីគីមី ក្លាយជាទម្លាប់ទៅហើយ ព្រោះដីកាន់តែរេចរឹល។ បើតាមលោកភាច ការធ្វើស្រែចំការ ជាប្រភពចំណូលតែមួយគត់របស់គ្រួសារគាត់ ហើយទិន្នផលក៏ថយចុះ នៅពេលកាត់បន្ថយការប្រើជីគីមីនោះ។
«ក្តីបារម្ភរបស់ខ្ញុំគឺតម្លៃនឹងបន្តកើនឡើង។ ពីមុន ខ្ញុំចំណាយពី៨ម៉ឺនរៀលទៅ៩ម៉ឺនរៀលដើម្បីទិញជីគីមី៥០គីឡូក្រាម។ ឥឡូវនេះតម្លៃឡើងដល់ចន្លោះពី១៣ម៉ឺនរៀលទៅ១៥ម៉ឺនរៀល ឬខ្ពស់ជាងនេះទៅទៀត»។ លោក ភាច បន្តរៀបរាប់ដូច្នេះ។
ការឡើងថ្លៃរបស់ជីគីមី កើតឡើងនៅពេលដែលកសិករដូចជាលោកភាចដែលរស់នៅជុំវិញបឹងទន្លេសាប ត្រូវតស៊ូយ៉ាងលំបាកដើម្បីជីវិតប្រចាំថ្ងៃ ចំពេលដែលបម្រែបម្រួលអាកាសធាតុក៏ជះឥទ្ធិពលកាន់តែខ្លាំង រដូវវស្សាក៏ប្រែប្រួល និងការកើនឡើងតម្លៃឧបករណ៍កសិកម្មផងនោះ។
លោកស្រី រ៉េត ថាន អាយុ៣៧ឆ្នាំ រស់នៅឃុំពងសត្វ ស្រុកសូទ្រនិគម នៃខេត្តសៀមរាប ក៏ប្រឹងប្រែងរក្សាគុណភាពដីស្រែរបសខ្លួនដែរ។ លោកស្រីប្រមូលផលស្រូវបានប្រមាណ ៥តោនក្នុងមួយឆ្នាំ ប៉ុន្តែការកើនឡើងតម្លៃជីគីមីបង្ខំឱ្យកសិកររូបនេះ រកចំណូលទុនបន្ថែមទៀតដើម្បីទប់ទល់រាល់ការចំណាយ។
លោកស្រី មានប្រសាសន៍ដូច្នេះថា៖ «កាលពីឆ្នាំមុន ខ្ញុំចំណាយប្រហែលមួយលានរៀលលើថ្នាំគីមី រួមទាំងថ្នាំសម្លាប់សត្វល្អិត ថ្នាំសម្លាប់ស្មៅ និងជីសម្រាប់ដីពីរហិកតា។ នេះមិនរាប់បញ្ចូលការចំណាយលើការជួលគ្រឿងចក្រកសិកម្មទេ»។ ខណៈប្រេងឡើងថ្លៃដែរនោះ លោកស្រីត្រូវចាយលុយច្រើនទៀតដើម្បីជួលគ្រឿងចក្រ។
កសិកររស់នៅក្នុងខេត្តសៀមរាប និយាយរអ៊ូបន្តទៀតថា វាពិបាកណាស់ដែលត្រូវចំណាយទ្វេដងដើម្បីរក្សាទិន្នផលឱ្យនៅដដែល។ មិនត្រឹមតែប៉ុណ្ណោះលោកស្រីក៏ទទួលស្គាល់ថា វាមិនអាចទៅរួចទៅ ដែលត្រូវធ្វើស្រែដោយមិនប្រើប្រាស់ជីនោះ។
លោកស្រី រ៉េត ថាន កសិករក្នុងខេត្តសៀមរាប។ រូបថតដោយ សែម វណ្ណា
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ កម្ពុជាបាននាំចូលថ្នាំសម្លាប់សត្វល្អិតចំនួន១០៣ ០០៥ តោន និងជីកសិកម្មចំនួន ១ ៤០៦ ៧៧៥ តោនក្នុងឆ្នាំ២០២០ ដែលភាគច្រើននាំចូលពីវៀតណាម និងថៃ។ ការនាំចូលនេះមានទំហំទឹកប្រាក់សរុបរហូតដល់ ២០៩,៥២លានដុល្លារ។ នេះបើយោងតាមទិន្នន័យស្ដីពីពាណិជ្ជកម្មអន្តរជាតិរបស់ COMTRADE ។
