ជាតិ
ក្រោយខកខាន២ឆ្នាំ «រុក្ខទិវា» នឹងប្រារព្ធឡើងវិញនៅបាត់ដំបង ក្រោមព្រះអធិបតីព្រះមហាក្សត្រ
ព្រះមហាក្សត្រ នា «រុក្ខទិវា» ឆ្នាំ២០១៩ ក្នុងខេត្តកំពង់ធំ។ រូបភាពពីគេហទំព័ររដ្ឋបាលខេត្តកំពង់ធំ។_
×![]()
ដោយ: ស៊ុល រ៉វី
ក្រសួងកសិកម្ម រុក្ខា្របមាញ់ និងនេសាទ នឹងរៀបចំ «រុក្ខទិវា ៩កក្កដា» ឡើងវិញនៅឆ្នាំ២០២២នេះ ក្នុងខេត្តបាត់ដំបង បន្ទាប់ពីខកខានអស់រយៈពេល២ឆ្នាំ។ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា នឹងយាងចូលរួមជាព្រះអធិបតីក្នុងពិធីនេះ។ 
បន្ទាប់ពីស្ថានភាពជំងឺកូវីដ-១៩ មានលក្ខណៈល្អប្រសើរក្នុងប្រទេសកម្ពុជា ក្រសួងកសិកម្ម នឹងប្រារព្ធ «រុក្ខទិវា ៩កក្កដា» ឡើងវិញនៅក្នុងឆ្នាំនេះ។ ទិវានេះ នឹងប្រារព្ធនៅស្ថានីយផ្សព្វផ្សាយ និងស្ដារព្រៃឈើសំបូរមាស ភូមិសំបូរមាស ឃុំស្ទឹង ស្រុកបាណន់ ខេត្តបាត់ដំបង ដែលមានផ្ទៃដីសរុប ២៦ហិកតា។ នេះបើតាមគេហទំព័រក្រសួងកសិកម្ម។
«រុក្ខទិវា» ត្រូវបានបង្កើតឡើងនៅក្នុងឆ្នាំ១៩៥២ ក្រោមព្រះរាជកិច្ចដឹកនាំរបស់ព្រះបាទ នរោត្តម សីហនុ អតីតព្រះមហាវីរក្សត្រកម្ពុជា ក្នុងគោលបំណងបំផុសចលនាដាំដើមឈើឡើងវិញ និងឲ្យប្រជាពលរដ្ឋចូលរួមថែរក្សាសម្បត្ដិព្រៃឈើ ជាពិសេសដើម្បីបណ្តុះគំនិតថែរក្សា ការពារ និងគំនិត ស្រលាញ់ព្រៃឈើ និងបរិស្ថានធម្មជាតិរបស់ប្រទេស។ ទិវានេះ ត្រូវបានទទួលស្គាល់ជាពិធីប្រពៃណីជាតិមួយហៅថា «ពិធីរុក្ខទិវា» ដែលបានកំណត់ដោយព្រះរាជកិច្ច កាលពីឆ្នាំ១៩៥២។
បច្ចុប្បន្ន «រុក្ខទិវា» ត្រូវបានទទួលស្គាល់ជាផ្លូវការ ដោយចែងក្នុងច្បាប់ស្ដីពីព្រៃឈើឆ្នាំ២០០២ ត្រង់មាត្រា៦០ នៃជំពូកទី១២។ ក្នុងមាត្រានេះបានចែងថា ដើម្បីជំរុញការអប់រំប្រជាពលរដ្ឋឱ្យយល់ដឹងពីសារៈសំខាន់ និងផលប្រយោជន៍ព្រៃឈើ ទិវាពលកម្មដាំកូនឈើ ជាប្រពៃណីជាតិហៅថា «រុក្ខទិវា» ត្រូវបានប្រារព្ធធ្វើឡើងនៅថ្ងៃទី ៩ ខែកក្កដា ជារៀងរាល់ឆ្នាំ ក្រោមព្រះរាជអធិបតីភាពដ៏ខ្ពង់ខ្ពស់របស់ព្រះមហាក្សត្រនៃព្រះរាជាណាចក្រកម្ពុជា ឬព្រះរាជតំណាង៕
Tag:
ThmeyThmey
រុក្ខទិវា ៨កក្កដា
បាត់ដំបង
© រក្សាសិទ្ធិដោយ thmeythmey.com