បំណុលវ័ណ្ឌករបស់កសិករ
កសិកររស់នៅជុំវិញបឹងទន្លេសាបដែលជាប់ខេត្ត ៩ ដែលមានមនុស្សរស់នៅសរុបប្រមាណ ៤,៨ លាននាក់បានជួបបញ្ហាបំណុលដូចគ្នា។
ការថយចុះគុណភាពដី ទាំងកើតឡើងដោយកត្តាធម្មជាតិ និងមនុស្ស បានរុញច្រានឱ្យកសិករប្រើថ្នាំគីមីកាន់តែច្រើនឡើងៗដើម្បីទទួលបានទិន្នផលខ្ពស់ ប៉ុន្តែក៏ជំរុញល្បឿនដីឱ្យកាន់តែបាត់បង់ជីជាតិដែរ។ កសិករ ក៏ត្រូវទិញថ្នាំគីមីកាន់តែច្រើនទៀតដើម្បីដោះស្រាយការរេចរឹលដីទៅវិញ ហើយចំណាយក៏កាន់តែច្រើនតាមនោះដែរ។
ការឡើងថ្លៃសារធាតុគីមីកសិកម្មដែលបង្កដោយកង្វះផលិតកម្មក្នុងស្រុករបស់កម្ពុជា ក៏ដូចជាការរំខាននៃច្រវាក់ផលិតកម្ម និងវិបត្តិនៅអ៊ុយក្រែនផងនោះ មានន័យថា កសិករត្រូវការប្រាក់បន្ថែមទៀត ដែលការណ៍នេះនឹងរុញពួកគេឱ្យធ្លាក់ចូលក្នុងវិបត្តិបំណុលដែលមិនអាចគេចផុតបាន ព្រោះត្រូវរកកម្ចីពីមីក្រូហិរញ្ញវត្ថុ ឬខ្ចីពីឯកជនដើម្បីបន្តការធ្វើស្រែចម្ការ។
ត្រង់នេះ កសិករ ភាច លើកឡើងថា ជម្រើសតែមួយគត់របស់កសិករ គឺខ្ចីនៅដើមរដូវ ហើយសងវិញនៅក្រោយប្រមូលផលរួចរាល់។ ដីបីហិកតារបស់លោកភាច ផ្ដល់ផលប្រមាណ ៨តោន។ លោកទុក៣តោនដើម្បីបរិភោគ និងលក់ចេញ៥ទៀតដោះបំណុល។
«ពេលរដូវធ្វើស្រែមកដល់ យើងធ្វើដូចពីមុនដដែល។ វាដូចជាវដ្តដែរ។ អ៊ីចឹងបានជាអ្នកខ្លះនិយាយថា ធ្វើស្រែចម្ការមិនខុសពីការរុញខ្លួនឯងឱ្យជាប់បំណុលទេ។ ដូចឆ្នាំនេះ ខ្ញុំមិនដឹងថាត្រូវប្រើជីប៉ុន្មានទេ ព្រោះយើងអត់មានលុយ។ តែបើយើងមិនធ្វើ តើយើងអាចរស់បានដោយរបៀបណា?»។ បុរសវ័យកណ្ដាលខាងលើបរិយាយបែបនេះ។
រឹតតែលំបាកថែមទៀត ការសងបំណុលវិញមិនមែនជារឿងងាយនោះឡើយ ដ្បិតថាកសិករជាច្រើនមិនបានសងបំណុលតាមកាលកំណត់ឡើយ។ ក្នុងខេត្តសៀមរាបផ្ទាល់ កសិករ ថាន បង្ហាញក្ដីបារម្ភថា ការកើនឡើងថ្លៃរបស់ថ្នាំសម្លាប់ល្អិត និងថ្នាំកសិកម្មឯទៀត សឹងតែមិនអាចឱ្យការធ្វើស្រែចម្ការហុចផលចំណេញបាននោះឡើយ។
«ថ្លៃប៉ុណ្ណាក៏ដោយ យើងនៅតែត្រូវទិញមកប្រើ។ អ៊ីចឹងខ្ញុំបារម្ភជួបការលំបាកសងបំណុលវិញ ដោយសារយើងបានប្រាក់ចំណេញតិចតួចពីការធ្វើកសិកម្មពីមួយឆ្នាំទៅមួយឆ្នាំ»។ ពលរដ្ឋខេត្តសៀមរាបដដែលនិយាយបែបនេះ។
លោក ថេង សាវឿន ប្រធានសម្ព័ន្ធសហគមន៍កសិករកម្ពុជា (CCFC) កត់សម្គាល់ថា ក្នុងវិបត្តិជំងឺកូវីដ-១៩ កសិករកម្ពុជាបានប្រឈមមុខនឹងការធ្លាក់ចុះទីផ្សារ ដោយការលក់ធ្លាក់ចុះនៅទូទាំងប្រទេស ខណៈប្រឈមមុខការកើនឡើងថ្លៃដើមផលិតកម្ម និងរងផលប៉ះពាល់នៃវិបត្តិអាកាសធាតុថែមទៀត ហើយកសិករជាច្រើន ត្រូវជំពាក់បំណុលគេជុំទិសក្នុងរយៈពេលប៉ុន្មានឆ្នាំចុងក្រោយនេះ។
«ការពិភាក្សាផ្ទៃក្នុង និងការស្ទង់មតិរបស់យើងបានរកឃើញថា បំណុលរបស់កសិករកំពុងកើនឡើង។ ពួកគេមិនត្រឹមតែខ្ចីដើមទុនសម្រាប់ធ្វើស្រែចម្ការប៉ុណ្ណោះទេ ប៉ុន្តែថែមទាំងចំណាយប្រចាំថ្ងៃទៀតផង។ វាធ្វើឱ្យពិបាកសង ហើយត្រូវជំពាក់បំណុលគេ»។ លោក សាវឿន អះអាងបែបនេះ ដោយពន្យល់ថា ការស្ទង់មតិនេះបង្ហាញពីស្ថានភាពទូទៅក្នុងវិស័យកសិកម្មកម្ពុជា។ ប្រធានសម្ព័ន្ធខាងលើបន្តថា៖ «ហើយឥឡូវនេះ តម្លៃប្រេងសាំង និងជីឡើងឥតឈប់ឈរ»។
លោក សាវឿន និយាយបន្តថា ស្រូវមួយគីឡូអាចលក់បានតម្លៃ១០០០រៀល ដែលនេះមានន័យថា កសិករម្នាក់ត្រូវលក់ស្រូវ៥គីឡូក្រាមដើម្បីទិញសាំង១លីត្រ។ បើគ្មានដំណោះស្រាយទេ លោក សាវឿន បញ្ជាក់ថា កសិករខ្លះអាចបោះបង់ការធ្វើស្រែចម្ការ ហើយប្តូរទៅប្រកបមុខរបរផ្សេងទៀត ដែលពួកគាត់សង្ឃឹមថានឹងអាចទទួលបានប្រាក់ចំណេញកាន់តែច្រើន ប៉ុន្តែនិន្នាការនេះ នឹងក្លាយជាកង្វល់ដ៏ធំមួយទៀត។
យោងតាមសមាគម កសិករកម្ពុជារហូតដល់៩០ភាគរយខ្ចីប្រាក់ពីធនាគារ ឬមីក្រូហិរញ្ញវត្ថុដើម្បីធ្វើកសិកកម្ម។ ខណៈការកើនឡើងថ្លៃដើមផលិតកម្មបង្ខំឱ្យពួកគេខ្ចីប្រាក់កាន់តែច្រើន ផលប៉ះពាល់បង្កដោយជំងឺកូវីដ-១៩ ក៏បានជំរុញឱ្យកសិករដែលកំពុងជួបការលំបាកស្រាប់ ដើរដល់ចំណុចកាន់តែអាក្រក់ថែមទៀត។
ជាសំណាងល្អ ជាជាងឱ្យការពឹងផ្អែកតែលើប្រាក់កម្ចីពីគ្រឹះស្ថានមីក្រូហិរញ្ញវត្ថុ ឬធនាគារ កសិករដូចជា លោកស្រី ថាន និងលោក ភាច អាចខ្ចីលុយរហ័សពីក្រុមសន្សំប្រាក់របស់កសិករនៅក្នុងសហគមន៍របស់ពួកគេ។
«ខ្ញុំអាចទៅខ្ចីទាំងថ្ងៃ ឬយប់។ វាងាយស្រួលជាង មិនដូចធនាគារ ឬមីក្រូហិរញ្ញវត្ថុដែលជាធម្មតាឱ្យយើងមានដីជាវត្ថុបញ្ចាំនោះទេ»។ លោក ភាច និយាយបែបនេះ ដោយបន្ថែមថា ក្រុមសន្សំនេះមានកសិករស់នៅក្នុងសហគមន៍ក្បែរៗគ្នា។
ប៉ុន្តែនៅពេលគំនិតផ្តួចផ្តើមនេះជួយឱ្យពួកគេដោះទាល់នៅរដូវធ្វើកសិកម្មនោះ ចំនួនដែលអាចខ្ចី ក៏មានកំណត់ដែរ។ ដូច្នេះសម្រាប់រឿងធំ កសិករជាច្រើននៅតែត្រូវយកផ្ទះ ឬដីស្រែរបស់ពួកគេទៅបញ្ចាំដើម្បីបានលុយពីគ្រឹះស្ថានមីក្រូហិរញ្ញវត្ថុ ឬធនាគារ។ ទោះអាចខ្ចីបានលឿន និងងាយស្រួលក្ដី ក៏អត្រាការប្រាក់នៅតែខ្ពស់ ដោយកសិករបង់ការប្រាក់៧ភាគរយលើប្រាក់កម្ចីរបស់ពួកគេ។ ការណ៍នេះមានន័យថា ក្រុមសន្សំតាមភូមិទាំងនេះ នៅតែមិនអាចបញ្ចៀសបញ្ហាបំណុលបានឡើយ។
លោក សុខ វឿន ប្រធានសមាគមមីក្រូហិរញ្ញវត្ថុកម្ពុជា (CMA) បានលើកឡើងពីរបាយការណ៍ឆ្នាំ ២០២១ របស់ធនាគារជាតិនៃកម្ពុជាថា ការផ្តល់ប្រាក់កម្ចីមីក្រូហិរញ្ញវត្ថុសម្រាប់វិស័យកសិកម្មបានកើនឡើងយ៉ាងខ្លាំង ដែលស្មើនឹង១៩ភាគរយនៃកម្ចីសរុបដែលចាក់បញ្ចូលទៅក្នុងសេដ្ឋកិច្ចកម្ពុជា។
លោក វឿន បន្ថែមថា ក្នុងរយៈពេលប្រាំឆ្នាំកន្លងមកនេះ ចំនួនប្រាក់កម្ចីសម្រាប់ការធ្វើកសិកម្មកើនឡើងពី ១០៩៩ លានដុល្លារដល់ ១៥៩៨ លានដុល្លារ ហើយអំឡុងវិបត្តិជំងឺ-១៩ ទំហំប្រាក់កម្ចីសម្រាប់ការធ្វើកសិកម្ម បានកើន១១ភាគរយក្នុងឆ្នាំ២០២០ និងកើនដល់២១ភាគរយនៅឆ្នាំ២០២១ ។
នៅពេលសួរអំពីហានិភ័យដែលកសិករមិនអាចសងបំណុលបាន លោក វឿន តបថា មិនមានព័ត៌មានអំពីហានិភ័យបែបនេះនេះឡើយ ប៉ុន្តែបានអះអាងថា ស្ថានការណ៍មានភាពប្រសើរឡើង ដោយសារហានិភ័យប្រាក់កម្ចីមានត្រឹមតែ១,៧ភាគរយប៉ុណ្ណោះ។
សម្រាប់លោក សាវឿន វិញ រឿងដល់ពេលរអន្តរាគមន៍ជួយកសិករ គឺលើសពីដល់ពេលទៅហើយ។
«រដ្ឋាភិបាលគួរតែអន្តរាគមន៍ភ្លាមៗ ដើម្បីធានាថា កសិករខ្នាតតូចអាចទទួលបានប្រាក់កម្ចីជាមួយនឹងអត្រាការប្រាក់ទាបសម្រាប់ការធ្វើកសិកម្ម។ ហើយវា ក៏ត្រូវអនុវត្តលើសម្ភារកសិកម្មសំខាន់ៗមួយចំនួនផងដែរ។ ការធ្វើដូច្នេះ មិនត្រឹមតែជួយកសិករប៉ុណ្ណោះទេ ប៉ុន្តែថែមទាំងជួយអ្នកប្រើប្រាស់ដែរ»។ ប្រធានសម្ព័ន្ធសហគមន៍កសិករកម្ពុជាលើកឡើងបែបនេះ។
ទោះជាយ៉ាងនេះក្តី ប្រធានសមាគមកសិករដដែល នៅតែជំរុញឱ្យរដ្ឋាភិបាលធ្វើការឱ្យពិតប្រាកដលើដំណោះស្រាយរយៈពេលវែង រួមទាំងផ្តល់ជំនួយបច្ចេកទេសដល់កសិករ និងបង្កើតគោលនយោបាយសមស្របដែលប្រមូលធាតុចូលពីកសិករផងដែរ។
លោក សាវឿន ថ្លែងថា៖ «កសិករគួរត្រូវអនុញ្ញាតឱ្យបញ្ចេញមតិ និងក្ដីបារម្ភរបស់ពួកគេ ដែលគួរបញ្ចូលជាធាតុចូលផងដែរ»។
ជុំវិញបញ្ហាអន្តរាគមន៍នេះ លោក វឿន ដែលជាប្រធានសមាគមនមីក្រូហិរញ្ញវត្ថុវិញ លើកឡើងថា សមាគមរបស់លោក បានធ្វើការយ៉ាងដិតដល់ដើម្បីតាមដានដំណើរការក្នុងវិស័យកសិកម្ម។ លោកកត់សម្គាល់ទៀតថា សមាគមរបស់លោក ក៏បានបង្កើតភាពជាដៃគូជាមួយភាគីពាក់ព័ន្ធផ្សេងទៀតក្នុងវិស័យកសិកម្ម ដើម្បីផ្តល់ការគាំទ្រដល់កសិករទាក់ទងនឹងចំណេះដឹងផ្នែកហិរញ្ញវត្ថុ និងធានាពីសេវាកម្មផ្តល់ប្រាក់កម្ចីដែលមានការទទួលខុសត្រូវ និងនិរន្តរភាព។
ឱកាសដើម្បីដើរចេញកសិកម្មដែលពឹងផ្អែកលើសារធាតុគីមី?
ជាមួយនឹងវិបត្តិបែបនេះ វាក៏អាចជាឱកាសមួយសម្រាប់កសិករក្នុងការទទួលយកវិធីសាស្រ្តដែលប្រើជីគីមីតិច ហើយមាននិរន្តរភាពជាងមុន សំដៅរក្សាគុណភាពដី និងកាត់បន្ថយការចំណាយដូចគ្នា។
កម្មវិធីមួយដែលជំរុញការផ្លាស់ប្តូរនេះ កំពុងដំណើរការដោយអង្គការទស្សនៈពិភពលោកកម្ពុជា (World Vision Cambodia) និងគាំទ្រដោយអង្គការ Australian Aid ដែលជួយប្រជាជនប្រមាណ៥០០០គ្រួសារក្នុងខេត្តតាកែវ និងខេត្តកណ្តាល ឱ្យផ្លាស់ប្តូរពីការប្រើប្រាស់ជីគីមីទៅជាកសិកម្មសរីរាង្គ និងជួយស្វែងរកទីផ្សារសម្រាប់ផលិតផលរបស់ពួកគេផងដែរ។
អ្នកគ្រប់គ្រងកម្មវិធីរបស់អង្គការទស្សនៈពិភពលោក លោក អ៊ឹម ថាណូ និយាយ គម្រោងនេះ មិនតម្រូវឱ្យកសិករធ្វើកសិកម្មសរីរាង្គ១០០ភាគរយនោះទេ ប៉ុន្តែយ៉ាងហោចណាស់ វាជាការចាប់ផ្តើមកិច្ចពិភាក្សាស្តីពីស្តង់ដារនៃការប្រើប្រាស់សារធាតុគីមី និងការបង្កើនសមត្ថភាពរបស់កសិករក្នុងការស្វែងរកជម្រើសផ្សេង។
«គម្រោងរបស់យើងជួយពួកគាត់ឱ្យយល់ និងគិតគូរពីតម្លៃផលិតកម្ម និងប្រាក់ចំណេញដែលអាចទទួលបាន។ ប្រាកដណាស់ ពួកគាត់មានឆន្ទៈបន្តបាន លុះត្រាតែពួគាត់អាចរកប្រាក់ចំណេញបានដែរ»។ លោក ថាណូ បញ្ជាក់បែបនេះ មុនបន្តថា កសិករអាចបន្ថែមប្រាក់ចំណេញត្រឹមតែ៣០ភាគរយប៉ុណ្ណោះដោយប្រើសារធាតុគីមី ខណៈការប្រើប្រាស់ជីសរីរាង្គ ឬជីកំប៉ុស ឱ្យពួកគាត់ចំណេញរហូតដល់៨០ភាគរយឯណោះ។
«ប្រសិនបើប្រើសារធាតុគីមី ពួកគេអាចមិនចំណេញសោះ ឬចំណេញតិចតួច»។ ប្រធានកម្មវិធីដដែលសង្កត់ធ្ងន់បែបនេះ។
ស្របពេលតម្លៃសារធាតុគីមីកើនឡើងខ្លាំង ប្រធានកម្មវិធីរបស់អង្គការទស្សនៈពិភពលោកនៅកម្ពុជារូបនេះ អះអាងដែរថា វាអាចជាឱកាសដ៏ល្អក្នុងការជំរុញឱ្យមានការផ្លាស់ប្តូរការយល់ឃើញក្នុងចំណោមកសិករ។ លោកបន្ថែមថា កសិករដែលលោកធ្លាប់បានជួប បង្ហាញការរីករាយ បន្ទាប់ពីព្យាយាមកាត់បន្ថយការប្រើសារធាតុគីមី ព្រោះពួកគាត់អាចសន្សំប្រាក់បានច្រើន ហើយអ្នកខ្លះទៀតចាប់ផ្ដើមផលិតជីសរីរាង្គដើម្បីលក់អ្នកផ្សេងទៀតផង។
កសិករថាន និងភាច ទទួលស្គាល់ថា ជាទូទៅពួកគាត់មិនធ្វើជីកំប៉ុសសម្រាប់ការធ្វើកសិកម្មរបស់ពួកគាត់ទេ ព្រោះការទិញជីគីមីពីទីផ្សារងាយស្រួលជាង។ លោក ភាច ពន្យល់ថា៖ «យើងដឹងពីរបៀបធ្វើជីកំប៉ុស។ ប៉ុន្តែភាគច្រើនមិនចាប់អារម្មណ៍វា ហើយទិញជីគីមីពីទីផ្សារវិញ។ ចំណែកខ្ញុំវិញ វាត្រូវចំណាយពេលបន្តិចក្នុងការធ្វើជីកំប៉ុស»។
នៅពេលសួរថានឹងបោះបង់ ឬកាត់បន្ថយការប្រើជីគីមី បើតម្លៃនៅតែបន្តឡើងនោះ ទាំងលោកស្រីថាន និងលោកភាច យល់ស្របដូចគ្នាថា ការធ្វើជីកំប៉ុសដោយខ្លួនឯង អាចក្លាយជាជម្រើសតែមួយគត់។
«ពិតណាស់ យើងនៅតែពឹងផ្អែកជីគីមី។ ប៉ុន្តែប្រសិនបើវាបន្តឡើងថ្លៃទៀត ខ្ញុំច្បាស់ជាគ្មានជម្រើសអ្វីក្រៅពីពិចារណាផលិតជីកំប៉ុស ដើម្បីជំនួសជីគីមីនោះទេ។ ប្រសិនបើយើងព្យាយាម ខ្ញុំគិតថាយើងអាចផលិតបានគ្រប់គ្រាន់»។ លោក ភាច បង្ហាញយោបល់បែបនេះ។
លោក តន ចាន់រិទ្ធារ៉ា រួមចំណែកក្នុងអត្ថបទនេះ។